JEREMIAH 43
43
Izipt Ah An Zam
1 Bawipa an Pathian nih, annih cu va chim hna tiah a timi bia cu Jeremiah nih a chim tikah, Hashaiah fapa Azariah le Kareah fapa Johanan le an hawile hna nih khan Jeremiah cu ninghngal ngaiin an thawh i 2“Lih na chim. Bawipa kan Pathian nih kannih cu Izipt ram i vung kal i vung um kha thlauh awkah nangmah cu an thlah lo. 3Sihmanhsehlaw Neriah fapa Baruk nih, kannih cu thah awkah, a si lo le Babilon i sal i kalpi awkah Khaldi mi hna kut chungah pek kan si nakhnga, an forh,” tiah an ti. 4Cucaah Kareah fapa Johanan le ralkap pawl bawi vialte hna le mi vialte nih cun Bawipa nawl cu ngaih an duh lo i Judah ram chung i um cu an duh lo. 5Kareah fapa Johanan le ralkap pawl bawi vialte hna nih cun, Judah ram chung i um ṭhan awkah, an i ṭheknak ram kip in a hung kirmi Judah mi a tangmi vialte hna kha an pumh dih hna — #2Sia 25.26 6pa he nu he ngakchia he siangpahrang fanu hna he, cun ralvengtu haotu Nebuzaradan nih Safan fapa Ahikam i fapa Gedaliah sinah a chiahtakmi paohpaoh le profet Jeremiah le Neriah fapa Baruk zong kha an pumh dih hna; 7hi hna vialte hi Bawipa nawl cu ngai loin Izipt ram chungah cun an vung kal i Tahpanhes kha an phan.
8Khi tikah Bawipa bia cu Jeremiah sinah Tahpanhes ah cun a ra: 9“Lung ngan pipi i lak hna law Tahpanhes i a ummi Faro siangpahrang inn i luhnak ah khan mirang-vawlei in benh hna. 10Na tuah lio cu Judah mi nih in hmu hna seh law annih cu, ‘Mah hihi Ralkapbu Bawipa, Israel Pathian bia cu a si, tiah chim hna: Babilon siangpahrang Nebukhadnezzar ka sal cu ka cah lai i hika i ka benhmi lung cungah hin a bawiṭhutdan cu a toh lai i an cungah hin a thladem zarhnak cu a samh lai. 11Cun Izipt cu a doh lai i thah awk kha a thah hna lai i sal i kalpi awk kha a kalpi hna lai i vainam in thah awk kha vainam in a thah hna lai. 12Izipt pathian hna biakinn cu mei in a khangh hna lai, inn cu a khangh hna lai i pathian cu sal ah a hruai hna lai. Tuukhal nih a puan i ṭhah a ummi a zoh hna bangin Izipt ram cu a zoh lai. Aa tinhmi cu a tlinter dih hnuah Izipt cu a kaltak lai. 13Izipt ram chung i a ummi Beth-shemesh i tung thiang hna cu a den dih hna lai i Izipt pathian hna biakinn cu a khangh dih hna lai,” tiah a ti.
Currently Selected:
JEREMIAH 43: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
