PHUNGTHLUKBIA 5
5
1Ka fapa, ka fimnak kha ṭha tein
i ngaih law
lungthin kan cheuhmi kha ṭha tein
na hna chi tuah;
2Ruahthiamnak kha na ngei kho lai i
na chimmi cu hngalhnak in
chimmi a si lai.
3Nu zuangzam hmur in khuaihliti dor
an tla i
a biachimmi cu chiti nakin
a nal deuh.
4Sihmanhsehlaw a donghnak ah cun
anfangkha bantukin a kha i
kap hnih har nam bantukin a har.
5A ke cu thihnak ah an vung kal i
a kehlan cu Sheol lei lam kha
an zul;
6Nunnak lei lam kha zei ah a rel lo;
a lam cu a kenkip ah an vak i
cucu a hngal lo.
7Atu cu, ka fapa, ka bia kha ngai law
ka kaa chung chuak bia hi
zeirel lo in um hna hlah.
8Nu zuangzam kha lamhlat piin
hrial law a inn innka pawngah
va kal hlah.
9Hmaizahnak na hmuhmi kha midang
mithmuh ah na thlau sual lai i
zaangfahnak ngei lomi hna sinah
na upatnak kha na hloh sual lai;
10Ramdangmi kha na ṭhawnnak in
an khim sual lai i
na rianṭuanmi man cu na hngalh lomi
miding innchungkhar sinah a kal
sual lai;
11A donghnak ah cun rawlṭam in
na um lai i
na ruh lawngin khua na sa lai.
12Khi tikah naa thawh lai i, “Zeicahdah
chimhhrinnak kha ka rak huat i
mawhchiatnak kha ka lung nih
a rak duh hnga lo.
13Ka sayate aw kha ka rak ngai lo i
a ka cawnpiaktu hna an bia kha
zei ah ka rak rel hna lo.
14Aa pummi mibu chungah khan,
minchiatnak ka rak hmu ciaomau
ko lo mei?” na ti lai.
15Nangmah tikuang ti te ding law
na tikhor chungin a luangmi
ti te kha ding tuah.
16Na tiput hna cu a kenkip ah
ṭhekter hna hlah law
khualak lam ah tiva cu
i ṭhek hna hla seh.
17Annih cu nangmah ca lawngah
si ko hna seh,
na sin i a ummi khual hna caah cun
si chih hna hlah seh.
18Na tikhor cu thluachuahnak
hmu seh law
na tlanval lio i na nupi ah khan
i lawm ko;
19Amah cu sazuk duhnung ngai le
aa dawhmi sakhi
bantuk a si;
a hnuk nih cun zeitik paoh ah na lung
in riamhter seh law
a dawtnak nih cun in lawmhter
zungzal ko seh.
20Ka fapa, zeicahdah mi zuangzam cu
na duh i nu ralṭha cu na pom?
21Zeicahtiah mi nih a zulhmi
a lam vialte cu Bawipa nih
a hmuh dih ko i
Bawipa nih cun a lam vialte cu
a zoh dih ko.
22Miṭhalo cu amah ṭhat lonak ah
aa foih i
a sual rianṭuannak ah khan a tang.
23Chimhhrinnak a um lo caah a thi i
a hruhnak a ngan caah a tlau.
Currently Selected:
PHUNGTHLUKBIA 5: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
