PHUNGTHLUKBIA 20
20
1Zu hi nihsawhnak mi a phorhtu
a si,
Ritnak zu hi i siknak a si; zu rit cu
hruh a si.
2A thin a hungmi siangpahrang cu
a ngur hluahmahmi chiandeih
bantukin ṭih tuah,
amah a thin hunter cu mah le mah
i thah a si ko;
3Mihrut aho paoh nih siknak kha
a thawhter khawh,
sihmanhsehlaw siknak hrial cu
upat awk tlak thil a si.
4Mi thathu nih cun leithuan caan ah
lei a thuang lo,
rawlṭuan caan a phak tikah a kawl i
zeihmanh a hmu lo.
5Minung nih a lung chung i a ngeihmi
ruahnak cu a thukmi tikhor ti
bantuk a si,
sihmanhsehlaw thuk piin a hmu
khomi nih cun a than khawh lai.
6Mi kip nih zumh awk tlak ka si
an ti cio,
sihmanhsehlaw hei hneksak tuah
hna law, aho fang khi dik
zumh awk tlak taktak cu an hei si!
7Mipa cu a nunning kha a din i
a ṭhat ahcun,
a hnu i a tefa hna cu thluachuakmi
an si.
8Biaceihnak ṭhutdan cungah a ṭhumi
siangpahrang nih cun
ṭhat lonak vialte kha a thleidan
khawh dih.
9Aho tal nih, “Ka lung cu ka thianter i
ka sualnak in ka thiang cang,” an ti
kho lai maw?
10Cuai deu le rel deu hman hi Bawipa caah
fihnung an si.
11Ngakchia hmanh nih a tuahmi
a ṭhat le a din kha a tuahnak in
amah lila nih a langhter ko.
12Theihnak hna hna le hmuhnak
mit hna hi Bawipa sermi an si dih.
13Ih hi duh hlah, sifahnak na phan
sual lai,
na mit i au law rawl tampi
na ngei ko lai.
14Thil cawtu nih cun a man a fak tuk,
a ti zungzal,
sihmanhsehlaw a kal hnuah cun
ka det khawh tiah aa porhlaw
ṭhan ṭung.
15Sui tampi a um ko, a man a tammi
lung zong tampi an um ko,
sihmanhsehlaw fimnak bia cu
a tlawmte i a man a sung cikmi
lungvar a si.
16Hngalh lomipa leiba caah
amah le amah
aamahkhan tiangin a hrutmi cu,
a thilri kha aamahkhannak ah cun
tlaih a si lai.
17Lihchim in hmuhmi rawl cu a thlum,
sihmanhsehlaw luklak ah a kaa ah
lungtekem bantuk an si.
18Lungthin i cheuhnak in khuakhanmi
kha a hmun,
i timh ciammam loin raltuknak hmun
chungah lut cutmat hlah.
19Mi hmursau nih biathli kha
a phuan tawn,
Cucaah a holh tukmi cu kom hlah.
20Ahohmanh nih a nu siseh a pa siseh
a vawlhpamh hna ahcun,
Muihnak a rat tikah a mei-inn kha
a mit lai.
21Khulrang tuk in hmuhmi chawva cu,
a donghnak ah thlua a chuak lai lo.
22“Ṭhat lonak cu ṭhat lonak in
ka rulh lai,” tiah va ti hlah,
Bawipa kha va hngak law, amah nih
an bawmh lai
23Cuai deu cu Bawipa caah fihnung a si,
tahnak deu cu a ṭha lo.
24Minung lam a kan hruaitu cu
Bawipa a si,
zeitindah mi nih a lam cu
a hngalh khawh lai?
25Pathian sin pek awk laksawng
naa kam hlanah ṭha tein
ruat hmasa,
a hnuah naa ngaichih sual lai.
26Siangpahrang fim nih cun miṭhalo
kha a hngalh hna i
zaangfahnak ngei loin dan a tat hna.
27 Bawipa nih ruahnak le a chia le a ṭha
thleidan khawhnak lungthin
a kan pek.
Kanmah sinin kan i thup kho lo.
28Zumhawktlak sinak le zumhnak ṭha
nih siangpahrang cu a kilven i
a bawi ṭhutdan cu dinnak nih a dirter.
29Tlangval hna an sunparnak cu
an thazang hi a si,
tar hna an i dawhnak cu
an sam par hi a si.
30A zei maw caan ahcun, kan ziaza
i thlen awkah harnak ton kha
a herh tawn.
Currently Selected:
PHUNGTHLUKBIA 20: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
