JOB 12
12
Job Nih A Leh
1Cun Job nih a leh i:
2“Biangai tein, nanmah hi pei
mifim cu nan rak si hi,
Fimnak tling cu nanmah nih pei
nan rak ngeih hi!
3Sihmanhsehlaw hngalhthiamnak cu
nanmah tlukin ka ngei ve ko,
Zeihmanh ah nanmah tluk ka si lonak
a um lo.
Nan chimmi hi ahopaoh nih
an hngalh cio ko.
4Ka hawile hmanh nih an ka nihsawh,
Sihmanhsehlaw Pathian nih a ka leh
caan cu a um ve ko;
Miding le soi awk um lo ka si nain
an ka nihsawh.
5Harnak nan tong lo i nan ka nihsawh,
a ril dengmangmi kha
nan ka ṭhuat chih,
6Sihmanhsehlaw mifir le Pathian zei i
a rel lomi hna cu dai tein
khua an sa i
Pathian thin a phoktu hna cu
himte le dai tein an um.
7Van i a zuangmi va hna le saram hna
nakin pei nan hngalhnak
a tlawm deuh hi.
Annih nih an in cawnpiak khawh hna
ding tampi a um.
8Vawlei i a ummi saram hna le rili
chung i a ummi thilnung hna cu
an fimnak kha hal tuah hna u.
9Annih nih an dihlak in Pathian sermi
kan si ti kha an hngalh.
10A sermi thil vialte an nunnak
a uktu cu Pathian a si i
Minung thaw cu a kut chungah a um.
11Dang nih rawl cu a teh bantukin
hna nih bia cu a hneksak ve
hna lo maw?
12-13Fimnak cu tar nih an ngeih,
Sihmanhsehlaw Pathian nih cun
fimnak le ṭhawnnak a ngeih;
Hngalhthiamnak cu chan saumi nih an ngeih,
Sihmanhsehlaw Pathian nih cun
hngalhthiamnak le thil ti khawhnak
a ngeih.
14Pathian nih a ṭheh ahcun,
ahohmanh nih
an sa ṭhan kho ti lo,
Amah nih mi cu a kharkhumh ahcun,
ahohmanh nih an hunpiak ṭhan
kho ti lo.
15Ti kha a tlaih hna ahcun an kao ko,
a thlah hna ahcun vawlei kha
an khuh dih.
16Amah sinah cun ṭhawnnak le
fimnak kha a um,
Hlenmi hna le hlengtu hna cu
amah kut tang ummi an si.
17Fimchimtu pawl kha mihrut bantukin
a umter hna,
Biaceihtu pawl kha mihrut ah
a ser hna.
18Siangpahrang cu a ṭhumh hna i
thongtla ah a ser hna.
19Tlangbawi pawl cu puan loin
a kalpi hna i
A ṭhawngmi cu a thluk hna.
20Zumhmi mifim hna kha holh kho loin
a tuah hna i
Upa kha thil thleidan khawhnak
fimnak kha a chuh hna.
21Bawi kha ningzahnak a toih hna i
a ṭhawngmi cu an taisawm kha
a dorh.
22Muihnak chungin thilthuk kha
a hun langhter i
A thukmi muihnak chungah khan
ceunak a ratpi.
23Miphun kha mingan ah a ser hna i
amah nih a hrawh ṭhan hna,
Miṭhawng ah a ser hna i amah nih
a ṭhumh ṭhan hna.
24An hruaitu hna cu an fimnak kha
a lakpiak hna i
Lam um lonak ramlak ah khan
a vaihter hna.
25Mei lakah cun ceunak um loin
an i dap lengmang i
zuri bantukin an vai.
Currently Selected:
JOB 12: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
