JEREMIAH 50
50
Babilon Kong
1Babilon kong, Khaldi mi hna ram kong i Bawipa nih profet Jeremiah ka in a chimmi bia: #Isa 13.1—14.23; 47.1-15
2“Miphun kip sinah chim law
thanh tuah,
Hmelchunhnak tar law thanh tuah,
Thup hlah;
“Babilon cu a tlu cang,
Bel cu ningzahnak a phan cang,
Marduk cu a hnabei a dong cang,
Babilon siasal hna cu ningzahnak
an phan cang, a pathian deu hna cu
an hnabei a dong cang.
3Zeicahtiah anmah tuk awkah chaklei
in miphun pakhat a rung cang,
Pakpalawng hmun ah a ser lai i
khika ah minung siseh, saram siseh,
an um lai lo,”
tiah chim, a ti.
4Khi ni le khi caan ah cun Israel mi hna le Judah mi hna cu hmun khat ah an ra ṭi lai i Bawipa an Pathian cu mitthli he an kawl lai; 5Zion lei hoih in cuka kalnak ding lam cu an hal hna lai i, “Ra tuah u, zungzal hmunmi, philh khawh lo ding biakamnak in Bawipa sinah i peh u sih,” an ti lai, tiah Bawipa nih a ti.
6Ka mi cu tuu tlau an si cang, an tuukhal hna nih khan a pingah an kalter hna i tlang cungah khan an duhnak kip ah an vaihter hna; tlang pakhat in tlang dang pakhat ah an kal lengmang i an kawm kha an philh cang. 7A hmumi hna paoh nih khan annih cu an ei hna i an ral hna nih cun, “Annih nih Bawipa cungah an sual caah kannih nih kan tuahmi hi cu sual a si lo. An pupa hna nih khan Bawipa cu an rak i bochan i annih zong nih hin amah sinah cun zumhawktlak tein an um ve awk a si,” tiah an ti.
8Israel mi hna, Babilon ram in zam u,
Khaldi mi hna ram khan zam tuah u;
Hmaiah kal u law saṭil run a hruitu
mehehtum bantuk kha si tuah u. #Biat 18.4
9Zeicahtiah chaklei i a ummi miphun,
a ṭhawngmi bu khat kha
ka cawlcanghter hna lai i,
Babilon kha ka dohter hna lai;
Babilon khua cu an nam lai i
an tlaih lai.
An i tinhmi a ngan bal lomi thal kah
thiam hna bantukin an cantiang cun
an kah.
10Khaldi mi cu ramh an si lai i
a ramhtu hna nih khan
an duhmi paoh cu tling tein
an i lak lai, tiah Bawipa nih
a ti.
11Babilon mi hna, nanmah nih
ka miphun kha nan hrawh hna;
Nan tha a nuam, nan lung aa lawm i
facang cil dih hnuah cawla nih
a duhduh in a lek bangin
nan le nain le rangtum bangin
nan awn nain,
12Nan nu cu hmaichiatnak fakpi
a ing lai i
Nanmah an hringtu hna cu a ning
a zak lai.
Babilon cu miphun hna lakah
a hme bik a si lai,
ti um lonak thetse ram car
a si lai.
13 Bawipa thinhunnak ruangah Babilon
ah cun ahohmanh an um lai lo,
A ṭiao dih cikcekmi hmun a si ko lai;
A pawng i a kalmi paoh cu an tuksa
a purh hna lai i a cung i a tlungmi
ruangah an khuaruah a har lai.
14Li le thal a tlaimi vialte hna,
Babilon cu a kulh in i tiang tuah u;
Amah cu kap u, nan cantiang cu
semrel hna hlah u,
15Amah cu teinak in auhnawh u, a kut
a hler cang;
A ralvennak buk kha an cim cang,
a ralhau kha an rawk cang;
Mah hihi Bawipa nih a cungah
phuhlamnak a tuahmi cu a si.
Amah cungah cun phuhlamnak
tuah ve u,
Amah nih a rak tuah bang khan
a cungah tuah ve u.
16Babilon i thlaici tuhtu vialte kha
hrawk dih hna u,
Rawl ṭuan caan i faah a tlaitu vialte
kha hlo dih hna u.
Khika i a ummi ramdangmi
vialte hna cu,
Cu ram a tutu ralkap hna an ṭih
hna caah,
Anmahle an miphun cio sinah le
anmahle an ram cio ah khan
an kir dih lai;
17Israel mi cu chiandeih nih a dawi i
a ṭhek dihmi tuurun bantuk a si;
An sa a ei hmasa biktu kha
Assiria siangpahrang a si i
An ruh a ṭam hmanung biktu kha
Babilon siangpahrang a si.
18Cucaah Ralkapbu Bawipa, Israel
Pathian nih hi bangin a ti:
Assiria siangpahrang dan ka tat
bantukin Babilon siangpahrang le
a ram cu dan ka tat lai.
19Israel cu a tlon tawnnak hmun ah
khan ka kirpi ṭhan lai i
Karmel le Bashan ah khan a tlong
ṭhan lai;
Efraim ram tlang hna le Gilead ram
tlang hna cungah khan a paw khim
tein rawl a ei lai.
20Cu caan a phak tikah Israel mi hna chungah sualnak hmuh a si lai lo i Judah mi hna chungah ṭhat lonak hmuh a si lai lo; zeicahtiah ka nuntermi hna cu an sualnak kha ka ngaihthiam hna lai, tiah Bawipa nih a ti.
21Merathaim ram cu do u;
Cu ram le Pekod i ummi hna cu
do hna u;
Vainam in that dih hna u law
hrawk cikcek hna u,
Keimah nih kan fialmi hna paoh kha
tuah dih u, tiah Bawipa nih a ti.
22Ram chung i ral tuknak thawng le
rawhralnak thawng nganpi cu
ngai hmanh u!
23Zeitindah vawlei pumpi a rak dengtu
sobul kha aa cheu i a kuai dih
cikcek kha zohhmanh u,
Zeitindah Babilon cu miphun hna
lakah tuksapur ah a can ee!
24Maw Babilon, rap na chiah i
nangmah rawhnak caah a si;
Hngalh loin nangmah le nangmah
naa foih ai;
Khakha na si cang ko khah, naa foih
ko cang khah,
Zeicahtiah Bawipa pei
na zuamcawh cu.
25 Bawipa nih a ralthuam chiahnak cu
a hun i a thinhunnak hriamnam
kha a chuah hna,
Zeicahtiah Ralkapbu Bawipa nih
Khaldi mi hna ram ah ṭuan awk
rian pakhat a ngeihmi cu
hihi a si.
26A rawlṭuan caan kha a phan cang:
A buk kha kau hna u law rawl cu
a pon in pong hna u,
Hrawk cikcek u law a nungmi pakhat
hmanh ngan hna hlah u.
27A ralkap cu that dih hna u, thahnak
hmun ah vun kalpi hna u.
An caah ngaihchia a va si dah!
An ni, an dantat caan cu
a phan cang.
28Babilon in a luatmi saltang hna cu
Zion ah an ra i
Babilon mi hna nih Bawipa biakinn
cung i an tuahmi thil ruangah
Bawipa kan Pathian nih an cung i
phuhlamnak a tuahmi kha
an rung chim.
29Nan cantiang in paw vungmang in
Babilon cu kap u,
Nannih nan likuk a za sih cia in
a ummi hna.
A velchum in nan riahbuk in kulh u,
pakhat hmanh luatter hna hlah u.
Ṭhat lonak a tuahmi thil vialte kha
lehrul dih u;
Amah nih Bawipa, Israel Mi Thiang
kha zei ah a rel lo caah
Amah nih a rak tuah bantuk khan
a cungah tuah ve u. #Biat 18.6
30Cucaah a tlangval hna cu khualak lam
ah khan an ril lai i
Khi ni ah a ralkap hna cu
thihnak chungah dai tein an it lai,
tiah Bawipa nih a ti.
31Babilon, nangmah cu na lung a puam
caah kan ralchanh,
Nangmah dan kan tat lai caan,
na ni cu a phan cang, tiah
Bawipa, Ralkapbu
Pathian nih a ti.
32Lungpuammi miphun cu a ril lai i
a tlu lai,
Amah a tungtu ding ahohmanh
an um lai lo;
A khua cu mei in ka khangh lai i
a velchum i a ummi thil vialte cu
a kangh dih hna lai.
33Israel mi le Judah mi cu hrem ṭi an si,
Anmah a tlaitu hna nih khan
fek tein an hren hna i an thlah duh
hna lo.
34Sihmanhsehlaw bawmtu ṭhawng
an ngei,
A min cu Ralkapbu Bawipa a si;
Amah hrimhrim nih an bia cu
a chimpiak hna lai,
Babilon le a mi hna cungah cun
harnak le hnahnawhnak
a tlunter lai.
35Khaldi mi hna le Babilon i a ummi
hna le an bawi hna le an mifim hna
cungah vainam aa thlai ko,
tiah Bawipa nih a ti.
36Nal profet hna cungah vainam
aa thlai ko, annih cu mihrut
an si cang;
A ralkap hna cungah aa thlai ko,
annih cu an lung a dong cang;
37A rangtum hna le a rangleng hna le
a chung i a ummi mizapi hna
cungah khan aa thlai ko,
annih cu nu bantuk an si lai;
A chawhlawn cungah aa thlai ko,
ramh an si dih lai;
38A ti cungah aa thlai ko, an kao dih lai;
Zeicahtiah hi ram cu siasal biaknak
ram a si,
An pathian ṭihnung pipi kha
sunparnak an pek hna.
39Cucaah Babilon cu cenghngia le sa-ui umnak hmun ah a cang lai i ramcar chimbu khuasaknak hmun ah a cang lai; minung umnak hmun cu a si bal ti lai lo i ahohmanh nih an hlumh lomi hmun a si thluangthluan lai. #Biat 18.2 40Pathian nih Sodom le Gomorrah le an pawngkam khua hna kha a hrawh tik hna ah khika ah mi ahohmanh an um ti lo bantukin a chungah ahohmanh khua an sa ve lai lo, tiah Bawipa nih a ti. #Gen 19.24-25
41Zohhmanh, miphun pakhat chaklei in
a ra, miphun nganpi a si,
Siangpahrang ṭhawngṭhawng hna kha
vanhramdeng in an i hlau cang;
42Li le vainam kha an i bei,
Mipuar ngai, zaangfahnak ngei lomi
an si.
Rangtum kha an i cit hna i an thawng
cu rili thawng bantuk a si;
Annih cu nangmah doh awk i
aa tiangmi an si, maw Babilon.
43An thawng cu Babilon siangpahrang
nih a theih i a kut cu a tha a duai;
Nau nganfah a ingmi nu nganfahnak
bantuk nih a tlaih cang.
44Zohhmanh, Jordan tiva kam tupi
chungin a chuak i zungzal in
a hringmi saṭil tlonnak ram lakah
a ra chuakmi chiandeih bantukin,
Keimah nih mi vialte kha ka dawi
dih hna lai i
Tuukawng ṭha bikbik kha ka tlaih
dih hna lai.
Zeicahtiah keimah bantuk hi
ahodah a um?
Keimah tluk hi ahodah a um?
Tuukhal aho tal ka hmaiah
a dir khomi an um maw?
45Cucaah Babilon cungah Bawipa nih khua a khanmi le Khaldi mi hna ram cung i aa tinhmi hi thei tuah hna u:
Tuurun chung i a no tete hna cu
kalpi an si lai i
An tlonnak hmun cu an cung i
a tlungmi thil ruangah cun
khuaruahhar in a um lai.
46Babilon cu a tluk tikah a thawng
a than tuk caah vawlei aa hnin i
A ainak thawng cu miphun zakip
sin tiang a thang.
Currently Selected:
JEREMIAH 50: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
