1 Thessalonians 3
3
CHAPTIR THRIE.
Timothy, haen been till Thessalonica, and back again, gars Paul rejoice.
1And sae whan we could nae langʼer lat‐be, we war well‐pleased to be left in Athens alane,
2And sent Timothy, oor brither and Godʼs servant iʼ the Gude‐word oʼ Christ, to gar ye staun siccar, and comfort ye iʼ yere faith.
3Sae that nae ane soud be dauntit by their afflictions; for ye ken yersels that we war appointit for the same.
4For eʼen whan we war wiʼ ye, we tellʼt ye afore, that we soud dree afflictions; eʼen as it cam aboot, and ye ken.
5And for this cause, nae mair happin ower my fainness, I sent to ken oʼ yere faith, least by ony means the tempin‐ane had tempit ye, and oor toil soud be aʼ in vain!
6But noo Timothy, comin to us frae you, feshin us gude word oʼ yere faith and love, and that ye kindly hae mind oʼ us at aʼ times, bein unco fain to see us, eʼen as we are fain to see you, —
7For this cause we are comfortit, brethren, oʼ ye, as to aʼ oor distress and affliction, by yere faith:
8For noo we hae life in us, gin ye staun steive iʼ the Lord.
9For whatna thanksgivin cam we gie to the Lord anent ye, for aʼ the joy we rejoice wiʼ afore oor God, because oʼ you;
10Nicht and day, wiʼ unco abundance, makin petition for the behauldin oʼ yere faces, and makin perfete the things that are wantin iʼ yere faith?
11But, may it be, that oor God and Faither himsel, and oor Lord Jesus Christ, airt oor way tʼye!
12That the Lord may mak ye to increase, and be unco abundin in yere love ane to anither, and to aʼ men; eʼen as wiʼ us towards you,
13For the up‐biggin oʼ yere hearts, to be wyteless in holiness, afore oor God and Faither, at the presence oʼ oor Lord Jesus wiʼ aʼ his saunts.
Currently Selected:
1 Thessalonians 3: SCO1904
Highlight
Share
Copy
Want to have your highlights saved across all your devices? Sign up or sign in
Translated by Rev William Wye Smith. Published in Paisley, Scotland in 1904.
