JEREMIAH 41
41
1Thla sarihnak thla ah, siangpahrang chung a simi Ishmael cu (Ishmael cu Nethaniah fapa a si, Nethaniah cu Elishama fapa a si) Mizpah khua ah Ahikam fapa Gedaliah sinah mi pahra he an ra. Cun khika i rawl an ei lioah, #2Sia 25.25 2Nethaniah fapa Ishmael le mi pahra hna nih cun Safan fapa Ahikam i fapa Gedaliah, Babilon siangpahrang nih ram uktu bawi ah a sermi cu an thawhhnawh i vainam in an thah. 3Mizpah ah Gedaliah sin i a ummi Judah mi vialte hna le khika i Khaldi mi ralkap a rak um sualmi hna zong kha an thah hna.
4Gedaliah an nawn thaizing, zapi nih an hngalh hlanah, 5Shekhem le Shiloh le Samaria in pa sawm riat an ra. An khahmul kha an i meh i an puan kha an thleh hna i an pum cu an i at, annih nih Bawipa biakinn i pekchanh awkah changvut thawinak le zihmui kha an rak i put. 6Cun Nethaniah fapa Ishmael cu anmah ton awkah ṭah bu in Mizpah in a ra chuak i a ton tik hna ah, “Ahikam fapa Gedaliah sinah hin rung lut tuah u,” tiah a ti hna. 7Sihmanhsehlaw khua chung i an rung luh tikah Nethaniah fapa Ishmael le a sin i a ummi hna nih cun an thah hna i tikhor chungah an thlak hna. 8Sihmanhsehlaw anmah lak i minung pahra, “Kannih cu kan that hlah, zeicahtiah changvut le barli le chiti le khuaihliti khonmi tampi lo lakah kan ngei,” tiin Ishmael sinah a timi cu a that hna lo. A kut aa sum i cu hna cu hawi dang sinah khan a that hna lo. 9Ishmael nih a thahmi hna an ruak a hlonhnak tikhor cu tikhor nganpi a si. Ishmael nih miruak cu cu tikhor ah cun khat lakin a hlonh hna. Hi tikhor cu Baasha nih Siangpahrang Asa a rak tuk ah khan Asa ni a rak cawhmi a si. 10Cun siangpahrang fanu hna le Mizpah khua i a tangmi a dang vialte hna, ralbawi Nebuzaradan nih Gedaliah kut tangah a chimmi hna kha Ishmael nih a tlaih hna i Ammon ram leiah aa kalpi hna. 11Cun Kareah fapa Johanan le ralkap pawl haotu vialte hna nih Nethaniah fapa Ishmael nih ṭhat lonak a tuahmi vialte kha an theih tikah 12an mi hna he khan an dawi i Gibeon tili pawngah khan an va phak. 13Ishmael tlaihmi vialte hna nih khan Kareah fapa Johanan le ralkap pawl haotu vialte kha an hmuh hna tikah an tha a nuam i 14cu tikah Mizpah ah Ishmael nih a tlaihmi vialte hna kha an i let i Kareah fapa Johanan sinah khan an i fon. 15Sihmanhsehlaw Nethaniah fapa Ishmael cu minung pariat he Johanan sin khan a luat i Ammon mi hna ram ah khan a zam.
16Cun Johanan le ralkap haotu pawl nih khan Ishmael nih Gedaliah a nawn hnu i Mizpah ah a tlaih hna i aa kalpimi thongtla hna kha a zohkhenh hna — cu hna cu nu le ngakchia le tilditmi an si. 17-18Ishmael nih khan Babilon siangpahrang nih ram uktu ah a chiahmi Gedaliah kha a thah caah Babilon mi cu an ṭih ngaingai hna. Cucaah Babilon mi hna sinin zam awkah Izipt ram kal an i thawh. Lampi ah Bethlehem pawng Geruth Kimham ah khan an riak.
Currently Selected:
JEREMIAH 41: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
