যিশাইয় 60
60
যিরূশালেমানর্ বাঈনী গরানা
1লগেপ্রভু কোইয়্যেদে, ও যিরূশালেম,
উঠ্, পহ্র দে, কিত্তে তঅ পহ্রান লুম্মেগি;
লগেপ্রভুর মহিমাগানে তরে পহ্র দের্।
2চঅ, পিত্থিমীগান আন্ধারে নাঢা যেইয়্যে
আর জাদ্তুনো উগুরে এচ্চ্যে ঘুর্গুজ্যে আন্ধার,
মাত্তর্ লগেপ্রভু তঅ উগুরে পহ্র দিবো
আর তার মহিমাগান তঅ উগুরে ফগদাং অবঅ।
3জাদ্তুনে তর্ পহ্র ইদু এবাক্;
রাজাগুনে তর্ বেন্যেপোত্যে পহ্র ইদু এবাক্।
4তুই চোগ্কোলোই চেরোকিত্তে রিনি চাহ্,
তারা বেক্কুনে এগত্তর্ ওইনে তইদু এত্তন্;
তঅ পুয়োগুনে দূরোত্তুন এত্তন্
আর তঅ ঝিগুনোরে করত্ গুরি আনা অর্।
5সিয়েনি দেগিনে তুই হুজিয়ে ফোত্পোত্যে অবে,
হুজিয়্যে তঅ বুগ্কো ফুলি উদিবো;
সাগর ধন সোম্বোত্তিগানি তইদু আনা অবঅ,
জাদ্তুনোর ধন-সোম্বোত্তিগানি তইদু আনিবাক্।
6ধূল্যেচরেদি যেইয়্যে উটো পিদিত্ যেইয়্যেগুন্দোই তমা দেজ্চান ভুরি যেবঅ,
ভুরি যেবঅ মিদিয়ন আর ঐফার বোলী উট্তুন্দোই।
তারা সোনা আর তুম্বাজ্ আগর্বাট্টি্লোই শিবা দেজত্তুন এবাক্
আর লগেপ্রভুরে বাঈনী গুরিবাক্।
7কেদরর ভেড়া পালুন্ তঅ মুজুঙোত্ তুবেবাক্,
নবায়োতর ভেড়াগুন তঅ কামত্ লাগিবাক্;
মঅ পূজোবো উগুরে উৎসর্ব ইজেবে মুই সিগুন গুজি লোম্,
আর মর্ বাঈনী গরেদে ঘরানি মুই আরঅ বাঈনী গরে পারা গুরিম।
8নিজোর্ বাহ্বো ইন্দি কঅগুনে যেধোক্ক্যেন উড়ি এজন্
সেধোক্ক্যেন ইগুন কন্না মেঘ ধোক্ক্যেন উড়ি এত্তন্?
9ঘেচ্চেকগুরি দূর দেজ মানুচ্চুনে মত্তেই বাজ্জেই আগন্;
তমা পূয়োগুনোর আর তারার সোনা রূবোনিলোই দূরোত্তুন্
দাঙর্ দাঙর্ তর্শীশ-জাহাজ্চোই বেক্কুনোত্তুন্ আগে আগে এত্তন্।
ইস্রায়েলর সেই সুদ্ধো-সাংগ মানুচ্চোর,
তর্ গোজেন লগেপ্রভুরে বাঈনী গুরিবাত্তে
তর্ পুয়োগুনে এত্তন্,
কিত্তে তরে তে সয়সাগজ্যে গুরি সাজেয়্যে।
10বিদেশীগুনে তঅ দেবালান আরঅ তুলি দিবাক্
আর তারার রাজাগুনে তরে সেবা গুরিবাক্।
যুনিয়ো রাগে মুই তরে আঘাত্ গোজ্যং
তো দোয়্যে গুরি মুই তরে মেয়্যে গুরিম।
11তঅ গেট্তুন নিত্য খুলো থেবঅ,
দিনে-রেদে কনদিন্অ সিগুন বন্ধ ন-থেবাক্
যেন জাদ্তুনোর ধন-সোম্বোত্তিগানি মান্জ্যে তইদু আনি পারন্;
তারার রাজাগুনোরেয়ো আনা অবঅ।
12যে জাদ্তো বা রেজ্যগানে তরে সেবা ন-গুরিবো সিয়েন ভস্ত অবঅ,
সিয়েন পুরোপুরি ভস্ত ওই যেবঅ।
13লেবাননর্ বাঈনী গরানাগান তইদু এবঅ;
মর্ সুদ্ধো-সাংগ জাগায়ান সাজেবাত্তে
এবাক্ বেরস, ঝাউ আর তাশূর গাজ্চুন;
মর্ টেঙ্ রাগেবার জাগায়ানরে মুই বাঈনী গুরিম।
14তরে যিগুনে অত্যেচার গুরিদাক্
তারা পুয়োগুনে মাঢা নিগিরিনে তঅ মুজুঙোত্ এবাক্;
যিগুনে তরে ঈচ্ গুরিদাক তারা বেক্কুনে তরে জু জু জানেবাক্
আর তরে লগেপ্রভুর শঅর্,
ইস্রায়েলর সেই সুদ্ধো-সাংগ মানুচ্চোর সিয়োন বিলি ডাগিবাক্।
15“যুনিয়ো তরে ছাড়ি দেনা বা ঈচ্ গরা ওইয়্যে,
কনজনে তমা ভিদিরেদি ন-যেদঅ,
তো মুই তরে চির জিংকানিবরর্ মানুচ্ গুরিম
আর বংশর পর বংশর বেক্কুনোর হুজির হবর্।
16মাবো যেধোক্ক্যেন তা পুয়োবোরে দুধ হাবায়
সেধোক্ক্যেন জাদ্তুনে আর রাজাগুনে তারার গম্ গম্ জিনিস্চানি তরে দিবাক্।
সেক্কে তুই হবর্ পেবেদে, মুই লগেপ্রভু তর্ উদ্ধোরগুরিয়্যেবো,
তর্ মুক্তি দিয়্যেবো, যাকোবর সেই খেমতাবলা মানুচ্চো।
17মুই তত্তে আনিম পিদোল বদলে সোনা
আর লুয়োর্ বদলে রূবো।
তক্তার্ বদলে মুই তত্তে আনিম পিদোল
আর পাত্তর বদলে লুয়ো।
মুই ভালেদিগানরে গুরিম তর্ শাজন্ গুরিয়্যে
আর সততাগানরে গুরিম তমার নেতা।
18কনঅ ক্ষতি গুরিবার কধা আর তমা দেজত্ শুনো ন-যেবঅ,
তঅ দুযি ভিদিরে শুনো ন-যেবঅ
কনঅ ভস্ত বা বিনাশ কধা।
তঅ দেবাল নাঙানি অবঅ উদ্ধোর
আর তর্ গেট্তুনোর নাঙানি অবঅ নাঙ্ গিনেনা।
19দিনো অক্তত্ বেলান পহ্র আর দরকার ন-অবঅ,
চানানর্ জোল্জোল্যে পহ্রান তর্ ন-লাগিবো,
কিত্তে লগেপ্রভুই অবঅ তর্ জিংকানিবরর্ পহ্র,
আর তর্ গোজেনে অবঅ তর্ সয়সাগোজ্যে।
20তঅ বেলানে আর কনদিন্অ ন-ঢুবিবো,
তঅ চানানেয়ো আর চিগোন ওই ন-যেবঅ।
লগেপ্রভু অবঅ তর্ জিংকানিবরর্ পহ্র;
তর্ আবিলেচর দিনুন্ থুম্ অবঅ।
21সেক্কে তর্ বেক মানুচ্চুনে গম্ অবাক্;
তারা উমরত্তে দেজ্চান গজক্ গুরিবাক্।
তারা মর্ লাগেয়্যে চারা, মর্ আঢ কাম;
তারার মাধ্যমে মর্ সয়সাগজ্যে কামানি ফগদাং অবঅ।
22তমা ভিদিরে যে চিগোন তে আজার্ জন উগুরে অবঅ,
আর যে বেগত্তুন্ চিগোন তে এক্কো খেমতাবলা জাদ্ অবঅ।
মুই লগেপ্রভু; সময়মজিম মুই সিয়েন যাদিমাদি গুরিম।”
Currently Selected:
যিশাইয় 60: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
