PHUNGTHLUKBIA 6
6
Thathut le Lihchim A Ṭhat Lonak
1Ka fapa, na innpa caah biahrennak i
na can i
Khualpa caah aamahkhannak
na tuahpiak i
2aa bia chimmi ah naa foih i na kaa in
a chuakmi bia ah na tan ahcun,
3Khi tikah, ka fapa, nangmah cu
na innpa kut chungah
na tlak cang caah
Mah hihi tuah law i khamh tuah:
Khulrang in va kal law mipa cu
va nawl hranhram ko.
4Na mit cu ihter hlah, na mit cuar
zong cu hngilhter hlah;
5Sakap kut chungin sazuk a luat
bantuk le mihriam kut chungin
vate a luat bantukin
nangmah kha i khamh tuah.
6Maw zaangthupa, hngerhte sinah
khin va kal tuah;
an umtuzia khi va ruat hna law
fimnak i lak tuah.
7Bawi le upa le uktu zeihmanh
an ngei lo nain,
8Ṭhal caan ah an rawl kha a timh hna i
rawl ṭuan caan i an i cawmnak ding
kha an pumh an khawmh hna.
9Maw zaangthupa, zei can dah
na ih ko lai?
zeitik ah dah na ihnak in
na thawh lai?
10Tlawm tein it ko rih ning, tlawm tein
i hngilh ko rih ning,
ka kut cu i dinh awkah tlawm tein
i sih ko rih ning,
na ti lengmang caah. #Phut 24.33-34
11Pamnak nih mifir bantukin
an tlunhnawh lai i
herhbaunak nih hriamnam aa putmipa
bantukin an chuahhnawh lai.
12Hrokhrawl bia he aa chawkmi cu
mizeiruaramlo, miṭhalo an si;
13An mit kha an ṭheh depmap i
an ke in bia an chim i
an kutdong in an sawh i
14An lungthin a kawi caah ṭhat lonak
khua kha an khan lengmang i
rem lonak thlaici kha an tuh
thluangthluan;
15Cucaah chikkhatte ah ṭhat lonak nih
a tlunhnawh hna lai i
damter khawh ti loin an rawk lai.
16 Bawipa nih a huatmi thil paruk a um,
A fihmi thil pasarih an um:
17Porhlawtnak mit,
lihchim hmangmi lei,
a sual lomi thisen chuahtu kut,
18Ṭhat lonak khua a khangtu lungthin,
ṭhat lonak lei i khulrang in
a tlimi ke,
19Lih a chim lengmangmi tehte le
U le nau karlak i rem lonak thlaici
a tuhtu.
Mah Ta A Si Lomi Sin Ṭhat Lonak
20Ka fapa, na pa nawlbia kha
zul hna law
na nu cawnpiaknak kha
hlaw hna hlah:
21Na lung ah i hren chih
zungzal hna law
na hngawng ah i khih hna.
22Na kal tikah an in hruai lai,
na ih tikah an in ven lai,
naa hlauh tikah
bia an in ruah lai.
23Zeicahtiah nawlbia cu meiinn a si i
cawnpiaknak cu ceunak a si,
24Chimhhrinnak cu nu ṭhalo sinin
na him nakhnga ding caah le
nu ralṭha lei nal sinin khamh
na si nakhnga ding caah a si.
25Aa dawhnak cu na lung chungin
duh hlah,
a mithmul nih nangmah cu
in hreng hlah seh;
26Zeicahtiah hlawhhlangnu cu
changreu hlum khat in
hlan khawh a si ko,
sihmanhsehlaw a va cungin
pa aa duhmi nih cun
mipa nunnak hrimhrim kha
tlaih aa tim.
27Mi nih a puan kang loin a ṭang ah
meiṭil kha a pom kho maw?
28Asiloah a linmi meiṭil cungah
a ke duah loin aho tal
a kal khomi an um maw?
29Cu bantuk cu a innpa nupi sin i
a va kalmi cu a si;
Ahohmanh amah a tawngtu cu
dantat loin an luat lai lo.
30Mifir nih a rawl a ṭam tikah
a rawl ṭamnak damter awkah thil
a fir ahcun,
Mi nih an nihsawh ṭhiamṭhiam
lo mei?
31Cun amah cu tlaih a si ahcun
a let sarih in a liam lai;
A innchung i a ngeihmi thil vialte cu
a pek dih lai.
32Mi nupi he a sualmi cu
ruahnak ngei lomi a si;
Cu a tuahtu cu amah le amah
aa hrawk ko.
33Hma le minchiatnak kha a hmuh lai i
a thangchiatnak kha a lo lai lo.
34Zeicahtiah lunghrinnak nih hin mi cu
an thin a phawh hna i
Teirul an i cham tik ciammam ah cun
zeihmanh an i ngan hna lo.
35Chamnak cu
an i cohlanpiak duh lai lo i
Laksawng tampi i pek hmanh ah
an thin a dam hlei lai lo.
Currently Selected:
PHUNGTHLUKBIA 6: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
