JEREMIAH 40
40
Gedaliah Sinah Jeremiah A Um
1Jeremiah kong ah Bawipa sinin a rami bia: Ralvengtu hna haotu Nebuzaradan nih khan Jerusalem khua le Judah ram in sal ah an kalpimi hna saltang hna he khan cikcin khih buin Ramah khua ah Jeremiah cu a kalpi; 2khika ah a thlah i Jeremiah cu a thawh i, Bawipa na Pathian nih hi hmun cungah hin rawhralnak ka tlunter lai tiah a rak ti i 3nannih nih Bawipa cungah nan sual i a bia nan ngaih duh lo caah hi thil cu nan cung i a tlun nakhnga an chimh cangmi hna thil cu a tlinter. 4Sihmanhsehlaw nang Jeremiah cu nihin ah na kut ṭemnak cikcin cu kan phoih cang. Na duh ahcun ka sinah Babilon ah ra tuah, ṭha tein kan zohkhenh lai, sihmanhsehlaw rat lo kha na duh deuh ahcun a ṭha ve ko. Ram cu a ning piin na hmaika ah a um ko, a ṭha bik na tinak paoh ah kal ko,” tiah a ti. 5Cun Jeremiah nih a leh hlanah khin Nebuzaradan nih cun, “Babilon siangpahrang nih Judah ram khua hna a uktu ah a sermi Gedaliah sinah khan va kir ṭhan law amah sinah cun langhngan in va um ko, asiloah, na duhnak paoh ah va kal ko’, a ti,” tiah a peh. (Gedaliah cu Ahikam fapa a si, Ahikam cu Safan fapa a si). Cun ralvengtu haotu nih cun i cawmnak rawl a pek i laksawng a ṭhenh i a kaltak. 6Cun Jeremiah cu Ahikam fapa Gedaliah sinah khan Mizpah ah cun a ra i ram chung i a tangmi hna lakah khan amah sinah cun a um ve. 7Ramlak i a ummi raltho pawl haotu vialte hna le an mi hna nih, Babilon siangpahrang nih Ahikam fapa Gedaliah kha ram uktu bawi ah a ser i amah cu Babilon i kalpi lomi a derthawm bikbik hna pawl, nu hna le pa hna le ngakchia hna zohkhenhtu ah khan a chiah, ti an theih tikah, #2Sia 25.22-24 8a sinah Mizpah ah cun an ra. Nethaniah fapa Ishmael kha a ra, cun Kareah fapa Johanan le Jonathan kha an si, cun Tanhumeth fapa Seraiah, cun Netofah mi Efai fapa hna, cun Beth-maakah mi Jazaniah le a mi hna kha an si. 9Safan fapa Ahikam i fapa Gedaliah nih cun an sinah khan biakamnak a ser i, “Khaldi mi bawi hna kha ṭih hna hlah u. Ram chungah hin um ko u law Babilon siangpahrang hi rian ko u law nan caah a ṭha ko lai. 10Kei cu Mizpah ah hin ka um lai i Khaldi mi hna hi an rat paoh ah ka rak zohkhenh hna lai; sihmanhsehlaw nannih cu mitsur hang le ṭhal caan theitlai hna le chiti kha pum hna u law um chungah khan khong hna u law nan lakmi khua hna chungah khan um ko hna u,” tiah a ti hna. 11Cu bantukin Moab ram le Ammon ram le Edom ram le ram dangdang i a ummi Judah mi hna zong nih khan, Babilon siangpahrang nih Judah ram chungah khan a tangmi a nganhta hna i Safan fapa Ahikam i fapa Gedaliah cu an ukbawi ah a ser ti kha an rak theih. 12Cucaah an i ṭheknak hmun khan Judah mi vialte cu Judah ram ah khan an ra kir i Mizpah i Gedaliah sinah cun an ra chuak; cun mitsur hang le ṭhal caan theitlai kha tam nawnpi an pumh.
Ishmael Nih Gedaliah A Thah
13Kareah fapa Johanan le ramlak i a ummi raltho pawl hruitu vialte cu Gedaliah sinah Mizpah ah an ra i, 14amah cu an thawh i, “Ammon mi siangpahrang Baalis nih Nethaniah fapa Ishmael kha nangmah thah awkah a thlah kha na hngal maw?” an ti. Sihmanhsehlaw Ahikam fapa Gedaliah nih a zum hna lo. 15Cun Kareah fapa Johanan nih Gedaliah cu a thli tein a thawh i, “Va kal ning law ahohmanh hngalh loin Nathaniah fapa Ishmael cu va that ning. Zeicahdah nangmah cu naa thahter lai i nangmah sinah aa pummi Judah mi vialte cu ṭhek dih kan si lai i Judah mi a tangmi cu hrawh a si lai?” tiah a ti. 16Sihmanhsehlaw Ahikam fapa Gedaliah nih Kareah fapa Johanan cu, “Cu bantuk cu tuah hlah. Ishmael kong i na chimmi cu lih a si,” tiah a leh.
Currently Selected:
JEREMIAH 40: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
