BIACEIHTU 10
10
Tola le Jair Nih Israel Mi Bia An Ceih Hna
1Abimelek hnuah Issakhar phun mi Dodo fapa Puah i fapa Tola cu Israel mi chuah awkah a hung chuak; amah cu Efraim tlangram Shamir khua ah a um. 2Cun amah nih Israel mi cu kum kul le kum thum bia a ceih hna. Cun a thi i Shamir ah an vui.
3Amah hnuah Gilead mi Jair cu a hung chuak i Israel mi cu kum kul le kum hnih bia a ceih hna. 4Cun amah cu fapa sawm thum, laa sawm thum aa citmi a ngei; cun khua sawm thum an ngei i nihin tiangin Havvoth-jair ti an si i Gilead ram ah an um. 5Cun Jair cu a thi i Kamon ah an vui.
Jepthah Nih Ammon mi Kut Chungin A Luatter Hna
6Cun Israel mi nih Bawipa mithmuh ah ṭhat lonak an tuah ṭhan hoi i Baal le Ashtaroth le Siria pathian hna le Sidon pathian hna le Moab pathian hna le Ammon mi pathian hna le Filistin mi pathian hna kha an rian an ṭuan hna; Bawipa kha an hlawt i amah kha a rian an ṭuan lo. 7Cun Bawipa thinhunnak cu Israel cungah a alh i Filistin mi hna kut chungah le Ammon mi hna kut chungah a zuarh hna i 8annih nih khi kum ah Israel mi cu an rial hna i an hrem hna. Jordan tivaral Gilead ram chungah a ummi Amor mi ram i a ummi Israel tefa vialte hna cu, kum hleiriat chung an hrem hna. 9Cun Ammon mi hna nih Judah le Benjamin le Efraim te chung zong kha doh awkah Jordan kha an tan; cucaah Israel cu chimpit vansang in a um.
10Cun Israel mi nih Bawipa kha an auh i, “Nangmah cungah kan sual cang, zeitintiah kan Pathian kha kan hlawt i Baal kha kan biak hna,” tiah an ti. 11Cun Bawipa nih Israel mi hna sinah cun, “Izipt mi hna le Amor mi hna le Ammon mi hna le Filistin mi hna sinin kan chuah hna lo maw? 12Sidon mi hna zong le Amalek mi hna le Maon mi hna nih nannih kha an in hrem hna i nannih nih nan ka auh i an kut chungin kan chuah hna. 13Sihmanhsehlaw nannih nih nan ka hlawt i pathian dang kha nan biak hna; cucaah kan chuah ti hna lai lo. 14Va kal u law, nan i thimmi pathian cu va au hna u; annih nih nannih cu vansang au in nan um lio caan ah in chuah hna seh,” tiah a ti. 15Cun Israel mi nih Bawipa sinah cun, “Kannih cu kan sual cang; nangmah nih a ṭha na tining paoh in kan cungah tuah ko; a chuah bel nihin ah hin zaangfahnak in kan chuah ko sawh,” tiah an ti. 16Cucaah annih sin i ramdang pathian hna kha an hlonh hna i Bawipa kha an biak; cun Israel mi hna retheihnak ruangah khan a thin a hung ngaingai.
17Cun Ammon mi hna cu hriamnam la u, tiah ti an si i Gilead ah an riak; cun Israel mi hna cu hmun khat ah an i pum i Mizpah ah an riak. 18Cun mizapi, Gilead ram hruaitu hna cu pakhat le pakhat an i chawn i, “Ammon mi doh a thawktu cu ahodah a si lai? Gilead ram chung i a ummi vialte hna i an haotu ah a si lai,” tiah an ti.
Currently Selected:
BIACEIHTU 10: HCL06
Highlight
Share
Compare
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
