Revelation 7
7
CHAPTIR SEEVEN.
The Saunts are sealed: “Wha are they in white attire?”
1Eftir thir things I saw fowr Angels staunin on the fowr corners oʼ the yirth, haudin siccar the fowr wins oʼ the yirth, that nae winʼ soud blaw on the yirth, or on the sea, or on ony tree.
2And I saw anither Angel come up frae the sunrisin, haein the seal oʼ the leevin God, and he cryʼt oot wiʼ a soondin voice to the fowr Angels to wham it was gien to bring skaith on the yirth and the sea,
3Sayin, “Ye maunna skaith the yirth, nor the sea, nor the trees, to we hae sealʼt the servants oʼ oor God on their broos.”
4And I heard the number oʼ thae sealʼt: a hunner and forty‐fowr thoosand; sealʼt oot oʼ every #7:4 We ken‐na why Dan is left oot in this list. Some think Dan had clean gane ower to eidols (see Judges xviii. 30, 31), and was nae mair to be coontit as Israʼl. We haud‐na wiʼ Grotius, that the tribe was extinct.tribe oʼ the sons oʼ Israʼl.
5Oot oʼ Judahʼs tribe, twalʼ thoosand sealʼt; oot oʼ Reubenʼs tribe, twalʼ thoosand; oot oʼ Gadʼs tribe, twalʼ thoosand;
6Oot oʼ Asherʼs tribe, twalʼ thoosand; oot oʼ Naphaliʼs tribe, twalʼ thoosand; oot oʼ Manassehʼs tribe, twalʼ thoosand.
7Oot oʼ Simeonʼs tribe, twalʼ thoosand; oot oʼ Leviʼs tribe, twalʼ thoosand; oot oʼ Issacharʼs tribe, twalʼ thoosand;
8Oot oʼ Zabulonʼs tribe, twalʼ thoosand; oot oʼ Josephʼs tribe, twalʼ thoosand; oot oʼ Benjaminʼs tribe, twalʼ thoosand sealʼt.
9Eftir this I lookit, and see! an unco number, that nae man could tell, oot oʼ aʼ nations and kith, and folk, and speech, stude afore the Thron, and fornent the Lamb, dinkʼt in white, wiʼ palms iʼ their hauns.
10And cryʼt oot heigh, “Salvation to oor God, wha sits on the Thron, and to the Lamb!”
11And aʼ the Angels war stannin iʼ the compass oʼ the Thron, and roond‐aboot the Elders and the fowr leevin‐anes; and fell doon afore the Thron on their faces, worshippin God,
12And quoʼ they, “Eʼen sae: Blessin, and glorie, and wisdom, and giean oʼ thanks, and honour, and pooer, and micht be to oor God, for evir and evir mair!”
13And ane oʼ the Elders answerʼt, and quoʼ he tae me, “Wha are thir, buskit aʼ in white? and whaur cam they frae?”
14And quoʼ I tae him, “My lord, ye ken!” And quoʼ he tae me, “Thir are the anes that cam oot oʼ sair and unco tossins‐aboot, and hae made their cleedin white iʼ the blude oʼ the Lamb.
15“Sae are they iʼ the presence oʼ the Thron oʼ God, and serʼ him day and nicht in his Temple: and the Ane that sits on the Thron sal unfauld his tent ower him.
16“And they sal hunger nae mair, and gang drouthie nae mair; nor sal the sun smite them, nor ony heat‐blast.
17“For the Lamb frae the mids oʼ the Throne sal herd them, and sal airt them to the watirs oʼ the waal‐ee oʼ Life; and God sal dicht awaʼ ilka tear frae their eʼen!”
Currently Selected:
Revelation 7: SCO1904
Highlight
Copy
Compare
Share
Want to have your highlights saved across all your devices? Sign up or sign in
Translated by Rev William Wye Smith. Published in Paisley, Scotland in 1904.
