যিশাইয় 46
46
বাবিলো দেবেদাগুনোর পতন
1লগেপ্রভু কোইয়্যেদে, বেল দেবেদাবো তলে অবঅ আর নবো দেবেদাবো মাঢা নিগিরিনে পড়িবো; তারার মূত্তিগুন্ ভারান্ বোইয়্যে এ্যামানুনে বুয়োই নিবাক্। যে মূত্তিগুন্ বাবিলীয়গুনে পূজো গুরিদাক্ সিগুন বুদি ধোক্ক্যেন অবাক্, বল্ পোজ্যে য়েমানুনোত্তে গুয়োর্ অবঅ। 2সেই দেবেদাগুনে এক সমারে মাঢা নিগিরিবাক্ আর তলে পড়িবাক্। তারা নিজো মূত্তিগুন রোক্ষ্যে গুরি ন-পারিবাক্ বরং নিজে বন্দী ওইনে যেবাক্কোই।
3ও যাকোবর বংশ, ইস্রায়েলর বংশর বাঁজি থেইয়্যে মানুচ্চুন্, তুমি মঅ কধাগান শুনো। পেদত্ এবার অক্তত্তুন্ ধুরি আর জর্মর পরেত্তুন্ ধুরি মুই তমা ভারান্ বুয়োঙর্। 4তমার বুড়ো বয়স সং মুই এক্কুই থেম্; তমা চুলান্ পাগিবার বয়স সং তমা ভারান্ বুয়োই দিম। মুয়ই তমারে বানেয়োং, মুয়ই তমা ভারান বুয়োম্; মুয়ই তমারে বুয়োম্ আর রোক্ষ্যে গুরিম।
5তুমি কা সমারে মরে তুলনা গুরিবে বা কা সং সং বিলিনে মরে ধুরিবা? কা লগে তুলনা গুরিলে আমা সং কুয়ো যেবঅ? 6কেউ কেউ তারার থৈল্যেত্তুন্ সনা ঢাল আর পাল্লালোই রূবো মাবন্। সিয়েনিলোই তারা দেবেদা বানেবাত্তে সনা বান্যেগুনোরে দুয়োন; পরেদি তারা সেই দেবেদাগুনোরে জু জু জানান্ আর পূজো গরন। 7তারা তারে কানাত্ তুলিনে বুয়োই নেযান্; তা জাগানত্ তারা তারে থিদেবর্ গরন আর তে সিয়েনত্ থায়। সে জাগানত্তুন্ তে আর লুড়ি ন-পারে। কনজনে তা কায়কুরে কানিলেয়ো তে জোব্ দি ন-পারে, তা দুখ্ কষ্টত্তুন্ তারে রোক্ষ্যে গুরি ন-পারে।
8“ও পাপীগুন, তুমি এ কধাগান মনত্ রাগেইনে থির্ থাগঅ আর মনযোগ দুয়ো। 9তুমি ভালোক্ দিন আগ পৌইদ্যেনে ইদোত্ তুলো। মুয়ই গোজেন, অন্য আর কনজন নয়; মুয়ই গোজেন, মঅ ধোক্ক্যেন আর কনজন নেই। 10মুই শেজ্ কাল পৌইদ্যেনে আগে আগে কং আর যিয়েনি এজঅ ন-অয় সিয়েনি আগে জানাং। মুই কোইয়োংগে যে, মঅ উদ্দেশ্যগান থির্ থেবঅ; মর্ বেক আওজ্চান মুই পুরেম্। 11মঅ উদ্দেশ্যগান পুরেবাত্তে মুই এক্কো মান্জ্যরে দূর দেজত্তুন্ ডাগি আনিম; তে পূগ দেজত্তুন্ শিগেরী পেগো ধোক্ক্যেন্ এবঅ। মুই যিয়েনি কোইয়োং সিয়েনি মুই সফল গুরিম আর যিয়েনি পরিকল্পনা গোজ্যং সিয়েনি গুরিম। 12ও একবুস্যে মনর্ মানুচ্চুন, তুমি যিগুনে মর্ গুজি লনাত্তুন দূরোত্ আগ, মঅ কধাগান শুনো। 13মর্ নিদ্দোজ্চান মুই তমা ইদু আনঙর্; সিয়েন বেশ্ দূরোত নয় আর মর্ উদ্ধোর কামত্অ আর বেশ্ দেরি নেই। মুই সিয়োনানরে উদ্ধোর গুরিনে ইস্রায়েলরে বাঈনী গরানাগান্ দান গুরিম।”
Currently Selected:
যিশাইয় 46: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
