লেবীয় 10
10
নাদব আর অবীহূর মরানা
1হারোণর্ পূঅ নাদব আর অবীহূ তারা আগুনো পিলেলোই আগুন্ নেযেইনে সিবে উগুরে ধূপ দিলাক্। তারা লগেপ্রভুর্ উগুমোর্ বারেন্দি অন্য আগুন্দোই লগেপ্রভুর্ নাঙে ধূপ-উৎসর্ব গুরিলাক্। 2ইয়েনত্তে লগেপ্রভু ইত্তুন্ আগুন্ নিগিলি এইনে তারারে পুড়ি ফেলেল, আর তারা লগেপ্রভুর্ মুজুঙোত্ মুরি গেলাক্। 3সেক্কে মোশি হারোণরে কলঅ, “লগেপ্রভু কোইয়্যেদে, ‘যিগুনে মইদু এজন্ তারা যেন মরে পবিত্র বিলিনে মানন্। মানুচ্চুনোর্ চোগোত্ তারা যেন মর্ সর্মান্ তুলি ধরন।’ ” হারোণে জুরো গুরি রলঅ।
4পরেদি মোশি মীশায়েল আর ইলীষাফণরে ডাগিনে কলঅ, “ইদু আয়; পবিত্র তাম্বুল-ঘরর্ মুজুঙেত্তুন্ তমার্ ভেইপুদ্তুনোর্ মরা কিয়্যেগানি ঘরর্ বারেন্দি নেযঅ।” মীশায়েল আর ইলীষাফণে অলঅ হারোণর্ কুট্তো উষীয়েলর্ পূঅ। 5মোশির্ উগুমে তারা এইনে নাদব আর অবীহূরর্ মরাকিয়্যে দ্বিয়ান্ ঘরর্ বারেন্দি নেযেলাক্। সেক্কেয়ো তারার্ কিয়্যেত্ ধর্মগুরুগুনোর্ সিলুমুন এলঅ।
6মোশি যেরেন্দি হারোণ আর তার্ দ্বিবে পূঅ ইলীয়াসর্ আর ঈথামররে কলঅ, “দুঘে তমার্ চুলানি বান্যেগান্ খুলি ন-দুয়ো আর কাবড় ফাদি ন-দুয়ো। সিয়েন্ গুরিলে তুমি মুরি যেবা আর গোদা ইস্রায়েল্ জাদ উগুরে লগেপ্রভু বেজার্ অবঅ। মাত্তর্ লগেপ্রভু যিগুনোরে আগুন্দোই মারে ফেলেয়্যে তারাত্তে তমার্ কুদুম্মোগুনে, অত্তাৎ অন্য ইস্রায়েলীয়গুনে আবিলেচ্ গুরি পারিবাক্।” 7তমা কিয়্যেত্ লগেপ্রভুর্ অভিষেগর্-তেল্ দিয়্যে ওইয়্যে, সেনত্তে তুমি মিলন-তাম্বুলোর দোরানর্ বারেন্দি ন-যেবা, গেলে মুরি যেবা। তারা মোশির্ কধা মানিলাক্।
8ইয়েন পরেদি লগেপ্রভু হারোণরে কলঅ, 9তুই আর তর্ পুয়োগুনে আংগুর্-রস বা মদ হেইনে মিলন-তাম্বুলোত্ ন-চোমেবা, চোমেলে তুমি মুরি যেবা। বংশর্ পর্ বংশ ধুরিনে ইয়েন্ অবঅ তমার্ এক্কান্ উমরর্ সুদোম। 10কুবোন্ পবিত্র আর কুবোন পবিত্র নয় আর কুবোন্ শুদ্ধো-সাংগ আর কুবোন্ ফিবলা সিয়েনি বুঝিনে তমাত্তুন্ চলা পুরিবো। 11লগেপ্রভু মোশির্ মাধ্যমে ইস্রায়েলীয়গুনোরে যেদক্কানি সুদোম্ দিয়্যে, সিয়েনি তুমি তারারে শিগেবা।
12মোশি পরেদি হারোণরে আর তার্ বাগি দ্বিবে পূঅ ইলীয়াসর আর ঈথামররে কলঅ, “লগেপ্রভুর্ নাঙে আগুন্দোই গোজ্যে উৎসর্বর্ ভিদিরেত্তুন শোজ্য-উৎসর্বর যে ভাগ্কান বাগি আঘে, সিয়েন তুমি পূজোবো ইদু নেযেইনে খঅ, মাত্তর্ সিয়েন সদাছাড়া খা পুরিবো। ইয়েন দাঙর্ পবিত্র জিনিস। 13ইয়েন তুমি পবিত্র-তাম্বুল ঘরর্ চাগালাত্ নেযেইনে হেবা; লগেপ্রভুর্ নাঙে আগুন্দোই গোজ্যে উৎসর্বর এ ভাগ্কান্ তর্ আর তর্ পূঅগুনোর্ পাওনা; মুই এ উগুমান্ পেইয়োং। 14মাত্তর্ লগেপ্রভুর্ নাঙে দুলেই রাগেয়্যে বুগোর্ য়েরাগান আর উলুহুল্লো তুই আর তর্ পূঅ-ঝিগুনে বেক্কুনে হেই পারিবাক্। ইয়েনি তুমি কনঅ শুদ্ধ-সাংগ জাগাত হেবা। ইস্রায়েলীয়গুনোর বেক উদোলোলি-উৎসর্বর্ এ ভাগত্তুন তরে আর তর্ পূঅ-ঝিগুনোরে দিয়্যে ওইয়্যে। 15আগুন্দোই গোজ্যে উৎসর্বত্তে যেক্কে তেল আনা অবঅ সেক্কে লগেপ্রভুর্ মুজুঙোত্ দোলন-উৎসর্ব ইজেবে দুলেবাত্তে উলুহুল্লো আর বুগোর য়েরানিও আনা পুরিবো। লগেপ্রভুর্ উগুম মজিম্ এ উলুহুল্লো আর বুগোর য়েরাগান তর্ আর তর্ পূঅ-ঝিগুনোর অক্ত মজিম্ পাওনা।”
16যে ছাগল্লো দিইনে পাপ-উৎসর্বর্ অনুষ্ঠান গরা ওইয়্যে তার য়েরাগান পৌইদ্যেনে হবর্ লোইনে মোশি জানি পারিলোদে, সিয়েন পুড়ি ফেলা ওইয়্যে। ইয়োত তে হারোণর বাগি দ্বিবে পূঅ ইলীয়াসর আর ঈথামর উগুরে বেজার্ ওইনে কলঅ, 17পাপ-উৎসর্বর্ য়েরাগান কিত্তে তুমি পবিত্র তাম্বুল-ঘরর্ চাগালা ভিদিরে হেই ন-ফেল? ইয়েন দঅ দাঙর্ পবিত্র জিনিস। লগেপ্রভুর্ মুজুঙোত্ ইস্রায়েলীয়গুনোর পাপ ঢাগিনে তারার্ সাজাত্তুন উদ্ধোর গুরিবাত্তেই সিয়েন তমারে দিয়্যে অইয়্যে। 18সেই ছাগল্লোর্ লো-গান্ যেক্কে পবিত্র জাগাত নেযা ন-অয় সেক্কে মর্ উগুম মজিম্ পবিত্র তাম্বুল-ঘরর্ চাগালা ভিদিরে তার য়েরাগান তমার হেই ফেলানা উজিত্ এলঅ।
19ইয়েনর্ জোবত্ হারোণে মোশিরে কলঅ, এচ্চ্যে লগেপ্রভুর্ মুজুঙোত্ তারার পাপ-উৎসর্ব আর পুজ্যে-উৎসর্বর্ অনুষ্ঠানর্ পরেদি মঅ উগুরে এ বেক্ ঘদনানি গুদি গেলঅ। এচ্চ্যে দিনোত্ মুই সে পাপ-উৎসর্বর্ য়েরাগান খেলে কি লগেপ্রভু হুজি অদঅ? 20জোব্পান শুনিনে মোশি হুজি অলঅ।
Currently Selected:
লেবীয় 10: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
