PHUNGTHLUKBIA 18
18
1Mi dang he aa rem lomi cu
amah duhnak lawng zulh
a duhmi a si,
midang nih a hmaan an timi paoh kha
a hnatlakmi a um lo.
2Mihrut nih cun a hngalh set le hngalh
set lo kha biapi in a ruat lo,
zeitluk in dah ka fim ti langhter
lawng kha a duh.
3Ṭhat lonak le ningzahnak cu
a kal ṭimi an si,
upatnak kha na thlau ahcun
nihsawhnak kha na hmuh ko lai.
4Minung holh hi fimnak hram a si kho,
rili bantukin a thuk kho i
a luang lengmangmi tiva bantukin
a thar lengmang kho.
5Miṭhalo sin i duhdanh ngeih cu
a ṭha lo,
miding mi biading coh lo zong
a ṭha lo.
6Mihrut mi hmur nih cun siknak
a chuahpi,
a kaa nih fung tuknak a sawm.
7Mihrut cu a kaa kha amah rawhnak
a si,
a hmur kha amah lila caah rap a si.
8Mi congoihnak bia chim cu
a thlummi changreu
bantukin a thaw i
pum chung chungchin ah khan
kan lemh riahmah ko hna.
9Mahle rian ah a daithlangmi cu
hrawkhraltu unau a si.
10 Bawipa min cu a fekmi innsang a si,
miding cu khika ah khan an va tli i
an him.
11Mirum mi nih a chawva cu, a fekmi
khua le a sangmi ralhau a si tiah
a ruah.
12Harnak phak hlanah cun mi cu
an lung a puam tawn,
sihmanhsehlaw upatnak phaknak
lam cu toidornak a si.
13Bia na leh hlanah ngai hmasa,
cu ti na tuah lo ahcun na hruh
a si hleiah
bia na lehmipa zei i na rel lo
zong a si.
14Mi cu lungthin ṭhawng nih a zawt
lio ah thazang a pek khawh,
sihmanhsehlaw lungthin cu hma a in
ahcun, aho nih dah a tuar
khawh lai?
15Ruahnak a fimmi nih cun hngalhnak
kha an i lak chin lengmang i
mifim mi nih an hna in hngalhnak
kha an kawl.
16Laksawng nih laksawng petu caah
khan lam a hun i
mingan hna sinah khan a phakpi.
17Biaceihnak zung ah bia a chim
hmasami paoh cu
a hmaan a lo zungzal,
sihmanhsehlaw cu a lawhnak cu
a dang a rat ve i amah kha a vun
hlathlai tiang lawng khi a si tawn.
18Pa ṭhawng pahnih cu biaceihnak
zung ah bia an i al ahcun,
camcawhfung lawng nih
an bia kha a khiah khawh.
19U le nau i bawmh hi a fekmi khua
bantuk a si,
sihmanhsehlaw i sik cu ralhau
kharkanh bantuk a si.
20Mi cu a kaa chungin a chuakmi bia
theitlai in a khim tawn,
a hmur in a chuakmi in cawmnak
kha a hmuh.
21Lei nih hin thah khawhnak le nunh
khawhnak ṭhawnnak a ngei,
cucaah na bia chimmi theitlai cu
na co a herh lai.
22Nupi aa hmuhmi cu thil ṭha
aa hmuhmi a si,
Bawipa cu na cungah a ṭha ti kha
a langhter.
23Misifak nih cun bia an chim ah
a nawl tein an nawl tawn hna,
sihmanhsehlaw mirum nih cun
an leh hna tikah a hrilh in an hrilh.
24Hawikom a cheu khat cu pakpalawng
biachim lawngah an ṭhahnem,
sihmanhsehlaw unau nakin a fek
deuhmi hawikom zong an um ve.
Currently Selected:
PHUNGTHLUKBIA 18: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
