ISAIAH 62
62
1Jerusalem cu lung ṭhawnnak
pek awkah bia ka chimh lai,
khamhnak a hmuh hlantiang le,
a teinak zan meifar ceu bantukin
a ceu hlantiang ka dai hrimhrim
lai lo.
2Jerusalem, miphun hna nih, teitu
na si kha an hmuh lai!
An siangpahrang vialte nih
na sunparnak kha an hmuh lai.
Min thar in auh na si lai i cu min cu
Bawipa hrimhrim nih an pek lai.
3Aa dawhmi bawiluchin bantuk
Bawipa caah na si lai.
4“Hlawtmi,” ti na si ti lai lo i
na ram zong “Kaltakmi Nupi”
ti a si ti lai lo.
Na min thar cu “Hefzibah”#62.4 Hefzibah ti cu “Pathian a cungah a lung aa lawm,” tinak a si. ti a si lai i na ram cu “Beulah”#62.4 Beulah ti cu “Ṭhit i lunglawm in khuasak ṭi” tinak a si.
ti a si lai.
Cu Bawipa kha na cungah
aa lawmh caah a si i na ram caah
va bantuk a si lai.
5Tlangval nih ngaknu a ṭhit bantukin
Nangmah an Sertu nih an ṭhit lai.
Tlangval cu a mo cungah
aa lawmh bantukin
Na Pathian cu na cungah aa lawm lai.
6Maw Jerusalem, na ralhau cungah
ralvengtu ka chiah hna,
chun nitlak zan khuadei
an dai lai lo.
Bawipa nih biakamnak ka tuakmi kha
an ka theihter ṭhan
lengmang lai i
ka biakam cu philh hrimhrim loin
an ka tuah lai.
7Jerusalem cu ka remh ṭhan i
vawleicung dihlak nih
an thangṭhatmi khua i ka ser
hlantiang,
a dinh in ka dinhter hna lai lo.
8 Bawipa nih biatak tein bia aa kam,
a biakam cu a lianhngannak in
a tlinter lai.
Cu a biakam cu hihi a si:
“Nan tirawl cu nan ral hna caah
rawl a si ti lai lo i
ramdangmi nih nan mitsur hang cu
an in dinkanh ti hna lai lo.
9Thlaici a tuh i rawl a ṭuantu
nanmah nih rawl cu nan ei lai i
Bawipa cu nan thangṭhat lai.
Mitsur kha a zohkhenh i
a pumhkhawmtu nih,
ka biakinn chungah mitsur hang
cu nan din lai,” a ti.
10Jerusalem khuami hna, i thawh u law
nan mi a ra kir liomi hna caah
lam va ser u.
Lam nganpi pakhat in va ser u law
lung vialte kha hlonh dih hna u.
11“Jerusalem khuami cu chim
hna u law,
Bawipa nan khamhtu cu a ra lio i
a tlanhmi a mi kha a rak i ratpi hna,
tiah vawleicung dihlak ah Bawipa nih a thanh i
cucu miphun vialte nih
an hngalh nakhnga
hmelchunhnak pakhat in
tar tuah u,” a ti tiah va ti hna u. #Isa 40.10; Biat 22.12
12Nannih cu “Pathian Mi Thiang,” ti
nan si lai,
“Bawipa Khamh Mi” ti nan si lai.
Jerusalem cu, “Bawipa Dawt Mi Khua,”
“Pathian Nih A Hlawt Lomi Khua”
ti a si lai.
Currently Selected:
ISAIAH 62: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
