JOB 11
11
Zofar Nih Job Kha Sual A Phawt
1Cun Naamath mi Zofar nih a leh i:
2“Bia tampi hi leh loin maw
um a si lai?
Mi biatam paoh hi maw thiamco
zungzal a si lai?
3Dong loin na chim lengmang komi
nih hin mi kha holh loin a umter
hna lai maw?
Cun pakpalawng bia na chim
lengmang ko tikah hin, aho tal
nangmah situ an um lai lo maw?
4Zeicahtiah naa thawh i, ‘Ka ruahnak
hi ahmaan, Pathian mithmuh
ah ka thiang,’ na ti.
5Sihmanhsehlaw Pathian nih hun in let
seh law ka hei duh hnga dah!
6Fimnak hi thap tampi a um i
Minung fimnak nih a phak khawh
lomi thil thuk an um ti kha
an chimh hnga.
Pathian nih na sualnak a cheu cu hmu
duh loin an umpiak kha hngal tuah.
7Pathian thil thuk hna cu na hmuh
khawh hna maw?
Lianngan Bik ṭhawnnak a donghnak
cu na hmuh khawh maw?
8Van nakkhin a sang deuh — zeidah
na tuah khawh lai?
Sheol nakin a thuk deuh — zeidah
na hngalh khawh lai?
9Vawlei velchum nakin a sau deuh i
rili nakin a kau deuh.
10Pathian nih an tlaih i biaceihnak ah
an chuahpi ahcun,
Aho nih dah amah cu a dawnh
khawh lai?
11Pathian nih cun aho hi dah
zeiruaramlomi a si ti kha
a hngalh hna,
An ṭhat lonak vialte kha a hmuh dih.
12Sihmanhsehlaw ramlak laa fa cu
minung in a chuah tik ceo ah
Mihrut cu an fim te lai.
13“Na lungthin kha ding tein chia law
Amah leiah khan na kut zao tuah.
14Na kut chungah ṭhat lonak
a um ahcun,
lamhlatpi ah va hlonh tuah,
ṭhat lonak cu na thlam chungah
umter hlah.
15Khi tikah dotlak lonak um loin
na hmai cu na langh lai;
Him tein na um lai i na ning a ṭi lai lo.
16Na harnak cu na philh lai i tilian
a lanmi bantuk ceo khin
na cinken lai.
17Cun na nunnak cu chun nakin
a ceu deuh lai,
A muihnak cu zingka bantuk a si lai.
18Cun ruahchannak a um caah
hnangam tein na um lai
Pathian nih an huhphenh lai i
him tein naa din lai.
19Na it lai i ahohmanh nih na thin
an in phanter lai lo,
Mi tampi nih an in nawlpat lai.
20Sihmanhsehlaw miṭhalo cu
mitcawtnak nih khan
a tlakhnawh lai i
Luatnak lam vialte kha
a thlau hna lai,
An i ruahchanmi cu,
an thaw hmanung bik chuah kha
a si ko lai,” tiah a ti.
Currently Selected:
JOB 11: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
