JEREMIAH 46
46
Izipt Cu Karkhemish Ah A Sung Lai
1Miphun hna kong ah profet Jeremiah sinah Bawipa bia a rami:
2Izipt kong: Judah siangpahrang Jehoiakim, Josiah fapa a bawi kum li kum ah, Babilon siangpahrang, Nebukhadnezzar nih Zufrates tiva kam i Karkhemish khua ah a teimi Izipt siangpahrang Faro Neko i a ralkapbu kong: #Isa 19.1-25; Eze 29.1—32.32
3Phawpi le phawte he khan i tim u law
ral doh awkah hmaiah fong u!
4Rang kha danh hna u law i cit hna u,
maw rangleng ralkap hna!
Thir luchin chinh in umhmun khuar
tuah u,
Nan fei kha ta hna u law thir angki
kha i hruk hna u!
5Sihmanhsehlaw ka hmuhmi hi zeidah
a si kun?
An hnabei a dong i hnulei ah
an i mer,
An ralkap hna cu an ṭhuat chih len
hna i rianrang in an zam;
Hnulei i her hleng loin an le dih.
Ṭihnung cu thlah a si cang,
tiah Bawipa nih a ti.
6Khulrangmi kha an luat kho maw?
Ralkap zong kha an i khamh
kho maw?
Chaklei ah Zufrates tiva kamah
an ril i an tlu.
7Nail tiva lianh bantukin a lianmi hi
ahodah a si?
Tiva a ti a kai uahmahmi bantuk hi?
8Izipt hi Nail tiva lianh in a lian,
Tiva a ti a kai uahmahmi hna bantukin.
Aa thawh i, “Ka lian lai, vawlei hi
ka khuh dih lai,
Khuapi hna le an chung i a ummi cu
ka hrawh hna lai,” a ti.
9Maw rangcung ralkap hna, nam u,
Maw rangleng hna, nan biatak
chuah u!
Ralkap bu, hmaiah fong tuah u;
Ethiopia mi hna le phaw aa putmi
Put mi hna.
Likuk hruai cia in aa tlaihmi
Lidia mi hna, chuak tuah u.
10Hi ni cu Bawipa, Ralkapbu Pathian ni
a si, phuhlam ni a si,
A ral hna cung i phu aa hlam ni cu
a si.
Vainam nih a ei hna lai i a duhnak
a riam lai,
An thi cu a ri lai.
Zeicahtiah Bawipa, Ralkapbu Pathian
nih chaklei ram ah Zufrates tiva
kamah raithawinak kha a tuah.
11Gilead ah hung kal law damnak si
hung i lak tuah,
Maw Izipt fanu thiang.
Nangmah nih si tampi na hneksak
lengmang cang i
pakpalawng an si dih;
Na caah damnak zeihmanh a um lo.
12Miphun hna nih na aunak kha
an theih i,
Vawlei cu na kiaonak khan a khat.
Ralkap cu pakhat le pakhat an i pah i
an pahnih in hmun khat ah an ril.
13Babilon siangpahrang Nebukhadnezzar nih Izipt ram tuk awkah a rat tikah, Bawipa nih profet Jeremiah a chimhmi bia: #Jer 43.10-13
14“Izipt ah vung thanh u law Migdol ah
aupi tuah u,
Memfis le Tahpanhes ah cun
thanh tuah u;
‘Dir law timh cia tein um tuah,
Zeicahtiah vainam nih na pawngkam
cu a ei lai,’ tiah chim u.
15Zeicahdah Apis cu a zam?
Zeicahdah nangmah an cawmtu
pathian cu fek tein a dir lo?
Bawipa nih lengah a nam cang.
16Izipt mizapi hna cu an ril i an tlu,
pakhat le pakhat an i pah dih;
‘Tho tuah, kanmah mi hna sinah
khan, kan chuahnak ram ah khan
kir u sih,
Hremtu vainam hi zamtak u sih,’
tiah an i ti.
17Izipt ram siangpahrang Faro cu,
‘Thawng lawng Lian, Caan Tlolh
Ṭung,’ ti min kha pe u.
18“Ka nun bangin,” tiah
Siangpahrang, a min Ralkapbu
Bawipa a simi nih cun a ti.
Tlang hna lak i Tabor tlang a san
cem bantuk le
Karmel tlang cu rili cung sangpi ah
aa hlorh bantukin
Nangmah an dohtu dingmi
a ṭhawnnak cu a si lai.
19Saltang dingin nan thil i tim u,
Maw Izipt ram mi hna!
Zeicahtiah Memfis hi pakpalawng ah
a cang lai i a chungah
ahohmanh um loin a ṭiao lai.
20Izipt cu aa dawhmi cawla note a si,
Sihmanhsehlaw chaklei in tlep nih
a run ṭumhnawh cang.
21A ram chung i man phalh in a ṭuanmi
ralkap hna cu cenhmi cawfa bantuk
an si;
Sihmanhsehlaw annih zong an i let i
an zam,
an umhmun ah a dir ngammi
ahohmanh an um lo.
An ṭumchuk ni cu an cungah a phan
cang, biaceih an si ni caan cu.
22Izipt cu ral nih an fuh caah a zam i
rul awnh in a awn;
Mi nih thing an hau bantukin
hreitlung he an tuk.
23A tupi cu an vah dih i aa porhlaw
ti lo, tiah Bawipa nih a ti;
Zeicahtiah an minung hna cu
rel cawk lo an si i
an ralkap hna cu khaubawk nakin
an tam deuh.
24Izipt mi hna cu ningzahnak an phan,
chaklei miphun kut chungah sal ah
an tang cang.
25Thebes khua pathian Ammon cu
dan ka tat lai,
Izipt cu a pathian hna le a bawi hna
he khan dan ka tat lai;
Faro le amah aa bochanmi vialte hna
kha dan ka tat hna lai.
26Annih cu anmah hrawh aa tim
hrimhrimmi Babilon siangpahrang
Nebukhadnezzar le a ralkap hna kut
chungah ka chanh hna lai;
Sihmanhsehlaw hmailei caan ah cun
ram cu hlan bantukin mi an um
ṭhan lai, tiah Ralkapbu Bawipa nih
a ti.
27“Sihmanhsehlaw maw ka sal Jakob,
ṭih hlah,
Maw Israel, na hnabei dong hlah;
Zeicahtiah ram hlapi khan him tein
kan kirpi ṭhan hna lai i
Nan tefa hna cu sal i an tannak ram
khan ka kirpi ṭhan hna lai.
Jakob cu thadam tein a um ṭhan lai i
Nunnuam le thinphang lo tein
khua a sa ṭhan lai. #Jer 30.10-11
28 Bawipa nih,
ṭih hlah, maw Jakob, ka sal,
Zeicahtiah na sinah ka um ko.
Nanmah kan dawi hnanak miphun
hna cu an donghnak phakter hna
hmanh ning law nannih cu
kan donghter hna lai lo.
Nan i tlak bantukin dan in tat hna
hmanh ning law,
A hloh cu kan hlo hna lai lo, tiah a ti.
Currently Selected:
JEREMIAH 46: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
