যিশাইয় 25

লগেপ্রভুর দাঙর্ কাম

1ও লগেপ্রভু, তুয়ই মর্ গোজেন; মুই তর্ বাঈনী গুরিম আর তরে নাঙ্ গিনিম। যেদক্কানি আমক্ অবার্ কাম ভালোক্ দিন আগে তুই পরিকল্পনা গোজ্যস্ সিয়েনি তুই বেক্কানি গমেডালে গোজ্যস্। 2তুই শঅরানরে শিল্ পাত্তর ভিদে বানেয়োচ্ আর দেবাল-ঘিজ্যে শঅরানরে গোজ্যস্ ভস্তর্ কুড়্। বিদেশী শত্রুগুনোর ঘরানি আর্ ন-থেবঅ; সিয়েনি কনদিন্অ আর্ বানা ন-অবঅ। 3সেনত্তে খেমতাবলা জাদ্‌তুনে তরে বাঈনী গুরিবাক‌্ আর চিৎগিলে নেইয়্যে জাদ্‌‌‌‌তুনোর শঅরানি তরে ভোক্তি গুরিনে দোরেবাক্। 4-5তুই দঅ নাঢা মানুচ্চুনোর ঘর্, অভাবীগুনোর দুঘ্ সময়োত্ ঘর, ঝড়ত্তুন্ রোক্ক্যে পেবার জাগা আর রোদো গরমত্তুন্ রোক্ক্যে পেবার ছাবা। দেবালত্ আঘাত গোজ্যে ঝড় আর ধূল্যেচর গরম ধোক্ক্যেন চিৎনপুজ্যেগুনোর নিজেসত্তুন্ তুই রোক্ক্যে গুরি থাচ্। তুই বিদেশীগুনোর কিজিক্ কাজাক্কানি থামেই দিবে। মেঘ ছাবাগানে যেবাবোত্যেগুরি গরমান কোমেই দে সেবাবোত্যেগুরি তুই চিৎনপুজ্যেগুনোর গানুন্ থামেই দিবে।

6বেগত্তুন্ খেমতাবলা লগেপ্রভু এ মুড়োবো উগুরে বেক্ জাদ মানুচ্চুনোত্তে গম্ গম্ হানা জিনিজোর আর পুরোণ আংগুর-রসর এক্কো দাঙর্ হানা দিবো ; সিয়েনত্ থেবদে বেগত্তুন্ গম্ য়েরাগান আর বেগত্তুন গম্ আংগুর-রসছান্। 7যে পদ্দাগানত্ বেক জাদর্ মানুচ্চুনে নাঢা যেইয়োন্, যে কাবড়ানে বেক জাদর্ মানুচ্চুনোরে নাঢি ফেল্যন্, এ মুড়োবোত্ তে সিয়েনি বর্‌বাত লাগেই দিবো। 8মরণানরে তে উমরত্তে ভস্ত গুরিবো। প্রভু লগেপ্রভু বেক্কুনোর চোগো পানিগান পুজি দিবো আর বেক্ পিত্‌থিমীগানত্তুন্ তা মানুচ্চুনোর অসর্মানান্ দূর গুরিবো। লগেপ্রভু এ কধাগান কোইয়্যেদে। 9সেদিন্যে মান্‌জ্যে কবাক্কে, “চঅ, ইবেয়ই আমা গোজেন; আমি তা আজায় এলং যেনে তে আমারে উদ্ধোর্ গরে। ইবেয়ই লগেপ্রভু; আমি তা আজায় এলং। এজঅ, আমি তা উদ্ধোর-কামত্তে ফুত্তি গুরিই আর হুজি ওই।”

10লগেপ্রভুর আঢ্‌‌তান এ মুড়োবো উগুরে থেবঅ। গবর সমারে যেধোক্ক্যেন্ হেরানি টেঙোই মাড়া অয় ঠিগ্ সেধোক্ক্যেন্ গুরি মোয়াবরেয়ো তে টেঙোই মাড়িবো। 11সাজুরিয়্যেবো যেধোক্ক্যেন আঢ্‌‌তানি বাবেইনে পানিত্ সাজুরে সেধোক্ক্যেন্ গুরি তারা গবর ভিদিরে আঢ্ বাবেবাক্। তারার আঢ্ বাবানার চেট্ট্যাগান মিজে অবঅ; গোজেনে তারার বাড়্‌বো গরানাগানি ভাঙি দিবো।‌ 12তে মোয়াবর্ দেবাল অজল্ ঘরানি ভস্ত গুরিবো; তে সিয়েনি মাদিত্, এমন্ কি, ধূল্যেত্ মিজেই দিবো।

Currently Selected:

যিশাইয় 25: CBT

Highlight

Copy

Compare