PHUNGTHLUKBIA 28
28
Miṭhalo le Miding
1Miṭhalo cu ahohmanh nih dawi
loin an zam,
sihmanhsehlaw miding mi cu
chiandeih bantukin an ral a ṭha.
2Ram cu a fimmi le khuaruah
a thiammi hruaitu a ngeih hna tikah
saupi a dir kho,
sihmanhsehlaw uktu kha atu le atu
an i thlen lengmang cu ram kha
a sual caah a si.
3Misifak a hremtu hna bawi cu,
rawl zeihmanh a ngan lotu
ruah bantuk a si.
4Phung a zul lomi nih cun miṭhalo kha
an thangṭhat hna,
sihmanhsehlaw phung kha
a zulmi nih cun an doh hna.
5Miṭhalo nih biading hi zeidah
a si kha an hngal lo,
sihmanhsehlaw Bawipa a kawlmi hna
nih cun tling tein an hngalh cikcek.
6Sifak te i nun i lihchim lo tein um hi
lihchim i rum nakin a ṭha deuh.
7Phungbia a zulmi cu fapa fim a si,
sihmanhsehlaw ei din leiah sumnak
a ngei lomi hna hawikom a simi cu
a pa caah ningzahnak a si.
8A miak le a karh in a rumnak
a chap chintu nih,
misifak hna cung i zaangfahnak
a ngeimi pa caah khan a khon a si.
9Phungbia kha ngai duh loin
a mertakmi cu
a thlacamnak hmanh kha
fihnung a si.
10Miding mi kha ṭhat lonak lei
kal awkah a lemtu cu,
amah nih a cawhmi khor lila ah khan
a tla lai;
Lihchim lomi nih cun a ṭhami
ro kha a hmuh lai i
Sihmanhsehlaw miṭhalo nih cun
zeihmanh an hmu lai lo.
11Mirum nih cun ka fim tiah
an i ruat zungzal,
sihmanhsehlaw hngalhthiamnak
a ngeimi misifak nih khan
anmah nakin a hngalh deuh.
12Miding mi nih uknak an co tikah
conglawmhnak tampi a um,
sihmanhsehlaw miṭhalo an kai tikah
mi cu an i thup dih.
13A palhnak kha a thupmi cu
khua-awng a tong lai lo,
sihmanhsehlaw a phuang i a hlawmi
nih cun zaangfahnak a hmuh lai.
14 Bawipa a ṭih zungzalmi cu
mi thluachuak an si,
sihmanhsehlaw a lung a hahtermi cu
vanchiatnak chungah an tla lai.
15Uktu ṭhalo cu misifak hna caah,
a rawl a ṭammi chiandeih le
a ti a halmi vom bantuk a si.
16Thil ruahning a thiam lomi uktu cu
mihremtu a si tawn,
ai hmanh seh law dinlonak kha
a huami cu a chan a sau tawn.
17Mi thisen a chuahtu cu tlaihnak
luatnak caah tikhor chung hmanh
ah khan a zuang lai.
18Ningcang tein khua a sami cu
him tein an um lai,
sihmanhsehlaw ningcang loin
khua a sami cu lam khatkhat in
a sung ṭhiamṭhiam lai.
19A vawlei ṭha tein a thlomi cu
rawl tampi a ngei lai,
sihmanhsehlaw santlailo rian
pakpalawng a dawi lengmangmi cu
a si a fak lai.
20Zumh awk tlakmi cu thluachuahnak
tampi a hmu lai,
sihmanhsehlaw khulrang in rum
aa zuammi cu dantatnak hmu loin
a um lai lo.
21Duhdanh ngeih hi a ṭha lo,
sihmanhsehlaw changreu tlang khat
ruangah mi nih ṭhat lonak kha
an tuah ko lai.
22Mikhiar nih cun khulrang in
rum aa hnawh,
sihmanhsehlaw herhbaunak nih
a ka tlunh lai ti kha a hngal lo.
23A lei in mi a fakmi nakin a situ nih
khan hmailei ah cun duhdawtnak
a hmuh deuh lai.
24Nu le pa thil fir cu a poi lo a timi cu
mifir taktak he zeihmanh
an i dannak a um lo.
25Hakkauhnak nih cun rem lonak
lawng kha a chuahter ko,
cucaah Bawipa i bochan cu a ṭha deuh suaumau.
26Mah ruahnak i rinh cu hruh a si,
sihmanhsehlaw fimnak lam
a zulmi cu him tein a lan ko lai.
27Sifakmi a pechan lengmangmi cu
a chambau bal lai lo,
sihmanhsehlaw a mit a chinhkanhtu
hna cu chiatserhnak tampi
a hmu lai.
28Miṭhalo nih uknak an tlaih tikah
mi cu an i thup dih,
sihmanhsehlaw an loh tikah miding
mi nih khan uknak cu an co ve.
Currently Selected:
PHUNGTHLUKBIA 28: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
