যিশাইয় 36
36
সন্হেরীবে যিরূশালেমানরে দর্ দেগেল
1রাজা হিষ্কিয়োর রাজাগিরির চোদ্দো বজরত্ আসিরিয়ার রাজা সন্হেরীবে যিহূদার বেক্ দেবাল্-ঘিজ্যে শঅরানি আক্রমণ গুরিনে সিয়েনি গজক্ গুরি নেযেল। 2সে পরেদি আসিরিয়ার রাজা রব্শাকিরে দাঙর্ একদল সৈন্যলোই লাখীশত্তুন্ যিরূশালেমত্ রাজা হিষ্কিয়র্ ইদু পাদেল। রব্শাকি যেইনে কাবড়্ ধোয়্যেবোর মাদর্ পধ পারত্ অজল্ পুয়োর্বো লগে বাস্যে পানি গাদ্তো ইদু থামেল। 3সেক্কে রাজঘরর্ পরিচালক হিষ্কিয়র্ পুয়ো ইলিয়াকীম, রাজার লিগিয়্যে শিব্ন আর বিজগ্ লিগিয়্যে আসফর পুয়ো যোয়াহ নিগিলিনে তাইদু গেলঅ। 4রব্শাকি তারারে কলঅ, তুমি হিষ্কিয়রে এ কধাগান্ কঅ, সেই দাঙর্ রাজা, অত্তাৎ আসিরিয়ার্ রাজা কোইয়্যেদে, তুই কা উগুরে বিশ্বেজ্ গোজ্যস্? 5মুই কঙত্তে তর্ যুদ্ধো গুরিবার বুদ্ধি আর খেমতার কধানি বানা মুয়ো কধা। কদে চাং, তুই কা উগুরে বিশ্বেজ্ গুরিনে মঅ বিরুদ্ধে উল্লোমি গরর্? 6তুই দঅ বিশ্বেজ্ গরর্ সেই ভাঙি যেইয়্যে নল, অত্তাৎ মিসর উগুরে। যে সেই নল্লো উগুরে বিশ্বেজ্ গুরিবো সিবেই তা আঢ্তান কানা গুরি দিবো। মিসরর্ রাজা ফরৌণ উগুরে যিগুনে বিশ্বেজ্ গরন তারা উগুরে তে সিয়েনই গরে। 7মাত্তর্ তুমি যুনি মরে কঅ, তুমি তমার গোজেন লগেপ্রভু উগুরে বিশ্বেজ্ গোজ্য, সালে তে কি সেই গোজেন নয় যিবের পূজোর অজল্ জাগায়ান আর ডালিপূজোগুন্ হিষ্কিয় ভস্ত গোজ্যে আর যিহূদা আর যিরূশালেম মানুচ্চুনোরে কোইয়্যেদে যিরূশালেমর্ এ পূজোবোর মুজুঙোত্ তারারে উবোসনা গরা পুরিবো?
8“তুমি মর্ ওইনে তমা রাজাবোরে আরঅ কঅ, ‘তুই যুনি পারস্ সালে মর্ গিরোজ্ আসিরিয়ার রাজা সমারে এ বাঁজি ধর্, মুই তরে দ্বি আজার ঘোড়া দিম্ যুনি তুই সিগুনোত্ চড়িবাত্তে মানুচ্ দি পারস্। 9যুনি সিয়েন ন-পারস্ সালে মঅ গিরোজ্সো কামগুরিয়্যেগুনো ভিদিরে বেগত্তুন্ যে চিগোন তারে বা তুই কেধোক্ক্যেন গুরি মানা গুরিবে, যুনিয়ো তুই মিসরর্ রথ আর ঘোড়া চালেয়্যেগুনো উগুরে বিশ্বেজ্ গরর্? 10সিয়েন বাদে মুই কি লগেপ্রভুত্তুন্ অনুমতি ন-নিইনে এ দেজ্চান আক্রমন আর ভস্ত গুরিবাত্তে এচ্চ্যং? এ দেজ্চান বিরুদ্ধে যুদ্ধো গুরিনে সিয়েন ভস্ত গুরি ফেলেবাত্তে লগেপ্রভু নিজেই মরে কোইয়্যে।’ ”
11সেক্কে ইলিয়াকীম, শিব্ন আর যোয়াহ রব্শাকিরে কোইয়্যেদে, “তঅ চাগর্বো ইদু তুই দোয়্যে গুরিনে অরামীয় ভাষায় কধা কঅ, কিত্তে আমি সিয়েনি বুঝিই। দেবাল উগুরে মানুচ্চুনো মুজুঙোত্ তুই আমা ইদু ইব্রীয় ভাষালোই কধা ন-কবে।”
12মাত্তর্ জোবত্ রব্শাকি কলঅ, “মঅ গিরোজ্সো কি বানা তমার্ গিরোজ্ আর তমা ইদু এ কধানি কবাত্তে মরে পাদেয়্যে? দেবাল উগুরে বোস্যে সেই মানুচ্চুনে, যিগুনোর্ তমা ধোক্ক্যেন নিজোর নিজোর ঘু আর মুদ্ হা পুরিবো তারা ইদুয়ো কি কোই ন-পাদাচ্?”
13সে পরেদি রব্শাকি থিয়্যেইনে জোরে জোরে ইব্রীয় কধাদি কোইয়্যেদে, তুমি দাঙর্ রাজার্, অত্তাৎ আসিরিয়ার রাজার কধানি শুনো। 14রাজা কোইয়্যেদে, হিষ্কিয় যেন তমারে ন-ঠগায়। তে তমারে রোক্ষ্যে গুরি ন-পারিবো। 15হিষ্কিয় যেন এ কধাগান কোইনে লগেপ্রভু উগুরে তমার বিশ্বেজ্ ন-জর্মায়,
16তুমি হিষ্কিয়োর কধা ন-শুন্ন্য। আসিরিয়ার রাজা কোইয়্যেদে, তুমি মঅ লগে মিলো আর নিগিলিনে মইদু এজঅ। সালে তুমি পত্তিজনে তার নিজোর্ আংগুর আর ডোমোর্ গাজত্তুন্ ফল আর নিজোর কূয়োত্তুন্ পানি হেই পারিবা। 17সে পরেদি মুই এইনে তমার্ নিজো দেজ ধোক্ক্যেন আর এক্কান দেজত্ তমারে নেযেম। সে দেজ্চান অলঅ শোজ্য আর নূয়ো আংগুর-রস দেশ, রুটি আর আংগুর খেদর দেশ।
18“ ‘হিষ্কিয় তমারে ভান্ন্যেই পধেদি চালেবাত্তে যেন ন-কয়, লগেপ্রভু তমারে রোক্ষ্যে গুরিবো। অন্য জাদর্ কনঅ দেবেদা কি আসিরিয়া রাজার আঢত্তুন্ তা দেজ্চান রোক্ষ্যে গুরি পাজ্যে? 19হমাৎ আর অর্পদর দেবেদাগুনে কুদু? কুদু সফর্বয়িমর দেবেদাগুনে? তারা কি মঅ আঢত্তুন্ শমরিয়াগানরে রোক্ষ্যে গুরি পাজ্যন্? 20এ দেজর বেক্ দেবেদাগুনো ভিদিরেত্তুন্ কন্না মঅ আঢত্তুন্ নিজোর দেজ্চানরে রোক্ষ্যে গোজ্যে? সালে লগেপ্রভু কেধোক্ক্যেন্ গুরি মঅ আঢত্তুন্ যিরূশালেমানরে রোক্ষ্যে গুরিবো?’ ”
21মাত্তর্ মানুচ্চুনে অলর্ গুরি থেলাক্, কনঅ জোব্ ন-দিলাক্, কিত্তে রাজা হিষ্কিয় কনঅ জোব্ দিবাত্তে তারারে মানা গোজ্যে। 22ইয়েন পরেদি রাজঘরর্ পরিচালক হিষ্কিয়র্ পুয়ো ইলিয়াকীম, রাজার লিগিয়্যে শিব্ন আর বিজগ লিগিয়্যে আসফর পুয়ো যোয়াহ তারা কাবড়ানি ফাদিনে হিষ্কিয় ইদু গেলাক্ আর রব্শাকির বেক্ কধানি তারে জানেলাক্।
Currently Selected:
যিশাইয় 36: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
