JEREMIAH 49
49
Ammon Mi Kong
1Ammon mi hna kong ah
Bawipa nih hi bangin a ti:
“Israel nih hin fapa a ngei
hna lo maw?
Rocotu a ngei lo maw?
A si kun ah cun, zeicahdah Milkom
nih Gad ram cu a co i
Amah a biami hna cu Gad ram chung
khua ah hin an um? #Eze 21.28-32; 25.1-7; Amo 1.13-15; Zef 2.8-11
2Cucaah zohhmanh, Ammon mi hna
khua Rabbah ah khan raltuknak
thawng ka thanter lai caan kha
a ra lio, tiah Bawipa nih a ti;
Ṭiaotakmi hnawmpon ah a cang lai i a khuate hna cu mei in khangh cikcek an si lai i
Israel nih a rak pawnchuahtu hna kha
a pawnchuah ve hna lai,
tiah Bawipa nih a ti.
3Maw Heshbon ṭap tuah, zeicahtiah
Ai khua cu a rawk dih cang.
Rabbath Ammon khua pawngkam i
a ummi khuate hna, ai tuah u,
Buri i hruk u law, nan ṭang i
cum tuah u,
nan pum cu nam in i at dih tuah u.
Zeicahtiah Milkom cu saltannak
chungah a kal lai,
A tlangbawi hna le a bawi hna he
khan an kal lai.
4Nannih ṭhawnnak a dong
cuahmahmi hna,
Zeicahdah nan ṭhawnnak cu
nan i porhlawt len ko?
Nannih mah hriamnam aa bochanmi
lamtlaumi hna,
Zeicahdah nan hriamnam cu
nan i bochan i
‘Ahohmanh nih an kan tu ngam
lai lo,’ nan ti?
5Zohhmanh, a kenkip in nan cungah
ṭihnung ka tlunter lai i
A ping i a zammi kha a pumkhawltu
ding ahohmanh um loin
nan dihlak in i comcawroi loin
nan zam lai.
6Sihmanhsehlaw hi hnuah hin
Amon mi hna cu,
An vanṭhatnak kha ka pek ṭhan hna
lai, tiah Bawipa nih a ti.
Edom Kong
7Hihi Edom kong ah Ralkapbu Bawipa
nih a chimmi cu a si:
Teman ah fimnak a um ti lo maw?
A mifim hna kha ruahnak cheuh
an thiam ti lo maw?
An fimnak kha a thu cang maw? #Isa 34.5-17; 63.1-6; Eze 25.12-14; 35.1-15; Amo 1.11-12; Oba 1-14; Mal 1.2-5
8Dedan khuami hna cu an i mer i
an zam i lamhlapi ah an i thup;
Zeicahtiah Esau tefa hna cu
ka hrawh cang hna lai,
An cung i dantatnak ka tlunter
caan kha a phan cang.
9Mitsur thei lotu kha nan sinah an rat
tikah a mua cu an nganh ding a si,
Cun zan ah mifir nih na thei tlaiter
kha fir seh law
A duhmi lawng kha a lak ko lai.
10Sihmanhsehlaw Esau cu
a takfangkarao in ka chiah,
Aa thuhnak hmun kha ka hun hna i
thuhnak hmun khuazeihmanh ah
a ngei ti lo.
A fale hna le a unau hna le
a innpa hna kha hrawh an si i
Amah bawmtu ahohmanh an um ti lo.
11Ngakṭah na fale cu ka sinah
kaltak hna law keimah nih
nungdam tein
ka zohkhenh hna lai;
Na nuhmei hna nih keimah cu
ka hngal ṭhan hna seh, a ti.
12“Dantat awkah aa tlak lomi hna hmanh nih dantatnak hrai kha an din ahcun, nang cu dantat loin ka luat hnga tiah maw naa ruah? Na luat lai lo, hrai cu na din hrimhrim lai. 13Bozrah khua cu tuksapur le ṭiaotakmi khua ah a cang lai i mi nih an nihsawh lai i a min cu chiatsernak ah an hman lai. A pawngkam khuate vialte cu zungzal in an rawk lai, tiin keimah nih chiat ka ser cang,” tiah Bawipa nih a ti.
14Jeremiah nih, “Miphun hna sinah
lamkaltu kha thlah a si i
‘Nan ralkap hna cu pum hna u law
Edom cu tu u,
I tuknak ding caah khan tho u,’
tiah a au tikah khan.
Hi bia cu Bawipa sinin ka theih,”
tiah a ti.
15“Zohhmanh, nangmah cu miphun
hna lakah a hme bik le mi vialte i
nihsawhmi ah kan ser.
16Celh awk loin naa porhlawtnak le
na lung puamnak nih khan
a ping ah an kalpi cang,
Lungpang chung lungkua ah na um i
a sannak tlangpar hna kha
na ta an si,
Asinain, muvanlai tluk sang in
na bu ser hmanh law,
khika in kan ṭhumh lai,”
tiah Bawipa nih a ti.
17Edom cu tuksapur a simi hmun ah a cang lai; khikalei i a kalmi paoh cu an tuksa a purh hna lai i a cung i harnak a tlungmi vialte ruangah khan an nihsawh lai, 18Sodom le Gomorrah le an pawngkam khua vialte bantuk khan a rawk lai, tiah Bawipa nih a ti. Khika ah ahohmanh khua an sa lai lo, minung ahohmanh innlo a khuarmi an um lai lo. #Gen 19.24-25 19Zohhmanh, Jordan tiva kam tupi chungin a hung chuak i zungzal in a hringmi saṭil tlonnak ram lakah a ra chuakmi chiandeih bantukin keimah nih Edom mi vialte kha ka dawi dih hna lai i tuukawng ṭha bikbik kha ka tlaih din hna lai. Ahodah keimah bantuk hi a um i ahodah keimah tluk hi a um? Tuukhal aho tal ka hmaiah a dir khomi an um maw? 20Cucaah Edom cungah Bawipa nih khua a khan mi le Teman khuami hna cung i aa tinhmi hi thei tuah hna u: Tuurun chung i a no tete hna cu kalpi an si lai i an tlonnak hmun cu an cung i thil a tlungmi ruangah cun khuaruahhar in a um lai. 21Edom cu a tluk tikah a thawng a than tuk caah vawlei aa hnin lai i a ainak thawng cu Rili Sen tiangin a thang lai. 22A thla aa samh riangmang i van sangpi khin a vun namtu muvanlai bantukin Bozrah cu a ral nih a nam lai. Khi ni ah Edom ralkap hna cu nau nganfah a ing liomi nu bantukin an thin a phang lai.
Damaskas Kong
23Damaskas kong ah Bawipa nih
a chimmi bia:
Hamath le Arpad cu thawng ṭhalo
an theih caah an hnabei a dong;
A dai kho lomi rili bantukin
an khuaruah a har caah
an i let lengmang ko. #Isa 17.1-3; Amo 1.3-5; Zek 9.1
24Damaskas cu a lung a dong cang i
a zam;
A thin a phang, a therh i nau nganfah
nih a tlaih cang.
25Lunglawmhnak khua a rak si tawnmi,
Lawmhnak hla an sak tawnnak khua kha,
Ngaihchia lungleng a si ai cang.
26Cucaah khualak lam ah a tlangval hna
cu an tlu lai i
Khi ni ah a ralkap hna cu thihnak
chungah dai tein an it ko lai, tiah
Ralkapbu Bawipa nih a ti.
27Cun Damaskas kulhnak vampang cu
mei in ka duah lai i
Benhadad siangpahrang inn hna cu
a kangh dih hna lai.
Kedar le Hazor Kong
28Babilon siangpahrang Nebukhadnezzar nih a teimi Kedar miphun le Hazor khua uktu bawi hna kong ah Bawipa nih a chimmi bia:
Tho tuah u, Kedar cu tu tuah u,
Nichuahlei mi Arab mi hna kha
hrawk hna u.
29An thlam hna le an tuurun hna le
an puanzar hna le an thilri vialte
kha chut dih hna u,
An kalauk zong kha kalpi hna u law,
Mi cu, ‘Nan velchum in ṭihnung
a um,’ tiin chim hna u.
30Zam u, zam u, khulrang in zam u,
Maw Hazor i a ummi hna, lamhlatpi
ah vaa thup u,
Zeicahtiah Babilon siangpahrang
Nebukhadnezzar nih nan ca i
ṭhat lonak dingah khua a khan i
tinhmi pakhat a ser cang,
tiah Bawipa nih a ti.
31Tho u, a daithlangmi miphun kha
fuh hna u sih,
An ruahnak sawhsawh lawng i
him tein khua a sa i
kutka siseh, kothrolh siseh,
a ngei ṭung lomi kha
tu hna u sih.
32An kalauk hna cu hranchaw ah
kalpi an si lai i
An saṭil run tampi hna cu
hranchaw ah an cang lai.
An bep sam aa metmi hna kha
a kenkip ah ka ṭhek hna lai i
An pawngkam hmun kip in
an cungah rawhralnak ka ratter lai;
33Hazor cu cenghngia tlonnak hmun ah
ka ser lai i zungzal in a rawk ko lai;
Khika ah ahohmanh an um lai lo i
ahohmanh nih innlo an khuar lai lo,
tiah Bawipa nih a ti.
Elam Kong
34Judah siangpahrang Zedekiah a bawi hramthawk ah Elam kong i profet Jeremiah sinah Bawipa bia a rami: 35Hi bangin Ralkapbu Bawipa nih, a ti:
Zohhmanh, Elam likuk, an ṭhawnnak hriamnam ṭha bik cu ka khiah lai; 36Van ṭhen li i ṭhenmi khan Elam cungah thli pali ka tlunter lai; Hi thli pali hna sinah hin ka ṭhek hna lai i Elam ram in saltang an phanh lonak miphun zeihmanh an um lai lo. 37Elam cu anmah hrawh awk aa timmi an ral hna hmaiah khan ka hrawh lai. An cungah ka thinhunnak ka chuahter ciammam lai i ka hrawh dih hna lai, an loh cikcek hlantiang, vainam in ka hrem hna lai. 38Khi tikah ka bawiṭhutdan cu Elam ah ka chiah lai i khika siangpahrang le a bawi hna cu ka hrawh hna lai, tiah Bawipa nih a ti.
39Sihmanhsehlaw hmailei caan ah cun Elam cu a vanṭhatnak kha ka pek ṭhan lai,” tiah Bawipa nih a ti.
Currently Selected:
JEREMIAH 49: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
