যিশাইয় 21
21
বাবিলো বিরুদ্ধে আগাম্ কধা
1ধূল্যেচর-দাঙর্ সাগর পৌইদ্যেনে আগাম্ কধা:
নেগেভত্ যেবাবোত্যে গুরি তুঠ্যে বোইয়্যের্ বেঈ যায় সেবাবোত্যেগুরি ধূল্যেচর-চাগালাত্তুন্, সেই দর্গরেপারা দেজ্ছানত্তুন্ এক্কান দজা এজের্। 2এক্কান দর্গরেপারা দর্শন মরে দেগা ওইয়্যে-বেঈমান্নো বেঈমানি গোজ্যে, আর লুদেয়্যেবো লুদেয়্যে। ও এলম, আক্রমণ গর্; মাদিয়া, ঘিরি ফেলা। বাবিলে যেদক্কানি দুঘ্-কষ্ট ঘোদেয়্যে সিয়েন মুই বন্ধ গুরি দিম্।
3মুই পেট সুলোনিলোই অমকদ দুঘ্ পাঙর্, মিলেগুনোর পুয়ো পুদোনা ধোক্ক্যেন পিড়েয় মরে ধোজ্যে। মুই এমন্ পিড়ে পাঙর্, ন-শুনোঙর্ এমন্ দরাঙর, ন-দেগঙর্। 4মঅ মনান্ ধুক্ ধুক্ গরের্; অমকদ দর্ বুগ লাগিনে যারকাদা ছারি উদোন্। যে সাজোন্যেগানত্তে মুই বাজ্জেই থেদুং সিয়েন ইক্কিনে মইদু দর্গরেপারা ওইয়্যে।
5তারা হানা সাজাদন্, পাদি বিজাদন্ আর হানা-দানা গত্তন্। ও সেনাপতিগুন, উদো, ঢালত্ তেল বাজেই দো।
6প্রভু মরে কোইয়্যে, “তুই যেইনে এক্কো চুগিদার্ নেযা। তে যিয়েনি চেবঅ সিয়েনির হবর্ যেন তে দে। 7তে যেক্কে জড়া জড়া ঘড়া চালেয়্যে দেগিবো আর গাধা বা উদো পিদোত্ চোজ্যে মানুচ্চুনোরে দেগিবো, সেক্কে যেন তে উজিয়ার্ অয়, যদবদে উজিয়ার্ অয়।”
8সেক্কে সেই চুগিদার্বো রঅ ছাড়িনে কবঅ, “ও মর্ প্রভু, দিনকে দিন অজল্ চুগিদার-ঘরত্ মুই থিয়্যেই থাং; মুই পত্তি রেদোত্ মর্ চুগি দেদে জাগানত্ থাং। 9চঅ, জড়ায় জড়ায় ঘোড়া চালেয়্যে এজদন্।” সে পরেদি তে কবদে, “বাবিলোর পতন ওইয়্যে, পতন ওইয়্যে। তার বেক্ দেবেদাগুনোর মূত্তিগুন্ চুরমার ওইনে মাদিত্ পড়ি আগন্।”
10ও মঅ মানুচ্চুন্, খেত-খেত্তি ধোক্ক্যেন্ তমারে দঅ মাড়া ওইয়্যে। বেগত্তুন্ খেমতাবলা লগেপ্রভু ইত্তুন্, ইস্রায়েলর গোজেন ইত্তুন্ মুই যিয়েনি শুন্ন্যং সিয়েনি তমারে জানেলুং।
ইদোম বিরুদ্ধে আগাম্ কধা
11দূমা, অত্তাৎ ইদোম পৌইদ্যেনে আগাম্ কধা ইয়েন;
সেয়ীরত্তুন্ কনজনে মরে ডাগিনে কলঅ, “চুগিদার্বো, রেত্তো আর কদক্কন্ আঘে?”
12চুগিদার্বো জোব্ দিলো, “বেন্যেমাদান পহ্র ওই এজের্, মাত্তর্ সে পরেদি রেদ্অ এজের্। যুনি আরঅ পুজোর্ গুরিবার চাজ্ সালে ফিরি এইনে আরঅ পুজোর্ গর্।”
আরব বিরুদ্ধে আগাম্ কধা
13আরব পৌইদ্যেনে আগাম্ কধা ইয়েন:
ও দদানীয় যেইয়্যে দল্লো, তুমি যিগুনে আরবর্ ধূল্যেচর-চাগালাত্ তাম্বুল টাঙ, 14তুমি পানি তিরেস্ পেইয়্যে মানুচ্চুনোত্তে পানি আন। ও টেমা দেজর্ আদাম্মেগুন্, তুমি ধেই যেইয়্যে মানুচ্চুনোত্তে হানা আন। 15তারা তলোয়ার মুজুঙেত্তুন্, খুলো তলোয়ার মুজুঙোত্তুন্, বেঙা ধনু মুজুঙোত্তুন্ আর দর্গরেপারা যুদ্ধোর মুজুঙোত্তুন্ ধেই যাদন্।
16প্রভু মরে কোইয়্যেদে, “চুক্তি গোজ্যে চাগরে যেধোক্ক্যেন্ বজরুন গুণোন্ সেধোক্ক্যেন গুরি ঠিগ্ এক বজর ভিদিরে কেদরর বেক্ সয়সাগজ্যেগানি থুম্ ওই যেবঅ। 17কেদরর ধনুবলা যোদ্ধোগুনো ভিদিরে কয়েক্কো মান্জ্যে বাঁজি থেবাক্। ইস্রায়েলর গোজেন লগেপ্রভু এ কধাগান কোইয়্যে।”
Currently Selected:
যিশাইয় 21: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
