ISAIAH 63

Pathian Nih Miphun Vialte A Tei Hna Lai

1“Ahodah Edom ram in a rami khi a si?

Ahodah thisen aa nehmi puan he

Bozrah in a rami khi a si?

Ahodah sunparnak in aa thuam i

ṭhawnnak in a kalmi khi a si?

Amah cu, Khamhnak a thanhtu,

mi khamh awk i a ṭhawngmi,

Keimah hi ka si. #Isa 34.5-17; Jer 49.7-22; Eze 25.12-14; 35.1-15; Amo 1.11-12; Oba 1-14; Mal 1.2-5

2Zeicahdah na puan cu an sen i mitsur

hang a nengtu puan bantuk a si?

3Keimah nih, keimah lawnglawng in

mitsur hang cu ka nen i

ka thinlinh in ka nen hna;

An hang nih ka puan cu a peh i

ka puan cu a seh dih. #Biat 14.20; 19.13,15

4Zeicahtiah phuhlam ni cu ka lung chungah

a um cang i tlanhnak ka tuah lai,

ka timi kum cu a phan cang.

5Khua ka cuan, sihmanhsehlaw

bawmtu ahohmanh an um lo;

mithram cat in ka zoh,

sihmanhsehlaw a ka bawmtu

ahohmanh an um lo; #Isa 59.16 6Ka thinhun in miphun kha

ka lamhchih hna i

ka thinlinh in ka naan cikcek hna;

Cun an thisen kha vawlei ah

ka thlet,” a ti.

Bawipa Cu Israel Mi Cungah A Ṭha

7 Bawipa dawtnak fek cu ka chim lai,

kan ca i a tuahmi thil ruangah

ka thangṭhat lai.

Israel mi cu thluachuahnak tam piin

a pek hna i

cu a pek hna cu a zaangfah hna

ca le a dawtnak a feh caah a si.

8 Bawipa nih aa thawh i, “Annih cu ka mi an si, an ka hleng lai lo” a ti. Cucaah an harnak vialte chung khan a khamh hna. 9Annih khamhtu cu vancungmi a si lo, Bawipa hrimhrim kha a si. A dawt hna i an zawn a ruah hna caah a khamh hna. Hlanah khan a rak zohkhenh zungzal ko hna.

10Sihmanhsehlaw an doh i a ngaih an chiatter. Cucaah Bawipa cu an ral ah a cang i a doh hna.

11Sihmanhsehlaw hlanlio chan, Bawipa sal Moses chan kha an vun thei ṭhan i, “Rili chungin a mi hna cu an hruaitu hna he a rak khamhtu hna Bawipa kha atu hi khuazei ah dah a si hnga? Moses thlarau a rak petu Bawipa kha khuazei ah a si hnga? 12Zungzal hmunmi minthannak hmuh awkah, a mi hna hmaiah rili hmanh a cheu i a sal Moses thawngin thil lianngan a tuah i a ṭhawnnak a hmangmi Bawipa kha khuika ah dah a si hnga?” an ti. #Exo 14.21

13 Bawipa nih ti thuk a tanpi lio hna ah khan, ramlak rang bantukin an ke a fek i voi khat hmanh an ril lo. 14Cawrun kha ram ṭhatnak nelrawn ah an kanh hna bangin Bawipa nih a mi cu dinhnak a pek hna. Cuticun Bawipa nih khan a mi cu a hruai hna i a min cu thangṭhatnak a hmu.

Zaangfahnak le Bawmhnak Ca Thlacam

15Na sunparnak le na thiannak he na umnak hmun van khin run kan zoh tuah, Bawipa. Kan zawn na kan ruahnak kha khuazei ah dah a si? Na ṭhawnnak kha khuazei ah dah a um? Na kan dawtnak le na kan zaangfahnak kha khuazei ah dah an um? Kan hrelh sawh hlah. 16Nangmah cu kan Pa na si. A kan hringsortu Abraham le Jakob hmanh nih an kan bawm kho lo, sihmanhsehlaw Bawipa, nangmah cu kan Pa na si. Nangmah cu a kan chuahtu zungzal na si. 17Zeicahdah na lam zul loin na kan pialter? Zeicahdah kan lung na kan hahter i nangmah cu kan in mertak? Nangmah na rian a ṭuanmi hna ruangah le nangmah mi a si zungzal komi hna ruangah, ra kir ko sawh.

18Kan ral nih na mi cu an kan dawi dih dengmang i Biakinn cu an thurhhnawmh. 19Nangmah cu a kan uktu a rak si bal lomi bantukin kan cungah naa umter i kannih cu na mi a rak si bal lomi bantukin na kan tuah.

Currently Selected:

ISAIAH 63: HCL06

Highlight

Copy