BIACEIHTU 11
11
1Gilead mi Jepthah cu a ṭhawngmi ralkap a si, sihmanhsehlaw amah cu hlawhhlangnu fapa a si. Gilead cu Jepthah pa a si. 2Cun Gilead nupi zong nih cun fapa hna a hun hrinpiak i a nupi fapa hna cu an hung ṭhan tikah Jepthah cu an hlonh i amah cu, “Nang cu kan pa inn chungah ro na co lai lo, nu dang fa na si caah,” an ti. 3Khi tikah Jepthah cu a unau hna sinin a zam i Tobram ah a um; cun santlailo pawl kha Jepthah sinah cun an i pumkhawm i amah he cun ral an hranh tawn.
4Cun tlawmpal hnuah Ammon mi nih Israel mi kha an doh hna. 5Cun Ammon mi hna nih Israel mi kha an doh tik hna ah, Gilead upa hna cu Jepthah kha Tobram in va lak awkah an kal; 6cun Jepthah cu, “Ra law, kan hruitu si tuah, Ammon mi kha kan doh khawh hna nakhnga,” tiah an ti. 7Sihmanhsehlaw Jepthah nih Gilead upa hna cu, “Nannih nih nan ka huat i ka pa inn in nan ka dawi a si lo mei? Zeicahdah atu ah harnak chung nan phak tikah ka sinah nan rat?” tiah a ti hna. 8Cun Gilead upa hna nih Jepthah cu, “Cucaah cun pei atu cu, kan sin i na kal i Ammon mi cu na doh hna i Gilead chung i a ummi vialte i kan lu na si nakhnga, nangmah leiah kan i mer cu,” an ti. 9Jepthah nih Gilead upa hna cu, “Ammon mi hna he i doh awkah inn i nan ka tlunpi ṭhan a si i, annih cu Bawipa nih keimah kha a ka pek ahcun nan lu ka si hnga,” tiah a ti hna. 10Cun Gilead upa hna nih Jepthah cu, “Bawipa cu kan karlak i biahngaltu a si lai; na chim bantukin kan tuah hrimhrim lai,” tiah an ti. 11Cucaah Jepthah cu Gilead upa hna sinah cun a kal i mizapi nih cun an lu le an hruitu ah an ser; cun Jepthah nih a bia vialte cu Bawipa hmaiah Mizpah ah a chim.
12Cun Jepthah nih Ammon mi hna siangpahrang sinah cun lamkal a hei thlah hna i, “Zei tuah awk dah ka cungah na ngeih i ka ram doh awkah ka sinah na rat?” tiah a ti. 13Cun Ammon mi hna siangpahrang nih Jepthah i a lamkal hna cu a rak leh hna i, “Israel mi nih Izipt ram in an rat lioah khan ka ram, Arnon in Jabbok tiang, cun Jordan tiang an lak caah, cucaah atu cu remnak tein ka khirh ṭhan tuah hna,” tiah a ti. 14Cun Jepthah nih Ammon mi hna siangpahrang sinah cun lamkal a hei thlah ṭhan hna i 15anih sinah, “Hi bangin Jepthah nih a ti: Israel mi nih Moab ram siseh Ammon mi hna ram siseh an la lo, 16sihmanhsehlaw Izipt ram in an hung kai tikah Israel mi hna cu ramlak in Rili Sen ah an kal i Kadesh an phan. 17Cu tikah Israel mi nih Edom siangpahrang sinah lamkal an hei thlah hna i, ‘Na ram chungin kan kalter ko, tiah kan in nawl,’ an ti; sihmanhsehlaw Edom siangpahrang nih a ngai duh lo. Cun Moab siangpahrang sin zongah an hei thlah hna, sihmanhsehlaw a hna a tla duh lo. Cucaah Israel mi cu Kadesh ah an tang ko. #Nam 20.14-21 18Cun ramlak in an kal i Edom ram le Moab ram kha an vel hna i Arnon khattelei kamah an riak; sihmanhsehlaw Moab ram chungah an lut lo, zeitintiah Arnon cu Moab ramri a si. #Nam 21.4 19Cun Israel mi nih Amor mi siangpahrang, Heshbon siangpahrang Sihon sinah lamkal an hei thlah hna; cun Israel mi nih a sinah, ‘Na ram chungin kan ram ah kan kalter ko sawh,’ tiah an nawl. #Nam 21.21-24 20Sihmanhsehlaw Sihon nih Israel mi hna cu a ram chungin kal awkah a zum hna lo; cucaah Sihon nih a mi vialte kha a pumh hna i Jahaz ah an riak i Israel mi kha an doh hna. 21Cun Bawipa, Israel mi hna Pathian nih, Sihon le a mi vialte cu Israel mi kut chungah a pek hna i an tei hna; cucaah cu ram i a ummi Amor mi hna ram vialte cu Israel mi nih an co. 22Cun annih nih Amor mi hna ram vialte cu Arnon in Jabbok tiang, ramlak in Jordan tiang an co. 23Cuticun Bawipa, Israel mi hna Pathian nih, a mi Israel mi hna hmai in Amor mi hna cu a pawnchuah hna; annih cu nang nih na co awk an si hnga maw? 24Na pathian Khemosh nih co awkah an pekmi kha na co awk cu a si hnga lo maw? Bawipa kan Pathian nih kan hmai in a pawnchuahmi vialte cu kannih nih kan co hna lai. 25Nangmah hi, Moab siangpahrang Zippor i a fapa Balak nakin, zei ti tal in na ṭha deuh maw? Amah nih Israel mi hna kha a hnahnawh hna in a do bal hna maw? #Nam 22.1-6 26Israel mi nih Heshbon le a khuate hna chungah le Aroer le a khuate hna chungah le, Arnon tiva kam i a ummi khua vialte hna chung i an um lio, kum za thum chungah khan, zeicahdah kha chungah khan na rak lak ṭhan hna lo? 27Cucaah nangmah cungah ka sual lo, ka cung i ral na ser caah hin nangmah tu nih ka cungah na sual; Bawipa, Biaceihtu nih nihin ah hin Israel mi le Ammon mi hna karlak ah bia khiak seh,” tiah a ti. 28Sihmanhsehlaw Ammon mi hna siangpahrang nih cun Jepthah nih a hei cahmi bia cu zeihmanh ah a rel lo.
29Cun Bawipa Thlarau cu Jepthah cungah a tlung i Gilead le Manasseh ah aa chawk i Gilead ram Mizpah ah a lan i Gilead ram Mizpah cun Ammon mi hna sinah a va lan chin. 30Cun Jepthah nih Bawipa sinah biakamnak pakhat a ser i, “Ammon mi cu ka kut chungah na ka pek hna ahcun, 31Ammon mi hna sinin teinak he ka kir tikah keimah don awkah ka inn innka chungin a chuakmi paoh cu Bawipa ta a si lai i khangh thawinak caah ka pekchanh lai,” tiah a ti. 32Cucaah Jepthah cu anmah doh awkah khan Ammon mi hna sinah cun a va kal i Bawipa nih annih cu amah kut chungah khan a rak pek hna. 33Cun Aroer in Minnith khua pawng tiang, khua kul, Abel-keramim tiang, tampi a thah hna. Cucaah Ammon mi hna cu Israel mi hna hmaiah an sung.
34Cun Jepthah cu Mizpah i a inn ah a tlung i zohhmanh, a fanu nih amah kha don awkah khuang tete le laam he a hung chuak; amah lawnglawng cu fa a ngei; amah hlei ah fapa siseh fanu siseh a ngei ti hna lo. 35Cun a hmuh tikah a puan kha a thleh hna i, “Aize, ka fanu! Na ka niamter ngaingai ai, keimah ca i harnak nganpi tuahtu ah na cang ai; zeitintiah Bawipa sinah ka kaa ka pau cang i ka biakamnak cu ka la ṭhan kho ti lo,” tiah a ti. #Nam 30.2 36Cun anih nih amah sinah, “Ka pa, Bawipa sinah na kaa na pau cang a si ahcun, na kaa chungin a chuakmi bangin ka cungah tuah ko, Bawipa nih pei na ral Ammon mi hna cungah na phu an hlampiak cang sawk cu,” tiah a ti. 37Cun a pa sinah cun, “Hi thil hi ka tuahpiak tuah; thla hnih chung ka thlah law, tlang ah ka kal lai i ka vak lai i ngaknu ka sinak hi ka ṭah tuah lai, keimah le ka hawile nih,” tiah a ti. 38Cun amah nih, “Va kal ko,” tiah a ti. Cun thla hnih chung kha a thlah; cun a hawile he an kal i ngaknu a sinak kha tlang cungah an ṭah. 39Cun thla hnih donghnak ah a pa sinah a ra kir i biakamnak a ser ciami ning khan a cungah a tuah. Zeitikhmanh ah pa a hngal bal lo. Cun Israel mi hna lakah phung ah a cang i 40Israel mi fanu hna nih kum khat hnu kum khat Gilead mi Jepthah fanu kha kum khat ah ni li lengmang an ngaih.
Currently Selected:
BIACEIHTU 11: HCL06
Highlight
Share
Compare
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
