JOSHUA 14
14
Kanaan Ram Cu Camcawhfung Zuh In An I Cheu
1Cun mah hna hi Kanaan ram chungah Israel mi nih an comi ram cu an si, tlangbawi Eleazar le Num fapa Joshua le Israel tefa hna chung i an phun cio lu hna nih an phawtmi hna cu an si. 2Bawipa nih Moses nawl a pek bang khan phun kua le a cheu caah cun an co ning cu camcawh fung zuh in a si, #Nam 26.52-56; 34.13 3zeitintiah Moses nih Jordan tiva ral ah phun hnih le a cheu cu ro kha a pek cang hna; sihmanhsehlaw annih lakah Levi mi hna cu ro a pe hna lo. #Nam 32.33; 34.14-15; Deu 3.12-17 4Josef tefa hna cu phun hnih an si, Manasseh le Efraim; ram chungah Levi mi hna cu vo an pe hna lo, sihmanhsehlaw umnak khua hna le cu pawngkam i caw le saṭil dang tlonnak ram lawnglawng cu pek an si. 5Bawipa nih Moses nawl a pek bang khan Israel mi nih an tuah; ram cu an i ṭhen.
Kaleb Cu Hebron Kha An Pek
6Cun Judah phunmi kha Joshua sinah Gilgal ah an ra i Keniz phun Jefunneh fapa Kaleb nih a sinah, “Nangmah le keimah kongah, Bawipa nih Pathian mi Moses sinah Kadesh-barnea ah bia a chimmi kha na hngalh. #Nam 14.30 7Bawipa sal Moses nih ram cu hung ngiatthlai awkah Kadesh-barnea in a ka thlah tikah kum sawm li ka rak si; cun ka lungchung i a umning bantuk tein bia cu amah cu ka rak phorh ṭhan. #Nam 13.1-30 8Sihmanhsehlaw keimah he a hung kal ṭimi ka unau hna nih khan mizapi cu an awlok an chonter hna, sihmanhsehlaw kei tu nih cun Bawipa ka Pathian kha fek tein ka zulh. 9Cun Moses nih khi ni ah chiat a ser i, ‘Bawipa ka Pathian cu fek tein na zulh caah, na ke nih a lamhmi ram cu nangmah ca le na tefa hna caah zungzal in ro an si hrimhrim lai,’ tiah a ti. #Nam 14.24 10Cun atu cu, zohhmanh, Bawipa nih a chim bang khan hi kum sawm li le kum nga chung hi Bawipa nih Moses sinah hi bia a chim ri khan a ka nunter, Israel mi nih ramlak ah an vah lioah khan; cun atu cu zohhmanh, nihin ni ah hin kum sawm riat le kum nga ka si. 11Moses nih a rak ka thlah ni i ka ṭhawn tluk te khan nihin ni tiang ka ṭhawng ko rih; raldohnak caah siseh, kalnak caah siseh, ratnak caah siseh, atu i ka thazang cu kha lio i ka thazang bantuk kha a si ko. 12Cucaah Bawipa nih kha ni ah a rak chimmi tlangram cu atu ah hin ka pe tuah, zeitintiah Anak mi hna nih zeitindah khika ah kulhmi khualipi hna he an um kha, kha ni ah khan na rak theih cang. Bawipa nih a chim bang khan Bawipa nih a hei ka umpi hnga i ka hei ṭhawl khawh ko hna hnga dah kaw,” tiah a ti.
13Cun Joshua nih thluachuah a pek i Hebron cu Jefunneh fapa Kaleb sinah khan ro caah a pek. 14Cucaah Hebron cu Keniz phun Jefunneh fapa Kaleb ro ah, Bawipa, Israel Pathian kha fek tein a rak zulh caah, nihin ni tiang hin a cang. 15Hebron khua min cu a hlanah cun Kiriath-arba a rak si; hi Arba cu Anak mi hna lakah mingan bik a rak si. Cun ram cu raldohnak in aa din.
Currently Selected:
JOSHUA 14: HCL06
Highlight
Share
Compare
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
