যিশাইয় 47
47
বাবিলোর পতন
1লগেপ্রভু কত্তে, “ও গাবুজ্যে মিলে বাবিল, তুই তলেদি লামিনে ধূল্যেত্ বস্; ও বাবিল, তুই সিংহাসনান্ ছাড়িনে মাদিত্ বস্। তরে আর নরম আহ্ সুগী বিলিনে কুয়ো ন-যেবঅ। 2তুই মেশিন্দোই গম্ মাড়্ আর তঅ ঘঙদাগান খুলি ফেলা। তঅ কাবড়ান তুলিনে দামানাগানি খুলো রাগা আর গাঙ ইন্দি আঢি যাহ্। 3তর্ লাঙ্তা অনাগান ফগদাং অবঅ আর তর্ লাজানাগান্ ঢাক্যে ন-থেবঅ। মুই হেনা সুজিম, কারঅ কোজোলিগান্ ন-মানিম।”
4আমা উদ্ধোরগুরিয়্যে অলঅ ইস্রায়েলর সেই সুদ্ধো-সাংগ মানুচ্চো; তা নাঙান বেগত্তুন্ খেমতাবলা লগেপ্রভু গোজেন।
5লগেপ্রভু কত্তে, ও বাবিল, তুই জুরো গুরি বস্; তুই আন্ধার ভিদিরে যাহ্। তরে আর রেজ্যগানির রাণী বিলিনে ডাগা ন-অবঅ। 6মঅ মানুচ্চুনো উগুরে মঅ রাগ্কান জুলি উঠ্যে আর মঅ সোম্বোত্তিগানরে মুই অসিজি অবাত্তে দুয়োং। তারারে মুই তঅ আঢত্ তুলি দুয়োং আর তুই তারা উগুরে কনঅ মেয়্যে ন-দেগাচ্। এমন্ কি, বুড়ো মানুচ্চুনো উগুরেয়ো তুই গুয়োর্ বুদি চাপি দুয়োচ্। 7তুই কোইয়োচ্চে, মুই জিংকানিবর্ রাণী থেম্। মাত্তর্ তুই এ পৌইদ্যেনে চিদেয়ো ন-গরচ্, বা ইয়েনর শেজ্ ফলান কি সিয়েন্অ ভাবি ন-চাজ্।
8ইক্কিনে, ও ভোগ্ গুরিয়্যে মিলেবো, শুন; তুই নিশিদে আরামে বোইনে মনে মনে কত্তে, বানা মুয়ই আগং, মুই বাদে আর কনজন নেই। মুই কনদিন্অ রাণিমিলে ন-ওম্ বা পুয়ো-ছা আরেবার দুঘ্কান্ ন-পেম্। 9মাত্তর্ পুয়ো-ছা আরানা বা রাণিমিলে অনা এ দিয়্যেনই একই দিনে যে কনঅ সময় তর্ ঘুদিবো। তর্ বোউত্ যাদুবিদ্যে আর বোউত মন্ত্রতন্ত্র থেলেয়ো সিয়েনি তঅ উগুরে যদবদেগুরি ঘুদিবো। 10তর্ সেই পাজিগান উগুরে তুই বিশ্বেজ্ গরর্ আর কোইয়োচ্চ্যে, কনজনে মরে ন-দেগদন্। তর্ জ্ঞান আর বুদ্ধিগানে তরে ভান্ন্যেই পধেদি নেযেয়্যে; তুই মনে মনে কোইয়োচ্চ্যে, বানা মুয়ই আগং, মুই বাদে আর কনজন নেই। 11মাত্তর্ তঅ উগুরে দজা লামি এবঅ, আর তুই হবর্ ন-পেবে কেধোক্ক্যেন গুরি যাদুর্ বলে সিয়েনি দূর্ গরা যেবঅ। তঅ উগুরে দজা এবঅ, আর তুই সিয়েনি আক্সোই ন-পারিবে। যে দজাগান পৌইদ্যেনে তুই আগেদি হবর্ ন-পেদে সিয়েনি আদিক্ক্যেন্গুরি তঅ উগুরে এবঅ।
12“যেদক্কানি যাদুবিদ্যে আর মন্ত্রতন্ত্রত্তে তুই চিগোনত্তুন্ ধুরি কাম্ গরর্ সিয়েনি তুই চালেই যাহ্। অয়ত তুই সফল অবে, অয়ত তুই দর্ দেগেই পারিবে। 13তুই যেদক্কানি সল্লা পেইয়োচ্ সিয়েনি বানা তরে বল্পোজ্যে গোজ্যে। তর্ গোণোক্ক্যেগুনো মুজুঙোত্ এজোদোক্; তারাগুন দেগিনে মাসর্ পর মাস যিগুনে আগাম্ কধা কন্ তারা তঅ উগুরে যিয়েনি এজের্ সিয়েনিত্তুন্ তরে রোক্ষ্যে গোরোদোক্। 14তারা নাড়া ধোক্ক্যেন; আগুনানে সিয়েনিরে পুড়ি ফেলেব। তারা আগুনো খেমতার আঢত্তুন্ নিজোরে রোক্ষ্যে গুরি ন-পারন্। এ আগুনান এমন আঙারার্ আগুন নয় যিয়েনর মুজুঙোত্ বোইনে কনজনে আগুন পুয়োই পারন্ বা যিয়েনত্তুন্ পহ্র পেই পারন্। 15যিগুনো লগে তুই কাম্ গোজ্যস্ আর চিগোনত্তুন্ ধুরি বেবসা গোজ্যস্ তারা সেবাবোত্যে অবাক্। তারা পত্তি জনে নিজো নিজো পধেদি চলদন্; একজন্অ নেই যে তরে রোক্ষ্যে গুরি পারে।”
Currently Selected:
যিশাইয় 47: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
