PHUNGTHLUKBIA 24
24
1Miṭhalo hna tluk kha i zuam hlah,
annih cu hawikom i i ser zong
kha i zuam hlah.
2Zeicahtiah annih an ruahmi cu
zaang-ennak lawng kha a si i
an kaa an an paoh ahcun pakhatkhat
cungah harnak an tlunter zungzal.
3Fimnak nih inn cu a sak,
hngalhthiamnak nih a fehter;
4Hngalhnak nih a khaan vialte hna cu
a sungmi le aa dawhmi thilri in
a khahter.
5Mifim cu miṭhawng nakin
a ṭhawng deuh,
hngalhnak a ngeimi cu thazang
a ngeimi nakin a ṭhawng deuh;
6Zeicahtiah ral cu ṭha tein
khuakhannak thawngin tei a si i
saupi timhtuahnak theitlai cu
teinak a si.
7Fimnak hi mihrut caah cun
a sang tuk i a hngalh khawhmi
a si lo, thil pipa ceih tikah zeihmanh
chim awk a hngal lo.
8Ṭhatlo tuahnak khua a khang
lengmangtu cu
a min ah Harnak Sertu ti
a si lai,
9Mihrut nih khua an khanmi cu
sualnak kha a si tawn i
mi nihsawh a hmangmi cu
huatnak kha an tong zungzal.
10Harnak caan i na der a si ahcun
na der taktak a si.
11Thah awk i an kalpi liomi hna cu
va chanh hna,
Thah awk i an hnuhchih lenmi hna cu
va khamh hna.
12Naa thawh i, “Hi pa hi ka rak hngalh
bal ṭung lo,” na ti ahcun,
na lungthin a hngaltu Pathian nih
khan an chingchiah lai.
Nangmah an zohkhenhtu Pathian nih
a hngalh kha hngal ko law
mi cu an tuahning khan a cham cio ko
hna lai.
13Ka fapa, khuaihliti cu ei tuah, a thaw;
a thlar chungin a tlami khuaihliti cu
na lei cungah a thlum bangin
14Fimnak le hngalhnak cu na nunnak
caah an ṭha.
cucu na ngeih hna ahcun hmailei ah
ceunak na hmu lai i na nunkhua
a sau lai.
15Miṭha mi cu a inn ah miṭhalo nih
an bawh bangin va bawh hlah,
a lo zong kha va chut hlah;
16Zeicahtiah miṭha mi cu voi sarih tiang
tlu hmanh seh law
a tho ṭhan zau lai,
sihmanhsehlaw miṭhalo cu
vanchiatnak nih a hrawh hna.
17Na ral kha a tluk tikah i lawm hlah,
a rilh tikah na di riam hlah,
18Cu bantukin na um ahcun Bawipa nih
a hngalh lai i na cungah a lung
aa lawm lai lo i amah kha
dantatnak in a luatter sual lai.
19Ṭhat lonak tuahtu hna kha
zuam hna hlah, miṭhalo kha
tluk i tim hna hlah;
20Zeicahtiah miṭhalo cu i ruahchanmi
hmailei caan an ngei lo i
an meiinn kha hmih an si lai.
21Ka fapa, Bawipa le siangpahrang cu
ṭih hna, anmah a dohtu hna he
khan i kom hlah;
22Zeicahtiah cu bantuk mi hna cu
chikkhatte ah an rawk kho i
Annih nih zei bantuk rawhnak dah
an chuahter lai kha aho nih dah
a hngalh lai.
23Mah hihi mifim mi hna bia
a dang an si rih:
biaceih i duhdanh ngeih cu a ṭha lo,
24A sual komi, a sual lo, tiah a titu
biaceihtu bawi cu miphun zakip nih
chiat an serh i mi vialte nih an huat.
25Sihmanhsehlaw miṭhalo sual
a phawtu biaceihtu bawi hna cu
khua awng an tong lai i an cungah
thluachuahnak ṭha a um lai.
26Lihchim lo tein bia i leh cu hawikom
ṭha taktak sinak langhnak a si.
27Lenglei thil vialte kha ṭha tein
tim dih hmasa hna,
Cun na lo kha sersiam hna law
cu hnuah cun nupi ṭhit le innlo
khuasak tintuk cu a si lai.
28Zei ruang setsai lo ah na innpa
cungah tehte va si hlah,
Amah kong ah thil a ping i a kalter
khotu ding bia zong va chim hlah.
29“Ka cungah a tuah bantukin
ka tuah ve lai, a tuahmi kha
ka lehrulh ve lai,” ti hlah.
30Mizaangthupa lo kha ka tan i ruahnak
ruahnak a ngei lomipa mitsur dum
kha ka pal,
31Zohhmanh, hling nih a zual dih i
vawlei cu thahau nih a khuh dih,
a kulhnak lung hau cu an cim dih.
32Cun ṭha tein cucu ka zoh i
khua ka ruat i hi cawnpiaknak
hi kaa hmuh:
33Cu cawnpiaknak kaa hmuhmi cu
hihi a si:
“Tlawm tein it ko rih ning,
tlawm tein i hngilh ko rih ning,
tlawm tein ka kut cu i din ko rih seh ti
chungah hin, #Phut 6.9-11
34Sifahnak cu mifir bantuk le
herhbaunak cu hriam aa putmi
miramhtu bangin na cungah
a phan lai.”
Currently Selected:
PHUNGTHLUKBIA 24: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
