যিশাইয় 23
23
সোরর বিরুদ্ধে লগেপ্রভুর কধা
1সোর পৌইদ্যেনে লগেপ্রভুর কধাগান ইয়েন:
ও দাঙর্ দাঙর্ তর্শীশ-জাহাজ্ছানি, আবিলেচ্ গর, কিত্তে সোর ভস্ত ওই যেইয়্যে; সিয়েনত্ ঘরঅ নেই, বন্দর্অ নেই। সাইপ্রাস দ্বিবোত্তুন্ তুমি এ হবরান্ পেইয়ো।
2ও সাগর পার মানুচ্চুন্, ও সীদোনর বেপারিগুন্, তুমি অলর্ অ। তমা নাবিক্কুনে সাগর পার ওই যেদাক্। 3শীহোর গাঙর্, অত্তাৎ য়েল্ গাঙ পারর্ শোজ্যগানি দাঙর্ সাগর উগুরেদি এদঅ; সোরর আয় এলদে সে গাঙ পারর্ খেত-খেত্তিগানি, আর সোর ওই উদিলোদে বেক্ জাদ্তুনোর বাজার।
4ও সীদোন, লাজেস্, কিত্তে সাগর, সাগরর্ ঘরানে এ কধাগান কত্তে,“মর্ পুয়ো-পুদেবাত্তে পীড়েয়ো ন-অয়, মুই জর্ময়ো ন-দুয়োং। মুই পুয়োগুনোরে মানুচ্অ ন-গরং আর মিলেগুনোরে দাঙর্ ন-গরং।” 5মিসরত্ এ হবরান্ গেলে পরেদি মিসরীয়গুনে সোরর হবরান্দোই মনত্ দুঘ্ পেবাক্।
6ও সাগর পার মানুচ্চুন্, আবিলেচ্ গরঅ; তুমি পার্ ওইনে তর্শীশোত্ যঅ। 7ইয়েন কি তমার্ সেই ফুত্তি গুরিবার শঅর্, সেই পুরোণ, অমকদ পুরোণ শঅর্, যিগুনোর মানুচ্চুনে দূর্ দেজত্ বজত্তি গুরিবাত্তে যেদাক্? 8যে সোর অন্যগুনোর মুকুট পিনেদ, যিবের বণিককুনে রাজপুরুষ আর বেবসায়ীগুনে পিত্থিমীত নাঙ্-গোজ্যে, তা বিরুদ্ধে কন্না এ পরিকল্পনাগান গোজ্যে? 9তার বেক্ দেমাগ্কানে ভস্ত গুরিবাত্তে আর পিত্থিমীর নাঙ-গোজ্যে মানুচ্চুনোরে তলে ফেলেবাত্তে বেগত্তুন্ খেমতাবলা লগেপ্রভু এ পরিকল্পনাগান গোজ্যে।
10ও তর্শীশোর মানুচ্চুন্, য়েল্ গাঙর পানিগান যেবাবোত্যেগুরি পারানি ভাঙি যায় সেবাবোত্যেগুরি তুমিয়ো দেজত্ ছিদি পড়; তমারে আক্সোই রাগাইদ্যে ধোক্ক্যেন আর কনজন নেই। 11লগেপ্রভু বড়্ সাগর উগুরে তা আঢ্তান বাবেই দিয়্যে আর রেজ্যগানিরে ভূজোল ধোক্ক্যেন গোজ্যে। তে কনান দেজ পৌইদ্যেনে এক্কান উগুম জারি গোজ্যে যেনে তার ঘরানি ভস্ত গরা অয়। 12তে কোইয়্যেদে, “ও সীদোনর মানুচ্চুন্, তমার্ ফুত্তিগানি থুম্ ওইয়্যে, কিত্তে তুমি দঅ অত্যেচারিত ওইয়ো। উদো, পার্ ওইনে সাইপ্রাস দ্বিবোত্ যঅ; সিদুয়ো তুমি জিরেন্ ন-পেবা।”
13বাবিল দেজ্ছান ইন্দি রিনি ছঅ; এক সময়োত্ তা মানুচ্চুনো পৌইদ্যেনে কনজনে হবর্ ন-পেদাক্। আসিরিয়গুনে বাবিলানরে ধূল্যেচর-চাগালার পরাণবলাগুনোর জাগা বানেয়োন, মাত্তর্ বাবিলীয়গুনে সোররে আক্রমণ গুরিবাত্তে চুগিদার-ঘর ধোক্ক্যেন অজল্ অজল্ রথ বানেয়োন, তার দাঙর্ দাঙর্ ঘরানি লুদেয়োন আর তারে এক্কান ভস্তর্ কুড়্ বানেয়োন।
14ও দাঙর্ দাঙর্ তর্শীজ-জাহাজ্ছানি, তুমি আবিলেচ্ গরঅ, কিত্তে তমা আশ্রয়-বন্দরানি ভস্ত ওই যেইয়্যে।
15সে সময়োত্ এক্কো রাজার জিংকানিগান, অত্তাৎ সত্তুর্ বজরত্তে সোররে ভুলি যাহ্ পুরিবো। মাত্তর্ সে সত্তুর্ বজর শেজত্ বেশ্যে মিলের গান ধোক্ক্যেন সোরর অবস্থা এ বাবোত্যে অবঅ:
16ও ভুলি যেইয়্যে বেশ্যে মিলে,
বীণালোই শঅরত্ আঢি আঢি বেড়া।
গমেডালে বীণা বাজা;
ভালোক্কুন গীদ্ গাহ্ যেনে তরে আরঅ ইদোত্ রাগা যায়।
17সত্তুর্ বজর পার্ ওই যানার্ পরেদি লগেপ্রভু সোর ইন্দি মনান্ দিবো। সেক্কে তে তার বেবসা কামত্ ফিরি যেইনে পিত্থিমীর বেক্ রেজ্যগানি লগে বেবসা চালেব। 18মাত্তর্ তার লাভ আর আয় লগেপ্রভুর নাঙে যুদো গুরি রাগা অবঅ; সিগুন জোমেই রাগানা বা থুবোনা ন-অবঅ। যিগুনে লগেপ্রভু মুজুঙোত্ আঢাউদো গরদন্ তারার্ হানা-দানাত্তে আর দোল্ দোল্ কাবড়-চুগোরত্তে তার সে লাভ্পুন খরচ্ গরা অবঅ।
Currently Selected:
যিশাইয় 23: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
