JEREMIAH 48
48
Moab Kong
1Moab kong ah Ralkapbu Bawipa,
Israel Pathian nih hi bangin
a ti:
“Aize, Nebo cu a lo i a ṭiao cang ai!
Kiriathaim cu lak a si cang i
a mual a pho cang ai!
Misgab cu ningzahnak a phan i
a hnabei a dong cang; #Isa 15.1—16.14; 25.10-12; Eze 25.8-11; Amo 2.1-3; Zef 2.8-11
2Moab minthannak cu a um ti lo.
Heshbon ah a cung ṭhat lonak ding
kha khua an khan:
‘Ra u law hrawk dih u sih,
miphun si ti hlah seh,’ an ti.
Nannih Madmen i a ummi hna zong
tuk nan si lai i nan mi hna cu
vainam nih a dawi hna lai.
3Horanaim in nganfah ainak thawng
cu ngai hmanh:
‘Ṭiaonak le rawknak nganpi!’ an ti.
4Moab cu a rawk cang,
an au thawng cu Zoar tiang a thang.
5Luhith i hung kainak ah khan mi cu
ṭah buin an kai;
Horanaim i vung ṭumnak ah khan.
‘Rawknak,’ ti thawng kha an theih.
6‘Zam u, zam u, nan nunnak caah
zam u,
thetse ram i laa lee bantukin
zam tuah u,’ an ti.
7Moab, nangmah nih na ralhau hna le
na hriamnam hna kha
naa bochan caah,
nang zong lak na si ve lai;
na pathian Khemosh cu a tlangbawi
hna le a bawi hna he saltannak
chungah a kal lai.
8Hrawktu kha khua kip cungah
a tlung lai i
khua pakhat hmanh a luatmi
a um lai lo;
nelrawn cu a rawk lai i tlangcung
hmunrawn zong hrawh a si lai,
tiah Bawipa nih a ti.
9“Moab caah thlanlung phun tuah u,
zeicahtiah tunaite ah a rawk lai;
a khua hna cu an rawk dih lai i
Khika ah ahohmanh an um lai lo.”
10Daithlang in Bawipa rian a ṭuanmi cu chiat ko seh! Thisen chuah awkah a nam a hmang duh lomi cu chiat ko seh! 11Mitsur hang a ne a tho bal lomi bantukin Moab hi hnahnawh lo tein a um zungzal ko;
Um khat hnu um khat i tlennak kha
a tong lo,
Saltannak kha a tong lo;
Cucaah a thawtnak kha a chungah
a tang i a rim zong aa thleng lo.
12Cucaah ralca cu a thlutu dingah mi
ka thlah hna lai caan kha a ra lio;
An ralca cu an thluk hna lai i
an um vialte kha an tlen hna lai i
an den dih hna lai.
13Cun Israel cu aa bochanmi a pathian
Bethel nih a deuh bantuk khan
Moab cu a pathian Khemosh nih
a deuh ve lai, tiah Bawipa nih a ti.
14“Moab mi hna, zeitindah nannih nih,
Kannih cu ralṭha le ralkap ṭhawng
kan si,” nan ti khawh?
15Moab le a khua hna a hrawktu cu
a ra cang,
A tlangval hna lak i a ṭha bikbik cu
an thi dih cang, tiah Ralkapbu
Bawipa a min a simi
Siangpahrang nih a ti.
16Moab tluknak ding cu a phan
cuahmah cang,
A rawknak ding cu a nai ko cang.
17Amah cu ṭah tuah u, nannih
a pawngkam i a ummi vialte hna,
amah minthannak a hngalmi hna;
nannih nih, “Aize, ralbawi
fung cu a kiak ai cang,
upatnak fung cu a kiak ai!” ti u.
18Nannih Dibon khuami hna,
nan sunparnak hmun khan rung ṭum
u law a carmi vawlei ah hin ṭhu
tuah u; zeicahtiah Moab a hrawktu cu
hika a phan cang i
nan ralhau kha a hrawh dih cang hna.
19Maw Aroer i a ummi hna,
lam pawngin dir u law zoh tuah u.
A zammipa le a zamminu kha rak hal
hna hmanh u law,
‘Zeitindah a si?’ tiah rak ti
hna hmanh u.
20“Moab cu a tlu cang; ai u law
ṭap tuah u!
‘Moab cu a rawk cang,’ tiah Arnon
tiva hrawn ah khan va thanh u,” an in
ti hna lai.
21Nelrawn khuapi hna cungah khan biaceihnak cu a tlung cang: Holon, Jahzah, Mefath. 22Dibon, Nebo, Beth-diblathaim, 23Kiriathaim, Beth-gamul, Beth-meon, 24Kerioth le Bozrah khua cungah khan biaceihnak cu a tlung cang. Moab ram khua vialte cungah, a hla mi he a naimi he, biaceihnak a phan cang. 25Moab ki cu tan a si cang i a ban cu a kiak cang, tiah Bawipa nih a ti.
26“Moab kha, Bawipa cu zei i a rel lo caah ritter law a luak ah khan i bual seh law nihsawhnak hmu seh. 27Moab, Israel mi kha zeitindah nihchuak capo i na ser hna kha philh hlah. Mifir hna lakah tlaihchihmi si hna seh law cu bang, cuticun na tuah hna khah.
28Maw nannih Moab ram mi hna,
Khuapi kha kaltak hna u law
lungkua ah va um u,
Lungkua kaa kam i bu a sami
ṭhuro bantuk si ko u.
29Moab porhlawtnak kha kan theih
cang, aa porhlaw taktak ko —
Aa uahnak le aa porhlawtnak le
a ruamkainak le a lungpuamnak
kha kan theih.
30A mi zeirellonak kha ka hngalh, tiah
Bawipa nih a ti;
Aa uanthlarnak cu pakpalawng a si,
a tuahnak cu pakpalawng a si.
31Cucaah Moab cu ka ṭah lai,
Moab ram chung i a ummi hna
paohpaoh caah cun lungfak ngaiin
ka ṭap lai;
Kir-heres mi hna cu ka ṭah hna lai.
32Jazer mi ka ṭah hna nak tam deuh in
Sibmah mi kha ka ṭah hna lai.
Maw Sibmah khuapi, nang cu mitsur
ruang a nge Rili Thi tiang a zam i
Jazer tiang a phanmi bantuk
na si,
Sihmanhsehlaw atu cu ṭhal caan i
na theitlai hna le na mitsur thei hna
cu hrawh an si cang.
33Thei tampi a tlai tawnmi
Moab ram khan
Lunglawmhnak le thanuamnak kha
lak an si cang;
Mitsur hang nennak hmun in mitsur
hang cu ka donghter cang;
Lawmhnak aw thawng he a neng
tawnmi kha an um ti lo,
Lawmhnak au thawng zeihmanh
a leng ti lo.
34Heshbon khuami hna le Elealeh khuami hna cu an ai i an ai thawng cu Jahaz tiangin a thang; Zoar i a ummi hna nih an rak theih i Horonaim le Eglath-shelishiyah tiangin a thang. Nimrim tivate hmanh kha a car dih. 35Cun Moab ram chung i khuahrumbo ah raithawinak le an pathian hna sinah zihmui khanghnak kha ka donghter lai, tiah Bawipa nih a ti. 36An ngeihmi chawva vialte kha a rawk dih cang caah Moab le Kir-heresmi hna cu, mi nih mithi zunngaih hla thonglawi in an tum bantukin, ka lung nih a ṭah hna. 37Annih nih an dihlak in an lu an i kawngh i an khahmul an i meh i an kut an i at i an tai ah buri an i venh. 38Moab ram chung i inncung hna ah le an tual kau pipi hna ah cun, ṭahnak hla dah ti lo cu zeihmanh a um lo; zeicahtiah Moab cu ahohmanh nih zei i an rel lomi um bangin ka khuai cang, tiah Bawipa nih a ti. 39Moab cu a hnabei dongh in ningzak in a zam ko. Moab cu nihsawh awkah a cang cang i a pawngkam i a ummi vialte hna caah hnabeidonghnak ah a cang cang.
40 Bawipa nih hi bangin a ti:
Zohhmanh, muvanlai nih
a thla aa samh i
a vun zuanhnawh bantuk khin,
Moab cu miphun pakhat nih
a zuanhnawh lai.
41Khuapi hna cu lak an si lai i
ralhruang hna cu tlaih an si lai;
Khi ni ah cun Moab ralkap hna
lung cu
Naunganfah a ing liomi nu lung
bantukin a dong lai;
42Khi tikah Moab cu hrawh a si lai i
miphun a si ti lai lo,
Zeicahtiah Bawipa kha zei ah a rel lo.
43Ṭihnung, khor le rap nih khan,
Moab mi cu an orh ko hna,
tiah Bawipa nih a ti.
44Ṭihnung chungin a zam khomi kha
khor chungah a tla lai,
Cun khor chungin a chuak khomi kha
rap ah aa foih lai.
Hi thil vialte hna hi dantatnak
an hmuh kum ah
Moab cungah ka tlunter lai,
tiah Bawipa nih a ti.
45Heshbon thladem tangah,
Bawmtu ngei lomi mizam hna cu
an i din;
Sihmanhsehlaw hmasa i
Siangpahrang Sihon nih
a rak ukmi Heshbon kha
a kang cuahmah len ko.
Raldoh a duhmi Moab mi hna ramri
hna le tlang sang hna cu
mei nih a kangh cang hna.
46Aize, maw Moab, na caah ngaihchia
a va si dah!
Khemosh pathian a biami hna cu
an lo ai cang;
Zeicahtiah na fapa hna cu saltannak
chungah kalpi an si cang i
Na fanu hna zong kalpi an si ve ai!
47Sihmanhsehlaw hmailei caan ah cun
Moab cu,
Vanṭhatnak kha ka pek ṭhan lai,
tiah Bawipa nih a ti.
Hi tiang hi Moab cung i
biaceihnak cu a si.
Currently Selected:
JEREMIAH 48: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
