যিশাইয় 24
24
পিত্থিমীর ভস্ত অনা
1চঅ, লগেপ্রভু পিত্থিমীগানরে এক্কুবারে খালি গুরিবাত্যে আর ভস্ত গুরিবাত্যে যার্। তে তার্ উগুরে ভাগ্কান উল্ল্যে ফেলেইনে তা আদাম্মেগুনোরে ছিদি দিবো। 2সেদিন্যে ধর্মগুরু আর সাধারন মানুচ্চুনোর্, গিরোজ্ আর চাগরুনোর, ঘর মিলেবোর আর চাগরানিবোর, দোগানদার আর কিনিয়্যেবোর, যে উদোজ্যে টেঙা লয় আর যিবে উদোজ্যে টেঙা দে তারার আর সুদি টেঙা লোইয়্যেবোর আর সুদি টেঙা দিয়্যেবোর বেক্কুনোর অবস্থা এক্কুই অবঅ। 3পিত্থিমীগান এক্কুবারে খালি ওই পড়ি থেবঅ, সিয়েন এক্কুবারে লুদো অবঅ। লগেপ্রভু এ কধাগান কোইয়্যেদে।
4পিত্থিমীগান ন-লোজ্যে ওই যেবঅ; সংসারান্ শুগেই যেবঅ আর ন-লোজ্যে অবঅ আর পিত্থিমীর সর্মান পেইয়্যে মানুচ্চুনে আমক্ অবাক্। 5পিত্থিমীগানরে তা মানুচ্চুনে কজরা গুরি ফেল্যন্। তারা সুদোমানি অমান্য গোজ্যন; তারা সুদোমানি ভাঙ্যন্ আর লগেপ্রভুর উমরর্ সুদোম মজিম্ ন-চলন্। 6সেনত্তে এক্কান অভিশাবে পিত্থিমীগানরে গিলিবো; তা মানুচ্চুনে দুষি অবাক্। সেনত্তে পিত্থিমীর আদাম্মেগুনোরে পুড়ি ফেলা অবঅ আর খুব কম মানুচ্ বাঁজি থেবাক্। 7নুয়ো আংগুর-রস ন-থেবঅ আর আংগুর লুদিগানি শুগেই যেবঅ; যিগুনে রঙ্গ-ফুত্তি গরন্ তারা বেক্কুনে দুঘে ভঅ নিজেস্ ফেলেবাক্। 8ঝোন্ঝোনির ফুত্তি, রঅ ছাড়িয়্যেগুনোর রঅ আর বীণার হুজির গান বেক্কানি থামেব। 9তারা আর গান গেই গেই আংগুর-রস ন-হেবাক্; মদখুরুনো মুয়োত্ মদ তিদে লাগিবো। 10শঅরান ভস্ত ওই পড়ি থেবঅ। বেক্ ঘরানি বন্ধ ওই যেবঅ; ভিদিরে যার ন-যেবঅ। 11পধে পধে আংগুর-রসত্তে রঅ ছাড়ি উদিবাক্। বেক্ রঙ্গ-ফুত্তিগানির বদলে দুঘ্ অবঅ, আর পিত্থিমীত্তুন্ বেক্ রঙ্গ-ফুত্তিগানি দূর্ ওই যেবঅ। 12শঅরানি ভস্ত ওইয়্যে কুরো ধোক্ক্যেন পড়ি থেবঅ আর সে গেট্তো কট্টা কট্টা ওইনে ভাঙি যেবঅ। 13জলপাই গাজ্চুন ঝাড়া অলে পরেদি আর আংগুর তুলোনার পরেদি যেধোক্ক্যেন গাজত্ কম ফল থান্, পিত্থিমীর জাদ্তুনোর অবস্থা সেধোক্ক্যেন অবঅ।
14তারা রঅ ছাড়িবাক্ আর হুজিয়ে গান গেবাক্। তারা পোজিমেত্তুন্ দাঙর্ দাঙর্ গুরি লগেপ্রভুর মহিমাগানর্ বাঈনী গুরিবাক্। 15সেনত্তে পুগেদি মানুচ্চুনে লগেপ্রভুরে বাঈনী গোরোদোক্ আর দূর দেজর মানুচ্চুনে ইস্রায়েলর গোজেন লগেপ্রভুরে নাঙ্ গিনোদোক্। 16পিত্থিমীর শেজ্ দুযিত্তুন্ আমি এ গান্নো শুনির্, “ন্যায়বলা গোজেনর বাঈনী ওক্!”
মাত্তর্ মুই কলুং, “হায়! মুই দজাত্ পড়ি আগং, কিত্তে বেঈমানীগুনে বেঈমানী গোজ্যন্; অয়, তারা জদবদে বেঈমানি গোজ্যন্।” 17ও জগদর্ মানুচ্চুন্, তমাত্তে দর্, গাদ্ আর ফালুনে বাজ্জেই আগন্। 18যে মানুচ্চো দরে ধেবঅ তে গাদত্ পড়িবো, আর যে গাদত্তুন্ উদি এবঅ তে ফালত্ ধরা পড়িবো। আগাজত্ ফাদামাড়া অবঅ আর পিত্থিমীর গড়াগান্ গির্গিরেব। 19পিত্থিমীগান কট্টা কট্টা অবঅ, পিত্থিমীগান ভাঙি পুরিবো, পিত্থিমীগান অমকদ গির্গিরেব। 20পিত্থিমীগান মাত্তল ধোক্ক্যেন আলেব, বোইয়্যেরত্ দুলেদে ভাঙা ঘর ধোক্ক্যেন দুলিবো। তা পাপ ভারান্ তা উগুরে এদক্ অবদে যে, তে পড়িবো; তে আর কনদিন্অ উদি ন-পারিবো।
21সেদিন্যে লগেপ্রভু আগাজ উগুরে বেগত্তুন্ খেমতাবলাগুনোরে সাজা দিবো, আর পিত্থিমীত্ রাজাগুনোরে সাজা দিবো। 22জেলখানা গাদত্ যেধোক্ক্যেন গুরি বন্দিগুনোরে একসমারে রাগা অয় সেধোক্ক্যেন গুরি তারারে একসমারে রাগা অবঅ। তারারে বানি রাগা অবঅ জেলখানাত্ আর ভালোক্ দিন পরে তারারে সাজা দিয়্যে অবঅ। 23চানানে আমক্ অবঅ আর বেলানে লাজেব, কিত্তে বেগত্তুন্ খেমতাবলা লগেপ্রভু সিয়োন মুড়োবোত্ আর যিরূশালেমত্ রাজাগিরি গুরিবো, আর তার বুড়ো নেতাগুনে তার মহিমাগান দেগিবাক্।
Currently Selected:
যিশাইয় 24: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
