JOSHUA 13
13
Tei Rih Lomi Ram
1Atu cu Joshua cu a upa i a tar ngaingai cang. Bawipa nih a chawnh i, “Nang cu na upa i na tar ngaingai cang, asinain co awk ram tampi a um rih. 2Mah hihi a tang rihmi ram cu a si; Filistin mi hna ram a dihlak le Geshur mi ram a dihlak. 3(Izipt nichuahlei i a ummi Shihor in chaklei ah Ekron ramri tiang, mah cucu Kanaan mi ram ah rel a si; cun Filistin bawi panga an um, Gaza i le Ashdod i le Ashkelon i le Gath i le Ekron i hna cu an si), 4cun thlanglei ah Avvim mi hna ram zong, Kanaan mi hna ram vialte le Sidon mi ta a simi Mearah, Amor mi hna ramri Afek tiang le, 5Gebal mi hna ram le nichuahlei ah Lebanon vialte, Hermon Tlang tang i a ummi Baal-gad in Hamath khua luhnak tiang, 6tlang ram i a ummi vialte Lebanon in Misrefoth-maim tiang, Sidon mi vialte hna cu. Keimah hrimhrim nih Israel mi hna hmai in ka dawi hna lai; nawl kan pek bantuk khan ram cu Israel mi hna sinah ro caah a cheuh tu cu rak cheu ko hna. #Nam 33.54 7Cucaah atu cu hi ram hi phun kua le Manasseh phun cheu hna kha ro caah cheu tuah hna,” tiah a ti.
8A dang Manasseh phun cheu hna he cun, Reuben mi le Gad mi nih Moses nih a pek hna bang khan an ro kha an co, Jordan ral nichuahlei ah khan, Bawipa sal Moses nih a pek hna bang khan: #Nam 32.33; Deu 3.12 9Arnon tiva nelrawn ri ah a ummi Aroer khua thawk in, cu nelrawn laifang ah a ummi khua le Medeba tlangrawn ram vialte Dibon tiangin; 10cun Heshbon ah a ummi Amor mi siangpahrang Sihon khua vialte, Ammon mi hna ramri tiang; 11cun Gilead ram le Geshur mi hna le Maakath mi hna ram le, Hermon tlang vialte le, Bashan dihlak Salekah tiangin; 12Ashtaroth le Edrei in a pengtu Bashan siangpahrang Og pennak vialte (Refaim mi hna lakin a taangmi hna lakah amah lawng cu a tang); mah hna hi Moses nih a tei hna i a dawi hna. 13Sihmanhsehlaw Geshur mi si hna seh, Maakath mi si hna seh, Israel mi nih an dawi hna lo; Geshur le Maakath cu nihin ni tiang hin Israel mi lakah an um ko.
Moses Nih Vo A Pekmi Hna
14Levi phun lawng kha Moses nih ro a pek lomi cu a si; Bawipa Israel Pathian sinah mei in pekchanhmi thil cu, a chimh cang bang khan annih ro cu a si. #Deu 18.1
15Cun Moses nih Reuben miphun cu an innchungkhar ning cio ah ro a pek hna. 16Cucaah an ram cu Arnon nelrawn ri ah a ummi Aroer khua in le, nelrawn laifang ah a ummi khuapi le, Medeba hrawng tlangrawn ram vialte cu a si; 17Heshbon le tlangrawn ram chungah a ummi khua vialte he; Dibon le Bamoth-baal le Beth-baal-meon le 18Jahaz le Kedemoth le Mefaath le 19Kiriathaim le Sibmah le nelrawn tlang cungah a ummi Zereth-shahar le 20Beth-peor le Pisgah tlangpang zau le Beth-jeshimoth zong, 21cucu tlangrawn ram khua vialte le Heshbon i bawi a simi Amor siangpahrang Sihon pennak vialte cu a si. Moses nih amah cu Midian mi hruaitu hna Evi le Rekem le Zur le Hur le Reba, Sihon bawi ram chungah a ummi hna he cun a tei. 22Beor fapa Balaam, camthiammi zong kha Israel mi nih an thahmi hna lakah khan vainam in an thah chih ve. 23Reuben mi hna ramri cu Jordan tiva cu a si. Mah hihi Reuben mi hna nih an innchungkhar ning cio ah an comi ram cu a si, an khuapi hna le an khuate hna he tiah.
24Cun Moses nih Gad miphun zong an innchungkhar ning cio ah ro a pek hna. 25An ram cu mah hna hi a si: Jazer le, Gilead ram khua vialte le, Ammon mi hna ram hnarcheu, Rabbah nichuahlei ah a ummi Aroer tiang, 26cun Heshbon in Ramath-mizpeh le Betonim tiang, cun Mahanaim in Debir ram tiang, 27cun nelrawn chungah Heshbon siangpahrang Sihon pennak a taangmi, Beth-haram, Beth-nimrah, Sukkoth le Zafon; a ramri cu Jordan tiva Khinneroth Rili a thlanglei kam tiang a si; cu ram cu Jordan tiva ral nichuahlei ram cu a si. 28Mah hihi Gad mi hna nih an innchungkhar ning cio ah, an comi ram cu a si, khuapi hna le a khuate hna he.
29Cun Moses nih Manasseh phuncheu cu ro a pek; an innchungkhar ning cio in Manasseh phuncheu cu pek a si. 30An ram cu Mahanaim in Bashan ram vialte a dihlak, Bashan siangpahrang Og pennak vialte cu a ning piin, Bashan chung i a ummi Jair khua vialte, khua sawm ruk hna cu, 31cun Gilead ram a cheu le Bashan ram chung i Og nih a penmi ram khuapi Ashtaroth le Edrei. Mah hna hi Manasseh fapa Makhir tefa hna cu pek an si, an innchungkhar ning cio ah Makhir mi hnarcheu cu pek an si.
32Jordan tiva ral Jeriko in nichuahlei Moab nelrawn chung i Moses nih a phawtmi hna ram cu mah hna hi an si. 33Sihmanhsehlaw Levi phun cu Moses nih ro a pe hna lo; an sinah a rak chim bang khan Bawipa Israel Pathian cu an ro cu a si. #Nam 18.20; Deu 18.2
Currently Selected:
JOSHUA 13: HCL06
Highlight
Share
Compare
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
