PHUNGTHLUKBIA 25
25
Ziaza Kong Cawnpiaknak le Tahchunhnak
1Hi zong hi Solomon phungthluk
bia, Judah siangpahrang
Hezekiah mi hna nih an ṭial
chinmi cu an si.
2Pathian nih thil a thuh hi a sunparnak
a si;
Sihmanhsehlaw siangpahrang hna
sunparnak tu cu thil fianter hi a si.
3San leiah van, thuh leiah rili,
cu bantuk cun siangpahrang
lungthin cu purh khawh lo a si.
4Ngun kha a ek hlonh law cu tikah
zungthiam nih thil dawh ah
a ser lai;
5Siangpahrang hmaika in miṭhalo cu
ṭhial hna u law a bawiṭhutdan cu
dinnak in a fek lai.
6Siangpahrang hmaika ah
vaa hmanh len hlah,
Mi ngan hna sin zongah va ṭhu hlah; #Luk 14.8-10
7Zeicahtiah “Hika ah hin hung kai,”
ti cu “Nangmah nakin a ngan deuhmi
kha ṭhutnak kian tuah,” ti nakin
a ṭha deuh.
8Na mit nih a hmuhmi kha khulrang in
zung ah chuahpi hlah,
Zeicahtiah tehte dang nih na palhnak
kha a hnuah a langhter khawh
ahcun zeitindah na um lai?
9Na innpa he nan ruahnak aa dan
ahcun cucu nanmah pahnih
i ceih hmasa u,
Sihmanhsehlaw midang biathli
bel kha phuang hlah;
10Na phuan ahcun a theih tikah
taza an cuai lai i
Naa chuahsualnak kha let ṭhan khawh
a si ti lai lo.
11A caan hmaante ah chimmi bia fang
bia khat cu ngun bawm chung i sui
theitlai bantuk a si.
12Chimhringtu a fimmi cu, a bia ngaih
a duhmi caah cun,
Sui kutdonghrolh le sui hlawn bantuk
a si.
13Zumh awk tlak a simi lamkaltu cu,
a thlahtu hna caah,
facang ṭuan caan i a kikmi
hawhra bantuk a si,
A bawile lungthin kha a hrimhter.
14Laksawng kan pek lai a ti lengmang i
a pe taktak ṭung lomi cu
Ruahti pawi lo khuadawm le
thli bantuk a si.
15Thinfualnak in uktu bawi cu
lem khawh a si lai,
Awka nem nih ruh#25.15 ruh ti sullam hi nawlngeitu tinak a si i nawlngeitu hmanh hi awka nem nih cun an lung a pemh khawh hna ti duhnak a si. hmanh
a khiah khawh.
16Khuaihliti kha tam tuk in ei hlah,
na luak sual lai.
17Na innpa inn ah leng tuk hlah,
na nor lai i an huat sual lai.
18A hawikom cungah a hmaan lomi
tehte a simi cu
thingtan le vainam le a harmi
cantiang bantuk a si.
19Harnak caan i zumhtlak lomi zumh cu,
ha ṭhalo in rawl khai bantuk le
a fakmi ke in kal i zuam bantuk a si.
20Ngaih a chiami caah cun hlasak
thiam bik hna hmanh khi
Khuasik ni i puan i phoih bantuk le
hma i a thormi thuh bantuk a si.
21Na ral kha a rawl a ṭam ahcun ei awk
rawl va pe,
A ti a hal ahcun din awk ti va pe; #Rom 12.20
22Cu ti na tuah ahcun a lu cungah meiṭil
kha na pumh hna a si lai i
Bawipa nih nangmah cu an rulh lai.
23Chaklei thli nih ruah a ratpi,
congoihnak nih thinhunnak
a chuahpi.
24Mi sik duh nupi he innpi
i hrawm nakcun,
Inncung a ken ken khatte i
um a ṭha deuh.
25Ram hla piin theihmi thawngṭha cu,
na ti a hal, na dang a car i tikik
na vun din bantuk khi a si.
26Miṭhalo mi lam a piantu miding cu,
a nawimi tikhor bantuk,
a thurmi tiput bantuk a si.
27Khuaihliti tam tuk ei cu a ṭha lo,
cu bantukin mi sinin thangṭhatnak
tam tuk hmuh i timh cu thilrit a si.
28A thin aa sum kho lomi cu,
Baohmi khua, kulhnak vampang
a ngei ti lomi bantuk a si.
Currently Selected:
PHUNGTHLUKBIA 25: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
