JOSHUA 15
15
Judah Comi Ram
1Judah phun caah an innchungkhar ning cio ah an vo cu thlanglei ah Edom ramri, thlanglei bik ah Zin ramlak tiang a phan. 2Cun an thlanglei ramri cu Cite Rili kam, thlanglei a zohmi rili fonghlei thawk in a si. 3Akrabbim i hung kainak thlanglei in a kal i Zin a hei phan, cun Kadesh-barnea thlanglei ah a hung kai, cun Hezron pawng in Addar tiang a kal, cun Karka lei ah aa mer, 4Azmon tiang a lan i Izipt Tivate ah a hung chuak; cuticun an ramri cu rili ah a dong. Mah hihi an thlanglei ramri cu a si. 5Cun nichuahlei an ramri cu Cite Rili a si, Jordan tiva chuak tiang. Cun chaklei kam ramri cu Jordan tiva chuak i rili fonghlei in aa thawk; 6cun ramri cu Beth-hoglah ah a hung kai i Beth-arabah chak in a lan; cun ramri cu Reuben fapa Bohan Lung tiang a hung kai; 7cun ramri cu Akhor nelrawn in Debir tiang a hung kai; cuticun chaklei ah a kal, cun nelrawn thlanglei kamah a ummi Adummim i hung kainak ralchan i a ummi Gilgal leiah aa mer; cun ramri cu En-shemesh ti tiang a lan i En-rogel ah a dong; 8cun ramri cu Jebus mi umnak tlang thlanglei fing (cucu Jerusalem) i Hinnom fapa nelrawn leiah a hung kai; cun ramri cu, nitlaklei ah, Refaim nelrawn chaklei kamah, Hinnom horkuang ralchan i a ummi tlangpar tiang a hung kai; 9cun ramri cu tlangpar cun Neftoah Ti a putnak tiang a vung kal i cuka cun Efron Tlang khua hna tiang a lan; cun ramri cu Baalah (cucu Kiriath-jearim) leiah aa kuai i 10ramri cu Baalah nitlaklei ah Seir Tlang leiah aa let, Jearim Tlang (cucu Khesalon) chaklei fing kha a zulh i Beth-shemesh tiang a vung kal i Timnah pawng in a lan; 11ramri cu Ekron fing tiang chaklei ah a kal, cun Shikkeron leiah aa kuai i Baalah Tlang leiah a kal i Jabneel ah a chuak; cun ramri cu rili ah a dong. 12Cun nitlaklei ramri cu Rili Ngan le a kam cu a si. Mah hihi Judah phun, an innchungkhar ning cio in, an velchum i an ramri cu a si.
Kaleb Nih Hebron le Debir A Lak Hna
(Biac 1.10-15)
13 Bawipa nih Joshua nawl a pekmi bangin, Jefunneh fapa Kaleb cu Judah mi hna lakah vo pakhat, Kiriath-arba cu a pek, cucu Hebron a si (Arba cu Anak pa kha a si). #Biac 1.20 14Cun Kaleb nih khika in Anak fapa pathum, Sheshai, Ahimah, le Talmai, Anak tefa hna cu, a dawi hna. 15Cun khika in Debir khuami kha doh awkah a hung kal; hlanah cun Debir min cu Kiriath-sefer a rak si. 16Cun Kaleb nih, “Kiriath-sefer atu i a latu paoh cu ka fanu Aksah kha nupi ah ka pek lai,” tiah a ti. 17Cun Kaleb nau Kenaz fapa Othniel nih a lak i, amah cu a fanu Aksah cu nupi ah a pek. 18Aksah nih a sinah a rat tikah, a pa kha lo pakhat hal awkah a fial; cun a laa cungin a ṭum i Kaleb nih, “Zei dah na duh?” tiah Aksah cu a ti. 19Amah nih, “Laksawng pakhat in ka pe tuah; Negeb ram chungah na ka chiah caah, tiput hna zong kha ka pek chih tuah,” a ti. Cun Kaleb nih chaklei tiput hna le thlanglei tiput hna kha a pek chih.
Judah Ram Chung Khua Hna
20Judah phun nih an innchungkhar ning cio ah an comi ram cu mah hi a si. 21Edom ramri leiah thlanglei bik ah Judah phun i an khua hna cu mah hihi an si: Kabzeel, Eder, Jagur, 22Kinah, Dimonah, Adadah, 23Kedesh, Hazor, Ithnan, 24Zif, Telem, Bealoth, 25Hazor-hadattah, Kerioth-hezron (cucu Hazor), 26Amam, Shema, Moladah, 27Hazar-gaddah, Heshmon, Beth-pelet, 28Hazar-shual, Beersheba, Biziothia, 29Baalah, I-im, Ezem, 30Eltolad, Khesil, Hormah, 31Ziklag, Madmannah, Sansannah, 32Lebaoth, Shilhim, Ain, le Rimmon; a zapi ah khuapi pakul le pakua an si, an khuate hna he.
33Cun rawnram ah, Eshtaol, Zorah, Ashnah, 34Zanoah, En-gannim, Tappuah, Enam, 35Jarmuth, Adullam, Sokoh, Azekah, 36Shaaraim, Adithaim, Gederah, Gederothaim; khuapi hleili, an khuate hna he.
37Zenan, Hadashah, Migdal-gad, 38Dilean, Mizpah, Jokthe-el, 39Lakhish, Bozkath, Eglon, 40Kabbon, Lahmam, Khitlish, 41Gederoth, Beth-dagon, Naamah, le Makkedah; khuapi hleiruk, an khuate hna he.
42Libnah, Ether, Ashan, 43Iftah, Ashnah, Nezib, 44Keilah, Akhzib, le Mareshah; khuapi pakua, an khuate hna he.
45Ekron, a khuapi hna le a khuate hna he; 46Ekron in rili tiang, Ashdod sir i a ummi vialte, an khuate hna he.
47Ashdod, a khuapi hna le a khuate hna; Gaza, a khuapi hna le a khuate hna; Izipt tiva le rili ngan le a kam tiang.
48Cun tlangram ah, Shamir, Jattir, Sokoh, 49Dannah, Kiriath-sannah (cucu Debir), 50Anab, Eshtemoth, Anim, 51Goshen, Holon, le Giloh; khuapi hleikhat, an khuate hna he.
52Arab, Dumah, Eshan, 53Janim, Beth-tappuah, Afekah, 54Humtah, Kiriath-arba (cucu Hebron), le Zior; khuapi pakua, an khuate hna he.
55Maon, Karmel, Zif, Juttah, 56Jezreel, Jokdeam, Zanoah, 57Kain, Gibeah, le Timnah; khuapi pahra, an khuate hna he.
58Halhul, Beth-zur, Gedor, 59Ma-arath, Beth-anoth, le Eltekon; khuapi paruk, an khuate hna he.
60Kiriath-baal (cucu Kiriath-jearim), le Rabbah; khuapi pahnih, an khuate hna he.
61Ramlak ah, Beth-arabah, Middin, Sekakah, 62Nibshan, Cite Khua, le En-gedi; khuapi paruk, an khuate hna he.
63Sihmanhsehlaw Jerusalem khuami Jebus mi hna cu Judah mi hna nih an dawi kho hna lo; cucaah nihin ni tiangin Jebus mi hna cu Judah mi hna he Jerusalem ah an um ko. #Biac 1.21; 2Sam 5.6; 1Cha 11.4
Currently Selected:
JOSHUA 15: HCL06
Highlight
Share
Compare
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
