যিশাইয় 35
35
উদ্ধোর্ পেইয়্যে মানুচ্চুনোর্ হুজি
1-2ধূল্যেচর-চাগালা আর শুগুনো ভূইয়ানি হুজি অবঅ;
ধূল্যেচর জাগায়ানিয়ে হুজি অবঅ আর ফুল ফুদেব।
ফাগোন্-চৈত্ মাজত্ পত্তম ফুলো ধোক্ক্যেন সিয়েনিত্ বোউত ফুল ধুরিবাক্;
ধূল্যেচরানিয়ে বোউত্ হুজি অবঅ আর হুজিয়ে রঅ ছাড়িবো।
সিয়েনরে লেবানন ধোক্ক্যেন বাঈনী গরা অবঅ,
দিয়্যে অবঅ কর্মিল আর শারোণর দোল্ জিনিস্চান;
মানুচ্চুনে লগেপ্রভুর বাঈনীগান্ দেগিবাক্,
দেগিবাক্ আমা গোজেনর দোল্ জিনিস্চান।
3যিগুনে বল্পোজ্যে তারার আঢ্তানি দরমর গরঅ;
গির্গিরেইদ্যে আডুগুন্ ঠিগ্ গরঅ।
4যিগুনোর্ রিবেঙানি দরে ভরা তারারে কঅ,
“বল্বলা অ, ন-দোরেয়ো।
তমা গোজেনে এবঅ,
হেনা সুজিবাত্তে আর সাজা দিবাত্তে এবঅ;
তে এইনে তমারে উদ্ধোর্ গুরিবো।”
5সেক্কে কান্ মানুচ্চুনোর চোগ্কুন খুলি যেবঅ,
বরাগুনোর্ কানানি নাঢা যেইয়্যে ন-থেবঅ।
6সেক্কে লেং-আঢুড়ুনে উরিঙো ধোক্ক্যেন্ ফাল্যেবাক্,
বোবাগুনোর জিলানি হুজিয়ে রঅ ছাড়িবো।
ধূল্যেচর-চাগালার তলেত্তুন্ জোরে পানি নিগিলি এবঅ,
আর ধূ্ল্যেচরর নানান্ জাগাত্ গঙার্ বেবঅ।
7শুগুনো ভূইয়ানি পুয়োর্ অবঅ,
আর তিরেস্ পেইয়্যে মাদিগানিত্ পানির পয়নালা উদিবো;
যিয়েনত্ শিয়েলুনে পড়ি থেদাক্
সে জাগানত্ জোর্মেবদে নল-খাগড়ার ঝার্।
8সিয়েনত্ অবঅ এক্কান রাজপথ,
অয়, এক্কান্ পথ অবঅ;
সিয়েনরে কুয়ো অবঅ সুদো-সাংগর্ পথ।
অসিজি মানুচ্চুনে সিয়েন উগুরেদি ন-যেবাক্;
সিয়েন অবঅ তারাত্তে যিগুনে সুদ্ধো-সাংগর্ পধেদি চলন্।
বাজে-বিবেক্ মানুচ্চুনে সে পধেদি ন-যেবাক্।
9সিয়েনত্ কনঅ সিংহ ন-থেবাক্,
কনঅ চিৎনপুজ্যে য়েমানে সেই পধেদি ন-যেবাক্।
সিয়েনত্ তারারে দেগা ন-যেবঅ,
মাত্তর্ বানা মুক্তি পেইয়্যে মানুচ্চুনে সেই পধেদি আঢিবাক্,
10আর লগেপ্রভুর্ উদ্ধোর্ গোজ্যে মানুচ্চুনে ফিরি এবাক্।
তারা হুজিয়ে গান গাদে গাদে সিয়োনত্ সুমিবাক্;
তারার্ মাঢাগুনো মুকুট্তুন অবদে জিংকানিবরত্তে হুজি।
তারা হুজিয়ে আর ফুত্তিয়ে ভর্পুনং অবাক্,
দুঘে আর ভঅ নিযেজে দূরোত্ ধেই যেবাক্।
Currently Selected:
যিশাইয় 35: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
