যিশাইয় 22
22
যিরূশালেম পৌইদ্যেনে লগেপ্রভুর্ কধা
1দর্শন-কলগ পৌইদ্যেনে লগেপ্রভুর কধাগান ইয়েন:
তর্ ইক্কিনে কি ওইয়্যেদে যে, তর্ বেক মানুচ্চুনে ছাল উগুরে উঠ্যন্? 2ও যাগুলুগে ভরা শঅরান্, ও কোজ্যে বাজেয়্যে আর রঅ ছাজ্যে শঅরান্, তঅ মরা মানুচ্চুনে দঅ তলোয়ার আঘাতে ন-মরন্ বা যুদ্বোত্অ ন-মরন্। 3তঅ নেতাগুন বেক্কুনে একসমারে ধেই যেইয়োন্; ধনু বেবহার ন-গুরিনে তারারে ধরা ওইয়্যে, যুনিয়ো তারা দূরোত্ ধেই যেইয়োন্ তো তারারে বেক্কুনোরে একসমারে বন্দী গুরিনে নেযা ওইয়্যে। 4সেনত্তে মুই কলুং, “মঅ কায়-কুরেত্তুন যগোই; মরে যদবদে কানিবাত্তে দুয়ো। মঅ মানুচ্চুন ভস্ত ওইয়োন বিলিনে মরে বুঝেবার চেষ্ট্যা ন-গোজ্জ্য।”
5বেগত্তুন্ খেমতাবলা প্রভু লগেপ্রভুত্তুন্ দর্শন-কলগত্ অমকদ দর্গরেপারা, টেঙোই মাড়িবার আর যাগুলুগোর এক্কো দিন এচ্চ্যে। সিবে দেবালান্ ভাঙি ফেলেবার আর মুড়ো-মুড়ি ইদু কানিবার্ এক্কো দিন। 6এলমর মানুচ্চুনে সেল্ থবার্ কাল্লোঙো তুলি নেযেয়োন; তারা সমারে রথ আর ঘড়া চালেয়্যেগুনোর দল্লো আঘে। কীরোর মানুচ্চুনে ঢাল্লোই যুক্কোল্ ওইয়োন। 7তর্ বেঈ লোইয়্যে কলগ্কানি রথ্তোই ভুরি যেইয়্যে, আর শঅর-গেট্তুনোত্ ঘড়াগুনোরে যুক্কোল্ রাগা ওইয়্যে। 8যিহূদার রোক্ক্যের্ বেবস্থাগান দূর গরা ওইয়্যে।
সেদিন্যে তুমি ঝার-কুটিরোর্ আত্যেরানি উগুরে বিশ্বেজ্ গোজ্য। 9তুমি দায়ূদ-শঅরর্ দেবালানি ভিদিরে বোউত্ ফাদামারা দেখ্য আর তলেদি পুয়োরো পানিগান জোমেয়ো। 10তুমি যিরূশালেমর ঘরানি গুণ্য আর দেবালানি দরমর গুরিবাত্তে সিয়েনি ভাঙ্য। 11পুরোণ পোরো পানিগান রাগেবাত্তে তুমি দি দেবাল সংমোধ্যে এক্কান জাগা বানেয়ো। মাত্তর্ যিবে এ অবস্থাগান ঘোদেয়্যে তুমি তান্দি ন-চেলা, বা ভালোক্ দিন আগে যিবে এ বেক্কানি পরিকল্পনা গোজ্যে তা উগুরে তমার্ ভোক্তি ন-এলঅ।
12সেদিন্যে বেগত্তুন্ খেমতাবলা প্রভু লগেপ্রভু কানিবার্ বা আবিলেচ্ গুরিবাত্তে, মাঢাবো চুলানি মুড়েবাত্তে আর বস্তা পাদা পিনিবাত্তে তমারে ডাক্ক্যে। 13মাত্তর্ চঅ, সিয়েনত্ রঙ্গ ফুত্তি আর রঅ রঅ ছঅ ছঅ চলের্, আর গোরু ভেড়া কাবিনে আহ্ য়েরা আর আংগুর-রস হানা চলের্। তুমি কত্তে, “এজঅ, আমি হানা-দানা গুরিই, কিত্তে কেল্যে আমি মুরি যেবং।”
14বেগত্তুন্ খেমতাবলা প্রভু লগেপ্রভু মঅ ইদু এ কধাগান ফগদাং গোজ্যে, “ তমার্ মরণ সময়োত্অ এ পাপ্পান খেমা গরা ন-অবঅ। মুই বেগত্তুন্ খেমতাবলা প্রভু লগেপ্রভু এ কধাগান কঙর্।”
15বেগত্তুন্ খেমতাবলা প্রভু লগেপ্রভু কোইয়্যেদে, তুই রাজার সেই ভান্ডারীবো ইদু, রাজঘরর্ ভারান্-পেইয়্যে শিব্নর ইদু যেইনে কঅ, 16তুই ইদু কি গরর্? আর ইদু নিজোর গোরান্ কুড়িবাত্তে, অজল্ জাগাত তঅ গোরান্ ঠিগ্ গুরিবাত্তে, মুড়ো কাবিনে জিরেবার-জাগায়ান্ বানেবাত্তে কন্না তরে অধিকার দিয়্যে?
17উজিয়ার্, ও বোলী মানুচ্চো, লগেপ্রভু তরে দরমর গুরি ধুরিনে মেলা মারিবাত্তে যার্। 18তে তরে দরমর গুরি গুজেইনে বল ধোক্ক্যেন্ গুরি এক্কান দাঙর্ দেজত্ ফেলেই দিবো। সিয়েনত্ তুই মুরি যেবে, আর তর্ দোল্ দোল্ রথ্তানি সিয়েনত্ পড়ি থেবঅ। তুই তঅ গিরোজ্সো রাজঘরান অসর্মান গোজ্যস্। 19তঅ পোজিশনানত্তুন্ মুই তরে সোরেই দিম্; তঅ জাগানত্তুন্ তরে তলেদি লামেই দিয়্যে অবঅ।
20“ ‘সেদিন্যে মঅ চাগর্বো হিল্কিয়োর পুয়ো ইলীয়াকীমরে মুই ডাগিম্। 21তারে মুই তঅ পোজাক্কান উরেই দিম্ আর তঅ কাম ভারান তা আঢত্ তুলি দিম্। তে যিরূশালেমর আদাম্মেগুনোর আর যিহূদা বংশর বাব ধোক্ক্যেন অবঅ। 22তা কানাত্ মুই দায়ূদো বংশর চাবিগান রাগেম; তে যিয়েনি খুলিবো সিয়েনি কনজনে নাঢি রাগেই ন-পারিবো, আর যিয়েনি বন্ধ গরে সিয়েনি কনজনে খুলি ন-পারিবো। 23এক্কান দরমর জাগাত্ মুই তারে খুদো ধোক্ক্যেন গুরি লাগেই দিম্, তা বাব বংশবোত্তে তে অবদে এক্কান সর্মানর মানুচ্। 24তা বংশবোর বেক্ কামানি তা কানাত্ থেবঅ। নানান্ বাবোত্যে চিগোন-চাগন্ পিলে যেধোক্ক্যেন খুদোত্ দুলোন সেধোক্ক্যেন তার ঝি-পুয়োগুন আর বংশধরুন তা কানাত্ দুলি দুলি থেবাক্। 25যে খুদোবো দরমর জাগাত্ লাগেই দিয়্যে ওইয়্যে সেদিন্যে সিবে খুলি এবঅ; সিবে পড়ি যেবঅ আর তা উগুরে যে ভারান্ দুলি দুলি আঘে সিয়েন কাবি ফেলা অবঅ।’ ” ইয়েন অলঅ বেগত্তুন্ খেমতাবলা লগেপ্রভুর কধা। ইয়েনি ঘুদিবো, কিত্তে লগেপ্রভু নিজেই সিয়েনি কোইয়্যে।
Currently Selected:
যিশাইয় 22: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
