যিশাইয় 34
34
জাদ্তুনো বিরুদ্ধে রায়
1ও জাতিগুন্, তুমি কায়-কুরে এজঅ, শুনো; ও মানুচ্চুন্, তুমি কান্ পাদঅ। পিত্থিমী আর সিয়েন ভিদিরে বেক্ মানুচ্চুনে শুনোদোক্; সংসার আর তা মাদিত্তুন্ বানেয়্যে মানুচ্চুনে শুনোদোক্। 2বেক্ জাদ্তুনো উগুরে লগেপ্রভু অমকদ বেজার্ ওইয়্যে; তারার বেক্ সৈন্যদলুনো উগুরে তার রাগ্কান রোইয়্যে। তে তারারে এক্কুবারে শেজ্ গুরি ফেলেব, ভস্তর্ আঢত্ তারারে তুলি দিবো। 3তারার্ মুরি যেইয়্যে মানুচ্চুনোরে বারেদি ফেলেই দিয়্যে অবঅ। তারার্ মরা কিয়্যেনিত্তুন্ পজাবাজ্ নিগিলিবো আর তারার্ লোগানিলোই মুড়ো-মুড়ি ধোই যেবঅ। 4আগাজর্ বেলান-চানান্-তারাগুন্ ভস্ত ওই যেবাক্ আর আগাজ্ছান বুদি থোইয়্যে কাবোজ্ ধোক্ক্যেন বুদি যেবঅ। যেবাবোত্যেগুরি আংগুর লুদি আর ডোমোর্ গাজত্তুন্ শুগুনো পাদানি পড়ি যায় সেধোক্ক্যেন্ গুরি বেক্ তারাগুন্ পড়িবাক্।
5মঅ তলোয়ারান্ স্বর্গত্ পুরোপুরি গুরি যুক্কোল্; চঅ; বিচেরত্তে সিয়েন ইদোম উগুরে, অত্তাৎ যে মানুচ্চুনোরে মুই ভস্তর্ অভিশাব তলেদি রাগেয়োং তারা উগুরে লামি এজের্। 6লগেপ্রভুর তলোয়ারানে লো-লোই গাট্যে; সিয়েন তেল্লোই নাঢা যেইয়্যে। সেই লো-নি ভেড়া ছাগল ছঅ আর ছাগল লো ধোক্ক্যেন আর তেলানি ভেড়া ছাগল বুগো তেল ধোক্ক্যেন্, কিত্তে লগেপ্রভু বস্রাত এক্কো উৎসর্বর অনুষ্ঠান গুরিবো আর ইদোমত্ ভালোক্কুনোরে কাবি ফেলা অবঅ। 7সিগুনো লগে ঝার গোরু, বলদ গোরু আর দাঙর্ দাঙর্ গোরু কাবা অবঅ। তারা দেজ্ছান লো-লোই ভিজি যেবঅ, আর তেলানি ধূল্যেলোই নাঢা যেবঅ।
8ইয়েনি অবঅ, কিত্তে হেনা সুজিবার্ লগেপ্রভুর এক্কো দিন আঘে, সিয়োনর্ পক্ক ওইনে সাজা দিবার্ এক্কো সময় আঘে। 9ইদোমর্ পানি গঙারুন্ মাত্যে তেল্লোই ভুরি যেবঅ, সিয়েনর্ ধূল্যেগানি অবঅ গন্ধক্কোই ভরা, সেনত্তে দেজর্ মাদিগান অবঅ জোল্জোল্যে মাত্যেতেল্। 10দিনে রেদে কনদিন্অ সিয়েন ন-মুড়িবো; জিংকানিবর্ সিয়েনত্তুন্ ধূমো উদিবো। বংশর পর বংশ ধুরিনে সিয়েন খালি ওই পড়ি থেবঅ; কনজনে সিয়েন ভিদিরেদি আর্ কনদিন্অ ন-যেবাক্। 11ধূল্যেচর-পেজা, কুদুক্-কাদাক্, হুতুম পেজা আর গাঙ্ কবাগুনে সেই দেজ্চান গজক্ গুরিবাক্ আর সিয়েনত্ বজত্তি গুরিবাক্। লগেপ্রভু ভেজাল্যে মাবর্ দুড়ি আর শূন্যতার্ ওলনদুড়ি ইদোম উগুরে বিজেই দিবো। 12রেজ্য চালেবাত্তে কনঅ দাঙর্ পোজিশন মানুচ্ বা কনঅ শাজন্গুরিয়্যে ন-থেবাক্। 13কাদাগাজে সিয়েনর্ দাঙর্ দাঙর্ ঘরানি নাঢা যেবঅ, আর তাম্বুলানি নাঢা যেবঅ বিছুটি আর কাদাঝুব্পোই। সে দেজ্চান অবঅ শিয়েল আর উটপেখ্কুনোর থেবারজাগা। 14ধূল্যেচর-প্রাণীগুনে শিয়েলুনো লগে থেবাক্ আর ঝার ছাগলুনে এক্কো আর এক্কোরে ডাগিবাক্। রেদোত্ ঘুরি বেড়েয়্যে পেত্নী সিদু বজত্তি গুরিবো; সিদু তার জিরেবার জাগায়ান্ তে তোগেইনে পেবঅ। 15পেজাবো বাহ্ বানিনে সিয়েনত্ বদা পাড়িবো, সে পরেদি বদা ফাদিনে তা ডুয়োগান্ ছাবালোই তা ছঅগুনোরে এক জাগাত্ গুরিবো। সিয়েনত্ চিলুনে যার্ যার্ সমাজ্যেলোই এগত্তর্ অবাক্।
16তুমি লগেপ্রভুর বোইবোত্ তোগেই চঅ আর পড়। সিয়োত্ লেগা আগেদে-ইগুনোত্তুন্ এক্কোয়ো আজিই ন-যেবঅ, এক্কোর্অ সমাজ্যের্ অভাব ন-অবঅ; কিত্তে মঅ মুয়োদি লগেপ্রভু সেই উগুমান্ দিয়্যে, আর তা আত্মাগানে তারারে একলগে এগত্তর্ গুরিবো। 17তে পোরোক্ক্যে গুরিনে আর মাবেদে দুড়িলোই মাবিনে সে জাগায়ান তারারে ভাগ্ গুরি দিবো। সিয়েনি জিংকানিবর্ তারার্ থেবঅ; বংশর্ পর বংশ ধুরি তারা সিয়েনত্ বজত্তি গুরিবাক্।
Currently Selected:
যিশাইয় 34: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
