JEREMIAH 42
42
Jeremiah Nih Johanan Bia A Cah
1Cun raltho pawl ralbawi vialte hna le Kareah fapa Johanan le Hoshaiah fapa Azariah kha mi vialte hna he a hme bik in a ngan bik tiang an ra i 2profet Jeremiah cu an thawh i, “Zaangfah kan in halnak hi kan cohlanpiak ko: Kanmah aiawh in le hi a tangmi hna aiawh hin Bawipa na Pathian sinah thlacam tuah; zeicahtiah nangmah nih na kan hmuh bangin mi tampi chung khan a tangmi cu tlawmte lawng kan si. 3Bawipa na Pathian nih cun kan kalnak ding lam le kan tuah dingmi thil kha a kan hmuhsak nakhnga thlacam tuah,” tiah an ti. 4Khi tikah profet Jeremiah nih cun annih cu, “Nan bia cu ka theih cang; nan duhnak bangin Bawipa nan Pathian sinah cun thla ka cam lai i Bawipa nih an leh hnanak paoh kha kan chimh hna lai; zeihmanh kan phehmi hna a um lai lo,” tiah a ti. 5Cun Jeremiah sinah cun, “Kannih nih kan chiatsernak kha kan zulh lo ahcun, Bawipa cu a ding le zumhtlak tehte kan cungah si ko seh! Bawipa na Pathian nih kannih chimh awkah nangmah an kuatmi paoh cu kan tuah lai, tiah bia kan i kam. 6Kan duh zongah, kan duh lo zongah, a sinah va kal, tiah kan in fialmi Bawipa, kan Pathian cu a bia kan ngaih lai; kan caah a ṭhat nakhnga a bia kan ngaih lai,” tiah an ti.
7Ni hra hnuah Bawipa bia cu Jeremiah sinah a ra. 8Cun Kareah fapa Johanan le ralkap pawl haotu hna a sin i a ummi vialte le mi vialte hna cu, a hme bik in a ngan bik tiang, a auh hna i 9annih cu a thawh hna i, “Hi bangin Bawipa, Israel Pathian, a sin i nan duhnak va chim awkah nan ka kaltermi nih cun, a ti: 10Hi ram chungah hin nan um ko ahcun kan tunmer hna lai i kan ṭhetṭhiam hna lai lo, kan phun hna lai i kan phawi hna lai lo, zeicahtiah nan cung i ṭhat lonak ka tuahmi kha kaa ngaichih. 11Babilon siangpahrang nan ṭihmi hi ṭih hlah u; Bawipa nih, “Ṭih hlah u, zeicahtiah amah kut chungin nannih cu khamh awk le chuah awkah nan sinah ka um ko,” tiah a ti. 12Nan cungah zaangfahnak ka langhter lai i amah zong nih an zaangfah ve hna lai i nanmah ram chungte ah hin an umter ko hna lai. 13Sihmanhsehlaw nannih nih, Bawipa nan Pathian cu a nawl ngai loin nan um sual ko hnga i, ‘Hi ram ah hin kan um lai lo. 14Izipt ram tu ah kan kal ko lai, khika ah cun ral dohnak kha kan hmu ti lai lo i muko aw thawng kha kan thei ti lai lo, rawl um lo ruangah rawlṭam in kan um lai lo i 15khika ah khua kan sa ko lai,’ nan ti sual ko hnga. Khi ti a si ahcun, maw Judah mi a tangmi hna, Bawipa bia hi thei tuah u. Hi bangin Ralkapbu Bawipa, Israel Pathian nih a ti: Izipt ram chung i va luh awk le khika i va um awk kha nan i timh peng ko a si ahcun, 16nan ṭihmi vainam nih khan khika Izipt ram ah cun an dawi cuahmah ko hna lai i khika ah nan thi lai. 17Izipt ram i va kal i va um awkah aa tim pengmi vialte cu vainam le mangṭam le rai in an thi lai; an cung i ka tlunter laimi ṭhat lonak in a luatmi an um lai lo i a nungmi zong an um lai lo,” tiah a ti.
18Hi bangin Ralkapbu Bawipa, Israel Pathian nih a ti: Ka thinhunnak le ka thinlinhnak cu Jerusalem khuami hna cungah bungh a si bantuk khan Izipt ram i nan kal ahcun nan cungah bungh a si ve lai. Nannih cu vawlhpamhmi, tuksapur, holh chia tlenghnak le thangchiatmi nan si lai. Hi hmun hi zeitikhmanh ah nan hmu ti lai lo, tiah a ti hna.
19Cun Jerimiah nih a bia cu a peh i, “Nannih Judah ram chung i a tangmi hna, Bawipa nih Izipt ram i kal lo awkah an chimh hna. Cucaah nan palh ngaingai caah 20atu ah ralrinnak kan pek hna. Bawipa kan Pathian sinah cun nan ka kalter i, ‘Bawipa kan Pathian sinah thla kan campiak tuah! Nan tuah awk a si, tiah a kan timi paoh kha kan chim law, kan tuah lai’, nan ti. 21Atu cu kan chimh cang hna, sihmanhsehlaw Bawipa kan Pathian nih nanmah chimh a ka fialmi vialte kha a dihlak in nan al dih. 22Cucaah hihi philh hlah u, va kal i va um nan duhnak ram ah hin ral kut le mangṭam le rai in nan thi lai,” tiah a ti.
Currently Selected:
JEREMIAH 42: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
