ISAIAH 61
61
Tlanhnak Thawng Ṭha
1Bawipa Pathian nih thlarau in
a ka khahter.
Sifakmi hna sinah thawng ṭha
phorh awk le
lung a kuaimi hna damter awk le
sal i a tangmi hna sinah
chuahnak thanh awk le
thong chung i a ummi hna sinah
luatnak thanh awkah
a ka thim i a ka thlah. #Mat 11.5; Luk 7.22 #Luk 4.18-19
2 Bawipa nih a mi cu a khamh cang hna
lai i an ral cu a tei cang hna lai,
ti thanh awkah a ka thlah.
A ngaih a chiami vialte kha
hnemh awk le #Mat 5.4
3Zion i ngaihchia in a ummi vialte
hna cu vutcam caah pangpar ṭhi,
mitthli caah lawmhnak chiti le
thangṭhatnak hla pek awkah
a ka thlah.
Annih cu Bawipa hrimhrim nih
a phunmi thingkung bantuk
an si lai.
Thil ṭha kha an tuah lai i
Pathian cu a tuahmi thil ruangah
khan an thangṭhat lai.
4Saupi a rawk cangmi khua kha
an remh ṭhan hna lai.
5Jerusalem, ramdangmi nih na rian
an in ṭuanpiak lai.
Na saṭil kha an in zohkhenhpiak hna
lai i na lo kha an in thlawhpiak
hna lai,
na mitsur dum kha an in
cawngpiak hna lai.
6Nang tu cu Bawipa tlangbawi tiah
ti na si lai i
miphun hna rumnak cu na ei lai,
na ta an si caah khan na hmai
a hngal lai.
7Na ningzahnak le na thangchiatnak
cu a dong cang.
Nangmah ramte ah khan na um cang
lai i na rumnak cu a let hnih in
a ṭhang lai;
na lawmhnak cu zungzal in
a hmun lai.
8 Bawipa nih,
“Dinnak kha ka duh i hremnak le thil
ṭhalo tuahnak kha ka huat.
Ka mi cu ka lehrulh hrimhrim hna
lai i anmah he zungzal hmunmi
biakamnak ka ser lai.
9Miphun dang sinah khan an min
a thang lai i a hmumi hna
paoh nih,
thluachuahnak ka pekmi miphun
an si kha an hngalh lai,” a ti.
10 Bawipa nih a tuahmi thil ruangah
Jerusalem cu aa lawm.
Va ngei lai ngaknu aa ṭamhmi
bantuk a si.
Pathian nih khamhnak le teinak
he a thuamh cang. #Biat 21.2
11Thlaici cu an keuh i an ṭhan bantukin,
Bawipa Pathian nih a mi cu
a khamh hrimhrim hna lai.
Cun miphun vialte nih amah cu
an thangṭhat lai.
Currently Selected:
ISAIAH 61: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
