JEREMIAH 51
51
1Hi bangin Bawipa nih a ti:
Zohhmanh, Babilon khua le
Khaldi ram i a ummi hna
ralchanhtu dingah hrawktu
thlichia ka thawhter lai,
2Cun Babilon ah facang vamtu
ka thlah hna lai i
Amah cu an vamh lai i a ram cu
an hrawh lai;
Harnak ni a tlun tikah a kenkip in
an tuk lai.
3Babilon ralkap hna cu an likuk
a za sih le thir angki
i aihnak caan kha pe hna hlah u;
A tlangval hna kha pakhat hmanh
ngan hna hlah u,
A ralkap vialte kha that dih hna u.
4Khaldi mi hna ram chungah khan
thi hna seh,
An khuapi chung lam ah khan
ril liangluang ko hna seh.
5Israel le Judah cu an Pathian,
Ralkapbu Bawipa nih
a ma hna lo,
Sihmanhsehlaw Khaldi mi ram cu
sualnak in a khat i
Israel Mi Thiang nih a hlawt cang.
6Babilon in zam tuah u, nan nunnak i
khamh cio tuah u!
Cu ti nan tuah lo ahcun,
Hi caan hi Bawipa nih phu a hlam
caan, lehrulhnak a pek caan
a si caah
Amah sualnak ruangah khan
nan rawk ve sual lai.
7Babilon cu Bawipa kut chung i
sui hrai, vawlei vialte a ritter
dih tu a si;
Miphun hna nih a mitsur hang cu
an din i cu nih cun
a molhter dih hna. #Biat 17.2-4; 18.3
8Chikkhat ah Babilon cu a tlu i
a kuai ko;
Amah cu ṭah tuah u!
A hma caah khan si va la tuah u,
a hei dam phum ko hnga dah kaw.
9Khika i a ummi ramdangmi hna nih,
“Babilon cu bawmh awk
kan i zuam, sihmanhsehlaw
a tlai tuk cang.
Cucaah ra u law kaltak u si law
kan inn cio ah tlung u sih.
Pathian nih a ṭhawnnak dihlak in
Babilon cu dan a tat cang i
a hrawh cikcek cang,” tiah an ti. #Biat 18.5
10 Bawipa nih, “Ka mi hna, au u law,
‘Kannih cu kan sual lo kha Bawipa nih
nih fiang tein a langhter cang;
Ra u law, Bawipa kan Pathian nih
a tuahmi cu, Zion ah
thanh u sih,’ ti u,”
tiah a ti.
11 Bawipa nih Babilon kha
hrawh a timh caah
Medes siangpahrang lungthin kha
a cawlcanghter hna,
A biakinn an hrawh ruangah hi
bangin an cungah phu a hlam lai.
Ral a tutu ralbawi hna nih,
“Nan cantiang kha ta hna u!
Nan phaw kha i bei hna u!
12Babilon kha tu cang u, tiah
hmelchunhnak alan thlai cang u.
Ralvengtu kha chap hna u,
sentari kha chia hna u,
lamhruang attu dingmi kha
chia hna u!” an ti.
Bawipa nih tuah a timhmi kha
a tuah cang i
Babilon mi hna cungah ka tuah lai
tiah a timi kha a tuah cang.
13Maw khuapi rum, ti tampi pawng i
khua a sami,
Na donghnak cu a phan cang,
na nunnak hri cu a cat cang. #Biat 17.1
14 Bawipa hrimhrim nih, ‘Rel cawk lo
a simi khaubawk zat in minung in
ka rak in khahter,
Sihmanhsehlaw na cungah teinak
vahla thlorh a si cang lai,”
tiah chiatser in a ti.
15Pathian nih vawlei hi a ṭhawnnak
in a ser,
Vawlei hi a umnak hmun ah hin
a fimnak in a umter;
Van khi a thiamnak in a samh hna.
16Nawl a pek hna bangin vancung i
ti khi an awn,
Vanhramdeng in minmei kha a thawhter.
Ruah chungah cun nimtlau
a lekter hna i
A thilkhonnak chungin thli kha
a chuahter hna.
17Mi vialte hi mihrut, hngalhnak
ngei lo an si dih,
Sui sertu vialte hna hi an siasal
sermi hna nih hin zumhawktlak lo
an siter dih hna.
Zeicahtiah an milem sermi hna cu
hlennak men an si i
an chungah thaw a um lo.
18Annih cu zeihmanh man an ngei lo,
nihchuak men a si,
An biaceih ni a phak tik i a rawk men
ding an si.
19Jakob sertu Pathian cu hi hna
bantukin a si lo,
Zeicahtiah amah cu zeizong vialte
sertu a si i
Israel hi amah ca hrimhrim i
aa kawhmi miphun a si,
Amah a min cu Ralkapbu Bawipa a si.
20 Bawipa nih Babilon cu, Nang cu
ka sobul le ka ral hriam na si;
Nangmah in miphun hna cu
ka khuai cikcek hna,
Nangmah in ram cu ka hrawh hna;
21Nangmah in rangtum le a cung i
aa citmi cu ka thah hna,
22Nangmah in rangleng le rangleng
aa cittu cu ka den hna;
Nangmah in pa hna le nu hna cu
ka den hna,
Nangmah in tar le no cu ka den hna,
Nangmah in tlangval le ngaknu cu
ka den hna;
23Nangmah in tuukhal le a tuurun cu
ka den hna,
Nangmah in lei lettu le a rangtum
hna cu ka den hna;
Nangmah in ram ukbawi le ralbawi
hna cu ka den hna, tiah a ti.
24Cu bantukin Babilon le Khaldi mi
hna cu
Na mit hmuh i Zion cung i ṭhat lonak
an tuahmi ruangah
Teirul ka cham hna lai, tiah
Bawipa nih a ti.
25Maw Babilon, nang cu vawlei pumpi
a hrawktu tlang bantuk na si,
Nangmah cu kan ralchanh cang;
Nangmah cu ka kut kan samhhnawh lai i
Cangdonh lo na sermi ah cun
kan hrilh lai i
a kangmi tlang ah kan ser lai.
26Na lung cu pakhat hmanh innkil lung
caah hman a si lai lo i pakhat
hmanh innhram caah hman
a si lai lo;
Nangmah cu zungzal in ṭiaotakmi
hmun na si lai, tiah Bawipa nih a ti.
27Ram chungah, ral tuk ah
i thawh cang u, tinak
hmelchunhnak alan kha thlai u,
Miphun hna lakah muko kha
tum tuah u,
Miphun hna cu amah doh awkah
tim hna u,
Ararat, Minni le Ashkenaz ram hna
cu amah doh awkah ko hna u;
Amah dotu ah ralbawi ngan bik
pakhat chia tuah,
Khaubawk bupi zat in rang kha
hunpi hna.
28Amah doh awkah miphun kha tim hna u,
Medes siangpahrang le a ram uktu
bawi hna le a upa hna le amah nih
a ukmi vialte hna kha,
amah doh awkah tim hna u.
29Babilon cu ṭiaotakmi hmun le
mi um lonak hmun siter awkah
Bawipa nih Babilon kong i aa tinhmi
kha a tlin cang caah
Vawlei cu a ther i aa hnin.
30Babilon ralkap hna nih raltuk
an ngol cang,
An ralhruang chungah khan
a thuh in an i thup;
An ralṭhatnak a dong cang i
nu bantuk an si cang.
A inn cu mei in an khangh hna i
a kutka hrenhnak hna cu
an kiak cang.
31Babilon siangpahrang cu,
Na khualipi kha a kam kip in
luhhnawh a si cang
ti chimh awkah
Zualko pakhat hnu pakhat nih
an tlikhnawh.
32Tiva tannak hna kha ral nih
an tlaih cang hna i
Ralhau cu mei in an khangh hna i
Ralkap cu zeiti um awk hngal loin
an um, an ti.
33Ralkapbu Bawipa, Israel Pathian nih,
Babilon cu facang cilnak phuhri
bantuk a si,
A rauh hlanah a cungah facang ṭuan
caan a phan lai, tiah a ti.
34Zion i a ummi hna nih,
Babilon siangpahrang
Nebukhadnezzar nih a kan ei i
car dihlak in a kan dawp,
Um lawng bantukin a kan toh.
Rulpi bangin a kan dolh,
Kan sa thawthaw in a paw cu
a khahter i a kan luak.
35Kan cung i zaang-ennak tuahmi le
phuhlamnak tuahmi hi
Babilon cungah tla seh, an ti lai.
Jerusalem i a ummi hna nih,
Kan thisen cu Khaldi ram i a ummi
hna cungah tla seh, an ti lai.
36Cucaah hi bangin Bawipa nih a ti:
Zohhmanh, na bia cu kan chimpiak
lai i na phu kha kan hlampiak lai;
A rili cu ka kaoter lai i a tiput hna cu
ka carter hna lai;
37Cun Babilon cu a rawkmi thil pon,
Cenghngia tlonnak hmun, tuksapur le
cekcekhnawhmi hmun,
A chung i mi a um lomi hmun ah
a cang lai.
38Babilon mi hna cu chiandeih bangin
an awn lai,
Chiandeih fano bangin
an ngur len lai.
39An zu dinnak cu zawtnak in
ka donghter lai i
An rit tuk ah an i ngerh len lai i
an i lawng len lai.
A dong lomi hngilhnak chungah khan
an tla lai i
An i hlau ti lai lo, tiah Bawipa nih a ti.
40Thahnak hmun i kalpimi tuufa hna le
tuukawng le meheh tum bantukin
ka kalpi hna lai.
41Babilon vawlei cung dihlak nih
an hlorhmi cu tlaih a si cang;
Babilon cu miphun hna lakah
tuksapur ah a cang cang!
42Rili nih Babilon cu a phum cang,
A awn hluahmahmi tilet hna nih cun
an khuh cang.
43A khuapi hna cu hmun rocar ah
an cang cang,
Hmun car le thetse ram an si cang,
Ahohmanh um lonak ram, minung fa
ahohmanh nih an pal lomi ram
a si cang.
44Babilon ah Bel cu dan ka tat lai i
A dolhmi kha ka chakter ṭhan lai;
Miphun hna cu amah sinah khan
an ra tungmang ti lai lo,
Babilon kulhnak vampang cu
a cim cang;
45Amah chungin chuak tuah u,
maw ka mi hna,
Bawipa thinhunnak ṭihnung chung cun
mi kip nih mahle nunnak kha
i khamh cio hna seh!
46Ram chung i thawngpang
nan theihmi kong ah
nan lung dong hlah u law
nan thin zong phang hlah u,
Zeicahtiah kum khat ah thawngpang
pakhat a um, cun a kum nolh ah
thawngpang dang a um ṭhan,
Ram chungah hnahnawhnak a um i
uktu pakhat nih uktu dang
pakhat kha a doh, tiin a um tawn.
47Cucaah zohhmanh, Babilon milem
hna cu dan ka tat hna lai ni cu
a ra lio, tiah Bawipa nih a ti;
A ram cu a ning piin ningzahnak
a phan lai,
A mi an thahmi hna cu a chungah cun
an ril liangluang ko lai.
48Van le vawlei le a chung i a ummi
thil vialte hna nih,
Babilon cu a tluk caah lunglawmhnak
in hla an sa lai;
Zeicahtiah chaklei in a rami ral hna
nih, amah cu an tei lai, tiah
Bawipa nih a ti. #Biat 18.20
49Vawleicung khuazakip ah Babilon
nih mi kha a rak thah hna caah le
Atu ah Israel mi tampi a thah
hna caah
Babilon cu a tlu hrimhrim lai. #Biat 18.24
50A vainam chungin a luatmi hna,
kal u, dir hlah u;
Lamhlapi ah um hmanh u law, Bawipa
kha ka hngal camcin u,
Jerusalem kha nan lungchung in
ruat camcin u.
51Nannih nih, Kannih cu ningzahnak
kan phan,
Ramdangmi nih biakinn chung
hmunthiang kha an lak hna caah
hmaichiatnak nih a kan khuh,
nan ti.
52Cucaah zohhmanh, a milem hna cung i
biaceihnak ka tuah lai caan le
A ram chung dihlak ah hliammi
an hrum-ai len lai caan cu
a ra lio, tiah Bawipa nih a ti.
53Babilon cu van tawng in sang in,
A kulhnak vampang hna cu
ahohmanh kai khawh loin ser si
hna hmanh seh law,
A cungah hrawktu ka thlah
hna lai, tiah Bawipa nih a ti.
54Babilon khua chung i ṭah thawng cu
ngai hmanh.
Khaldi mi hna ram i rawknak nganpi
thawng cu.
55Zeicahtiah Bawipa nih Babilon cu
a ṭhio lio a si i
Khuachung thawngpang cu
a daihter lio a si.
Ralkap nih cun a awnmi tilet
bantukin an luhhnawh i
au thawng he an tuk.
56Hrawktu cu Babilon hrimhrim ah
khan an phan cang,
A ralkap cu an tlaih hna i an likuk cu
an khiahpiak hna.
Bawipa, teirul cham hmangmi Pathian
nih a lehrulh hrimhrim hna lai.
57A bawi hna le a mifim hna le
a ram ukbawi hna le
ralbawi hna le ralkap hna cu
Ka ritter hna lai;
A dong lomi hngilhnak chungah
an tla lai i
an i hlau ṭhan ti lai lo, tiah
Siangpahrang, a min Ralkapbu
Bawipa a simi nih a ti.
58Hi bangin Ralkapbu Bawipa nih
Babilon kulhnak vampang
a chah ngaingaimi cu
vawlei ah chimh a si lai,
A sangmi a kutka hna cu mei
in khangh an si lai.
Mi nih an ṭuanmi vialte cu
pakpalawng ca men ah a si cang,
Mi nih pakpalawng ca men ah an tha
an i dit, tiah a ti.
59Mahseiah fapa Neriah i fapa Seraiah cu Zedekiah Siangpahrang a zohkhenhtu bawi a si. Judah siangpahrang Zedekiah a bawi kum li kum ah cun Seraiah cu Babilon ah a kal i Jeremiah nih bia a cah. 60Jeremiah nih Babilon cung i a tlung ding ṭhat lonak vialte cu cauk chungah a ṭial dih hnuah 61Seraiah cu a thawh i, “Babilon nan phak tikah hika i aa ṭialmi bia vialte hi mi zapi theihhngan ah na va rel hrimhrim lai. 62Cun thla na cam lai i, ‘Bawipa, hi hmun hi ka hrawh lai i a chungah zeihmanh an um lai lo, minung zong an um lai lo, saram zong an um lai lo i zungzal in a ṭiaomi hmun a si lai,’ tiah na ti, na ti lai. 63Cun hi cauk cu na rel dih in lung na ṭem chih lai i Zufrates tiva chungah na paih lai i #Biat 18.21 64‘Hihi Babilon cung i a tlung ding cu a si — a pil lai i a tho ṭhan ti lai lo, zeicahtiah Bawipa nih a cungah ṭhat lonak a tlunter lai,’ na ti lai,” tiah a ti.
Hi tiang hi Jeremiah bia cu a si.
Currently Selected:
JEREMIAH 51: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
