PHUNGTHLUKBIA 10
10
Miding le Miṭhalo An I Dannak
1Solomon phungthluk bia hna:
Fapa fim nih a pa a lawmhter,
sihmanhsehlaw fapa hrut cu a nu caah
ngaihchiatnak a si.
2Ṭhat lonak in hmuhmi chawva cu
a miak lo,
sihmanhsehlaw dinnak cu thihnak
chungin chuahtertu a si.
3 Bawipa nih miding cu rawlṭam in
umter a siang hna lo,
sihmanhsehlaw miṭhalo duhnak cu
a donh tawn.
4Kut thathu nih cun pamnak
a chuahter,
sihmanhsehlaw miteima kut nih cun
rumnak a chuahter.
5Ṭhal caan lioah thil aa khonmi cu
fapa fim a si,
sihmanhsehlaw rawlṭuan caan lio i
a it komi fapa cu ningzahnak
a chuahtertu a si.
6Thluachuahnak cu miding hna
lu cungah a um,
sihmanhsehlaw miṭhalo hna
kaa nih cun
zaang-ennak kha an i hmawm.
7Miding cu thluachuahnak an si tiin
hngalh camcin an si,
sihmanhsehlaw miṭhalo hna min cu
philh zau a si.
8A fimmi nih cun nawlbia kha
a lung chungah aa ken,
sihmanhsehlaw mihrut mikatam cu
ngaihchiatnak a phan lai.
9Ding tein a kalmi cu him tein a kal,
sihmanhsehlaw a lam kha
a ningcang loin
a tuahmi cu a langh lai.
10Palhnak a um tikah tla dedep tein
a mit a ṭhepmi cu
harnak chuahtertu a si,
sihmanhsehlaw ralṭhat in mi
a chimhringmi cu daihnak
umtertu a si.
11Miding kaa cu nunnak cerhti a si,
sihmanhsehlaw miṭhalo hna
kaa nih cun zaang-ennak kha
an i hmawm.
12Huatnak nih rem lonak kha
a thawhter,
sihmanhsehlaw dawtnak nih cun i
tisualnak vialte kha a khuh dih. #Jei 5.20; 1Pet 4.8
13Hngalhthiamnak a ngeimipa hmur ah
cun fimnak a um,
sihmanhsehlaw fungfek cu ruahthiamnak
a ngei lomipa keng caah a si.
14Mifim nih cun hngalhnak kha
an i khon,
sihmanhsehlaw mihrut nih bia
an chim hluahmah tikah khan
rawknak kha a nai.
15Mirum hna an ralhruang cu
an chawva a si,
misifak hna an rawhnak cu
an sifahnak hi a si.
16Miṭha nih an hmuhmi laksawng cu
nunnak a si,
sihmanhsehlaw sualnak nih cun
sualnak lawng
a chuahpi lengmang.
17Chimhhrinnak a ngaimi paoh cu an
nung lai,
sihmanhsehlaw ka palh a ti duh lomi
cu lamping ah an kal.
18Huatnak a paw chungah a thupmi nih
a hmur in lih a chim,
hawi thangchiatnak a chimmi cu
mihrut an si.
19Bia tam deuh na chim paoh ah
tam deuh in
na sual ve sual ko lai,
cucaah na fim ahcun bia naa sum lai.
20Miṭha hna bia cu ngun ṭha bantuk
an si,
sihmanhsehlaw miṭhalo hna lungthin
cu hnawmtam bantuk an si.
21Miṭha bia nih cun mi tampi
a cawm hna,
sihmanhsehlaw mihrut cu a hruh
ruangah a thi tawn.
22 Bawipa thluachuahnak cu rumtertu
a si i
ngaihchiatnak zeihmanh a ratter
chih hna lo.
23Ṭhat lonak tuah hi mihrut caah cun
lentecelh bantuk a si i
sihmanhsehlaw hngalhthiamnak
a ngeimi caah cun fimnak hi
a nuammi a si.
24Miṭhalo cu a ṭihmi thil kha
a cungah a tlung lai,
sihmanhsehlaw miding nih cun
a saduhthah kha a co lai.
25Thlichia nih miṭhalo cu a choih hna,
sihmanhsehlaw miding cu an him.
26Ha ca i a thormi bantuk le mit ca i
meikhu bantuk khi
mithathu cu a bawipa caah a si.
27 Bawipa ṭihnak nih hin chan a sauter,
Sihmanhsehlaw miṭhalo hna chan cu
a tawi.
28Miding hna ruahchannak cu
lunglawmhnak a phan,
Sihmanhsehlaw miṭhalo hna nih
an i ruahchihmi cu
pakpalawng ah a cang.
29 Bawipa nih a sual lomi cu
a huhphenh hna,
sihmanhsehlaw ṭhat lonak a tuahmi
cu a hrawh hna.
30Miding cu hlonh an si bal lai lo,
sihmanhsehlaw miṭhalo cu
ram chungah hin
khua an sa kho lai lo.
31Miding kaa nih cun fimnak kha
a chim,
sihmanhsehlaw lei ṭhalo cu
tan a si lai.
32Miding nih cun hi caan he hin zei bia
hi dah chim awkah aa tlak ti kha
an hngalh,
sihmanhsehlaw miṭhalo nih cun mi ca
i fahnak a chuahtertu bia
lawnglawng kha a chim zungzal.
Currently Selected:
PHUNGTHLUKBIA 10: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
