যিশাইয় 59
59
ইস্রায়েলর্ পাপ
1চঅ, লগেপ্রভুর আঢ্তান এদক্ বাদি নয়দে যে, তে উদ্ধোর্ গুরি ন-পারে; তা কানান্অ এদক্ গুয়োর্ নয় যে, তে ন-শুনে। 2মাত্তর্ তমা ভান্ন্যেয়ানিয়ে লগেপ্রভুত্তুন্ তমারে ফারগ্ গুরি দিয়্যে। তমা পাপত্তে তে তা মুয়োন তমাত্তুন্ ফিরেই নেযেয়্যে; সেনত্তে তে ন-শুনে। 3তমা আঢ্তানি লো-লোই আর আঙুলুন্ পাপে অসিজি ওইয়্যে। তমা মুয়োনিয়ে মিজে কধা কোইয়্যে আর তমা জিলানিয়ে পাজি কধা কয়। 4কনজনে গমেডালে মগদ্দমা ন-গরন্, কনজনে ঠিগ্ মজিম মগদ্দমানর উকিলগিরি ন-গরন্। তারা বাজে যুক্তি উগুরে বিশ্বেজ্ গরন আর মিজে কধা কন্; তারা পাজিগানি পেদত্ রাগান আর ভান্ন্যেয়ানি জর্ম দুয়োন। 5তারা বিষবলা সাপ বদাত্ উম্ দুয়োন আর মাগড়গ জাল্ বুনোন। যে কনজনে সেই বদাগুন হান্ তে মরে; সিগুন এক্কো ভাঙিলে বিষবলা সাপ নিগিলোন। 6তারার মাগড়গ জালত্ কাবড় ন-অয়; তারা যিয়েনি উরোন্ সিয়েনিলোই নিজোরে নাঢি ন-পারন্। তারার বেক্ কামানি ভান্ন্যেই, তারা আঢত্ আগেদে ক্ষতি গুরিবার কামানি। 7তারার্ টেঙানি পাপ ইন্দি দাবা দাবা যায়; তারা নিদ্দুযি মান্জ্যর লো ঝোরেবাত্তে যাদিমাদি যান্। তারার চিদে চজ্জানি বেক্কানি বজং আর তারার পথ্তানিত্ ভস্ত আর সর্বনাশ থায়। 8তারা সুগ্-শান্দির পথ্তান হবর্ ন-পান্; তারা পদথ্ কনঅ ন্যায়বিচের নেই। তারা নিজো পথ্তান বেঙা-তেরা গোজ্যন্; যিগুনে সে পধেদি চলন তারা সুগ্-শান্দি কি সিয়েন হবর্ ন-পান।
পাপ স্বিগের্
9সেনত্তে ন্যায়বিচেরান আমাত্তুন দূরোত্ থায় আর সততাগান আমা ইদু ন-লুমেগি। আমি পহ্র পেবাত্তে চেই, মাত্তর্ বেক্কানি আন্ধার; জোল্জোল্যে পেবাত্তে চেই, মাত্তর্ ঘন ছাবালোই চলিই। 10আমি কান্ মান্জ্য ধোক্ক্যেন দেবাল বিজিরে বিজিরে বেড়েই; যিগুনোর চোগ্ নেই তারা ধোক্ক্যেন পথ বিজিরেই। যেন সাজোন্যে ওইয়্যেদে ধোক্ক্যেন সেবাবোত্যেগুরি আমি উজোত্ হেই; আমি জেদা মানুচ্চুনো ভিদিরে মরা ধোক্ক্যেন। 11আমি বেক্কুনে ভালুগো ধোক্ক্যেন গুজুরিই, কঅ ধোক্ক্যেন নরম্ গুরি ডাগিই। আমি ন্যায়বিচের পেবাত্তে চেই, মাত্তর্ ন-পেই; আমি উদ্ধোর্ পেবাত্তে চেই, মাত্তর্ সিয়েন বোউত্ দূরোত্ থায়।
12ও লগেপ্রভু, তঅ চোগেদি আমার অন্যেয়ানি বোউত্ বেশ্; আমা পাপ্পানিয়ে আমা বিরুদ্ধে সাক্ষি দে। আমা অন্যেয়ানি আমা সমারে সমারে আগে আর আমা দুষ্চানি আমি হবর্ পেই। 13সিয়েনি অলঅ, উল্লোমী আর তরে অস্বিগের্ গরানা, আমা গোজেন ইত্তুন দূরোত্ সুরি যানা, আত্যেচার আর উল্লোমীত্তে উচ্চোমি তুলি দেনা আর মনত্তুন্ মিজে কধা নিগিলেই আনিনে সিয়েনি কনা। 14সেনত্তে ন্যায়বিচেরানরে ওদেই দিয়্যে ওইয়্যে আর ন্যায্যগান দূরোত্ থিয়্যেই আঘে; সত্যগান পধে পধে উজুদো হেইয়্যে, সততাগানে চোমেই ন-পারে। 15সত্যগানরে কনজাগাত্ তোগেইনে পাহ্ ন-যায়, আর যে ভান্ন্যেয়ানরে ছাড়ে তে অত্যেচারর্ শিগের্ অয়।
ইস্রায়েলর উদ্ধোর্ পানা
লগেপ্রভু ইয়েনি দেগিলো আর ন্যায়বিচের নেই বিলিনে বেজার্ অলঅ। 16তে দেগিনে আমক্ অলদে, ন্যায়বিচেরর্ তপ্পে থিয়্যেবার কনজন নেই; সেনত্তে তে তার খেমতাবলা আঢ্তান্দোই উদ্ধোরর্ কামানি গুরিলো আর এ কামানত্ তার ন্যায্যতাগানে তারে সাহায্য গুরিলো। 17তে বুগ্কো রোক্ষ্যে গুরিবাত্তে ন্যায্যতাগান গুরিলো আর মাঢাবো রোক্ষ্যে গুরিবাত্তে উদ্ধোরান মাঢাত্ দিলো। তে হেনা সুজিবার কাবড়ানি উরিলো আর চাদর ধোক্ক্যেন গুরি আওজ্চান কিয়্যেত্ উরিলো। 18মানুচ্চুনে যিয়েনি গোজ্যন সিয়েনি তে তারারে ফিরেই দিবো; তা বিপক্ষগুনো উগুরে রাগ্ ঢালি দিবো আর শত্রুগুনোর ভান্ন্যেই কামর্ সাজা দিবো। দূর দেজ মানুচ্চুনোর যিয়েনি পাওনা সিয়েনি তে তারারে দিবো। 19পোজিমেদি মানুচ্চুনে লগেপ্রভুরে ভোক্তিগুরিনে দোরেবাক্ আর পূগেদি মানুচ্চুনে তার মহিমাগান দেগিনে গমেডালে দোরেবাক্, কিত্তে লগেপ্রভু তার নিজেজ্চোই গদা ভাঙেদে বান পানি ধোক্ক্যেন এবঅ। 20লগেপ্রভু কোইয়্যেদে, “যাকোবর্ যিগুনে পাপত্তুন মনানি ফিরেয়োন তারাত্তে উদ্ধোর গুরিয়্যেবো সিয়োনত্ এবঅ। 21তারাত্তে মর্ বেবস্থাগান ইয়েন: মর্ যে আত্মাগান তমা উগুরে আঘে আর মর্ যে কধাগান মুই তমা মুয়োনত্ দুয়োং সিয়েন তমার, তমা ঝি-পুয়োগুনোত্তুন্ আর তারার বংশধরুনো মুয়োত্তুন্ সিয়েনি ন-যেবঅ; সিয়েনি ইক্কেত্তুন ধুরি উমর সং থেবঅ। মুই লগেপ্রভু এ কধাগান কঙর্।”
Currently Selected:
যিশাইয় 59: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
