BIACEIHTU 12
12
1Efraim mi hna cu, hriamnam i lak u, tiah ti an si i Zafon ah an va kal i Jepthah sinah cun, “Zeicahdah Ammon mi hna doh awkah tiva kha na tan i kannih kha nangmah sin i kal awkah na kan auh lo? Na inn ah kan in duah chih lai,” tiah an ti. 2Cun Jepthah nih annih cu, “Keimah le ka mi hna nih Ammon mi hna he ralnak fakpi kan rak ngei; cun kan auh tik hna ah an kut chungin nan ka chuah lo. 3Cun nan ka chuah duh lo ti kha ka hmuh tikah, thih le thih tiin, Ammon mi hna doh awkah khan ka kal i Bawipa nih annih cu ka kut chungah a ka pek hna; cucaah, zeicaah hen dah, keimah doh awkah nihin ah nan ka rathnawh?” tiah a ti hna. 4Cun Jepthah nih Gilead mi vialte kha a pumh hna i Efraim kha an doh; annih nih, “Efraim le Manasseh lakah, nannih Gilead mi hna cu Efraim chungin a zammi nan si,” an ti hna caah Gilead mi nih Efraim mi kha an thah len hna. 5Cun Gilead mi nih Jordan tiva tannak hna kha Efraim mi cu an lakkanh hna. Cun Efraim mi a zammi paoh nih, “Ka tanter ko,” an ti tikah, Gilead mi hna nih cun, “Efraim mi na si maw?” tiah an ti. Cun anih nih, “Ka si lo,” a ti tikah, 6annih nih, “A si ahcun, Shibboleth ti kun,” tiah an ti i anih nih, “Sibboleth,” tiah a ti, zeitintiah dik tein a chim kho lo; khi tikah an tlaih i Jordan tiva tannak hna ah cun an thah hna. Cun khi caan ah Efraim mi sang li le thong hnih an thi.
7Jepthah nih Israel cu kum ruk bia a ceih hna. Cun Gilead mi Jepthah cu a thi i amah khua Gilead ah cun an vui.
Ibzan, Elon le Abdon Nih Israel Mi Bia An Ceih Hna
8Amah hnuah Bethlehem khuami Ibzan nih Israel mi cu bia a ceih hna. 9Amah nih fapa sawm thum a ngeih hna; fanu sawm thum amah phun lengah va a ngeihter hna i a lenglei in fanu sawm thum a fapale hna caah a luhter hna. Cun Israel mi cu kum sarih bia a ceih hna. 10Cun Ibzan cu a thi i Bethlehem khua ah an vui.
11Amah hnuah Zebulun mi Elon nih Israel mi kha bia a ceih hna; cun Israel mi cu kum hra bia a ceih hna. 12Cun Zebulun mi Elon cu a thi i Zebulun ram chung i Aijalon khua ah an vui.
13Amah hnuah Pirathon mi Hillel fapa Abdon nih Israel mi kha bia a ceih hna. 14Amah cu laa sawm sarih cungah aa citmi fapa sawm li le tupa sawm thum a ngei; cun Israel mi kha kum riat bia a ceih hna. 15Cun Pirathon mi Hillel fapa Abdon cu a thi i Amalek mi tlangram chung i a ummi Efraim ram chungah, Pirathon khua ah an vui.
Currently Selected:
BIACEIHTU 12: HCL06
Highlight
Share
Compare
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
