PHUNGTHLUKBIA 27
27
1Thaizing kong kha i porhlaw hlah,
cu ni nih zei a chuahpi
lai kha na hngal lo. #Jei 4.13-16
2Nangmah kaa nih si loin
midang tu nih in thangṭhat
deuh hna seh,
nangmah hmur nih si loin
khual tu nih in thangṭhat
deuh hna seh.
3Lung hi a rit i thetse zong hi a khing
a rit ko,
sihmanhsehlaw mihrut nih hnahnawhnak
an chuahpimi cu cu hna pahnih
nakcun a rit deuh.
4Thinhunnak hi a puar i thinlinhnak hi
a hrang ko,
sihmanhsehlaw nahchuahnak he cun
tahchunh awk tlak hmanh an si lo.
5Thuhmi dawtnak nakin lenglang sik
a ṭha deuh.
6Kan hawikom nih cun an kan hliam
sual hmanh ah kan ca i ṭhatnak
an duh ruangah a si,
sihmanhsehlaw ral nih an kan hnamh
cu leirawi duh ah a si.
7A vuai cangmi nih cun khuaihliti
kha a fih,
sihmanhsehlaw a rawl a ṭammi
caah cun a kha mi thil hmanh kha
an thlum dih.
8A inn in a tlaumipa cu a bu in
a tlaumi va bantuk a si.
9Chiti le zihmui nih lung an lawmhter,
sihmanhsehlaw harnak nih lungthin
kha a cheu a hmal dih tawn.
10Na hawikom siseh, na pa hawikom
siseh, hlaw hna hlah;
na vanchiat ni ah na unaupa kha
bawmh hal hlah,
lam hlat i a ummi unau nakin
lamnai i a ummi innpa nih
an bawmh khawh deuh lai.
11Ka fapa, fim law ka lung
ka lawmhter tuah,
cuticun a ka soitu kha ka leh
khawh hna lai.
12Mifim nih cun harnak a rat kha
a hmuh tikah hrial khawh aa zuam,
sihmanhsehlaw mihrut nih cun
a pahchih thluahmah ko i
a hnuah aa ngaihchih.
13Mi pakhatkhat nih khual pakhatkhat
caah biahrennak a tuah tikah
a puan kha va tlai, cun
cu puan cu hngalh lomipa ca
aamahkhannak caah khan
va tlai ko.
14Zingka tein na thawh i na innpa kha
aw thang tuk in thluachuahnak
na pek ahcun, chiatserhnak bantuk ah
an relpiak sual lai.
15Ruah it ni i a tla thliahmah
lengmangmi ruah le nu phunciar
cu ang khat an si.
16Cu nu kham timh cu thli kham timh
bantuk a si, orhlei kut in chiti
hum bantuk a si.
17Thir nih thir a harter, mi zong nih
midang fimnak kha a harter ve.
18Theipi kung a zohkhenhtu nih a thei
a ei lai.
A bawipa a kilvengtu nih upatnak
a hmuh lai.
19Ti chungah hmai cu hmai in
a langh bantukin,
Minung cu a lungthin nih khan
zei bantuk mi dah a si ti kha
a langhter.
20Sheol le Abaddon cu zeitikhmanh
ah an vuai bal lo.
Minung mit zong zeitikhmanh
ah a vuai bal ve lo.
21Titnak um cu ngun caah a si,
somei cu sui caah a si,
Cu bantukin mi cu thangṭhatnak
a hmuhmi in hneksak a si lai.
22Mihrut cu sum ah sumkhal in
su hmanh law a hruhnak cu
a thlah hlei lai lo.
23Na tuurun an umtuning kha ṭha tein
hngal law na cawrun kha ṭha tein
zohkhenh hna;
24Zeicahtiah rumnak hi zungzal in
a hmun lo i
Bawi luchin zong hi chan vialte
tiangin a hmun kho lai lo.
25Ram cu an hung thi i an hung lo,
ramhno cu an hung corh,
Cun tlang cung ram hna cu pumh
an si tikah,
26Tuufa nih na hnipuan ca kha an in
rin lai i meheh nih lo man ca
kha an in rin lai;
27Cun na rawl caah a za ding le
na innchungkhar hna rawl caah le
na ngaknu hna caah a za ding
meheh hnuk cu a um lai.
Currently Selected:
PHUNGTHLUKBIA 27: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
