SALM 37
37
Miṭhalo Hna le Miṭha Hna Donghnak
David Hla
1Miṭhalo hna ruangah
awlokchong in um hlah,
ṭhat lonak a tuahmi kha
hngar hna hlah;
2a romi ramkung bantukin an lo lai i
belhhring bantukin an uai lai.
3 Bawipa cu i bochan u law ṭhatnak kha
tuah u;
ram chungah hin um u law him tein
khuasa u.
4 Bawipa kha i bochan u law
nan lungthli tum kha
an pek hna lai.
5Na nunnak kha Bawipa pe tuah,
amah kha i bochan law amah nih
an bawmh lai.
6Na ṭhatnak kha ceunak bantukin
a ceuter lai i
na dinnak kha chunlai bantukin
a ceuter lai.
7 Bawipa hmaiah cun dai tein um ko law
zeidah a tuah lai ti kha lungsau in
hngak ko;
thil ṭhalo an i tinhmi a tuah kho
lengmangmi hna le
an rian ṭuannak ah a hlawh
a tlingmi hna kong ah
zei poi loin va um ko.
8Thinhung in um hlah u, hrut sual
hlah u!
Lung rethei in um hlah u!
Cu nih cun zeihmanh
an ṭhathnem hna lai lo.
9 Bawipa aa bochanmi cu him tein
ram chungah hin an um ko lai;
sihmanhsehlaw miṭhalo cu
ṭhawl an si lai.
10Luklak ah miṭhalo cu an lo ko lai,
na kawl hna hmanh ah
na hmu kho hna lai lo.
11Sihmanhsehlaw mi toiah aa dormi cu
ram chungah hin him tein
an um lai i
daihnak kha tlamtling tein
an hmuh lai. #Mat 5.5
12Miṭhalo nih miṭha hrawhnak ding
khua kha a khan i
a hacang a rialhnawh.
13Sihmanhsehlaw Bawipa nih cun
miṭhalopa cu a nihsawh men ko,
zeicahtiah luklak ah a rawh lai kha
a hngalh.
14Miṭhalo nih cun an nam kha an i zuh i
an likuk kha an i hruai i
sifak le retheimi kha thah le
miṭha mi nawn kha an duh;
15sihmanhsehlaw anmah nam lila nih
an keng ah a chunh hna lai i
an likuk cu an kiak dih lai.
16Miṭha nih a ngeihmi thil tlawmte cu
miṭhalo nih a khonmi thil tampi
nakin a ṭha deuh;
17zeicahtiah miṭhalopa cu Bawipa nih
a thazang a chuh lai i
miṭha cu a huhphenh lai.
18 Bawipa nih a nawl a zulmi cu
a zohkhenh hna i
ram cu anmah ta a si zungzal lai.
19Caan ṭhalo a tlun tikah sifah
an ing lai lo,
mangṭam a tlun tikah ei awk a za
an ngei lai.
20Sihmanhsehlaw miṭhalo cu an thi lai;
Bawipa ral cu ramlak pangpar
bantuk in an lo lai;
meikhu bantukin an ṭian lai.
21Miṭhalo nih cun thil a cawi hna tikah
a cham ṭhan ti hna lo,
sihmanhsehlaw miṭha cu
vel a ngei i nun a siang.
22 Bawipa nih thluachuah a pekmi cu ram
ram chungah hin him tein
an um lai,
sihmanhsehlaw chiat a serhmi cu
ṭhawl an si lai.
23Minung hi a kalnak ding lam
a hmuhsaktu cu Bawipa a si,
Amah duhnak a tuahmi cu
a huhphenh hna.
24A tluk sual zongah a ril lan lo,
zeicahtiah Bawipa nih a kut in
a thawh ṭhan.
25Ka rak no i atu cu ka tar cang,
asinain hi vialte chungah hin
miṭha cu
Bawipa nih a hlawt kha
ka hmu bal lo i
a fale zong rawl hal in an vah kha
ka hmu bal lo.
26Siang tein mi kha a pek zungzal hna i
a coih zungzal hna,
cun a fale kha thluachuahnak an si.
27Ṭhat lonak kha mertak u law ṭhatnak
kha tuah u;
cun hi ram chungah hin
nan um zungzal lai;
28zeicahtiah a hmaanmi thil kha
Bawipa nih a duh i zumhtlak a simi
a mi kha a kaltak bal hna lo.
Annih cu a huhphenh zungzal hna,
sihmanhsehlaw miṭhalo mi hna
an tefa cu ṭhawl an si lai.
29A dingmi cu ram chungah him tein
an um lai i
ram cu zungzal in anmah ta a si lai.
30Mifim nih cun fimnak bia an chim i
ahmaanmi bia kha an ka in a chuak.
31A Pathian nawlbia kha
a lung chungah aa chiah i
zeitikhmanh ah a kaltak lo.
32Miṭhalo nih cun miṭha kha
aa ngiat aa ngiat i thah a zalh;
33sihmanhsehlaw Bawipa nih a ral kut
chungah khan miṭha cu a kaltak lo,
tazacuai a si zongah khan
sual phawtnak a phakter lo.
34 Bawipa cu i bochan u law a nawl kha
zul tuah u;
ram kha co awkah thazang
an pek hna lai i
miṭhalo cu pawnchuah an si kha
nan hmuh lai.
35Miṭhalopa pakhat, mipuarhrang ngai
a si i
Lebanon sidar thingkung bantukin
mi vialte a iap dih hna kha
ka rak hmuh;
36sihmanhsehlaw tlawmpal ah khin
cuka ah cun ka va kal ṭhan i
cu pa cu a rak um ti lo;
ka kawl len nain ka hmu kho ti lo.
37Miṭha khi zohhmanh u, miding khi
zohhmanh u;
daihnak mi cu tefa an ngei;
38sihmanhsehlaw misual cu hrawh
an si dih,
an tefa cu hloh an si.
39 Bawipa nih miding cu a khamh hna i
harnak caan ah a huhphenh hna.
40A bawmh hna i a chuah hna;
annih nih huhphenhnak hmuh
awkah an fuh caah
miṭhalo hna kut chung khan
a khamh hna.
Currently Selected:
SALM 37: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
