ISAIAH 60
60
Jerusalem Ah A Sunparnak Ding
1Tho tuah, Jerusalem, ni bantukin
tlang tuah;
Bawipa sunparnak cu na cungah
a tlang!
2Miphun dang cu muihnak nih
a huh hna lai,
sihmanhsehlaw nang cungah cun
Bawipa ceunak cu a ceu lai;
a sunparnak lianhngannak cu
na sinah a um lai.
3Miphun tanpi nih na ceunak cu
an fuh lai i
na ni thar a chuakmi cu
siangpahrang nih an fuh lai.
4I mer law na pawngkam ah khan
zeidah a um ti kha zoh tuah.
Na mi cu inn i tlun awkah an i pum.
Na fapa hna cu lamhla piin an ra lai i
na fanu hna cu ngakchia bangin
puak cungin an ra lai.
5Mah hihi na hmuh lai i
lunglawmhnak in na khat lai,
naa lawmh tuk ah a ther in
na ther lai.
Miphun hna nih an rumnak cu
na sinah an rak put lai i
naa lawmh tuk ah a ther in
na ther lai.
Miphun hna nih an rumnak cu
na sinah an rak put lai i
rili bangin an chawva cu a ra lai.
6Kalauk bu ngan ngan cu an ra lai,
Midian le Efah in an ra lai.
Sheba in an ra lai i sui le zihmui kha
an rak phorh hna lai.
Pathian nih a tuahmi thil kong
thawng ṭha kha mi nih an chim lai.
7Kedar le Nebaioth ram tuu vialte
kha raithawinak i hman awkah
na sinah an ratpi hna lai i
Bawipa lunglawmhternak caah
biakṭheng cungah an pekchanh
hna lai.
Bawipa nih a Biakinn cu a sunparter
chinchin lai.
8Khuadawm bantukin a zuan in
a zuangmi lawng khi zei lawng
dah an si?
An bu hlam ah a zuangmi ṭhuro
bantukin a zuangmi lawng khi
zeidah an si?
9Annih cu lamhla piin a rami lawng
an si,
Pathian mi hna, inn i a rak
tlunpitu hna lawng an si.
Bawipa, Israel Pathian thiang
upat awkah
sui le ngun kha an rak i phorh;
Bawipa nih miphun dang vialte cu,
a mi Israel mi kha,
upatnak a pekter hna.
10 Bawipa nih Jerusalem cu a thawh i,
“Ramdangmi nih na vampang kha
an remh lai i an siangpahrang nih
na rian an ṭuan lai.
Ka thinhun in dan kan tat,
sihmanhsehlaw atu cu kan dawtnak
le kan zaangfahnak kha
na cungah ka langhter lai.
11Miphun dang siangpahrang hna nih
an chaw le an va cu an ratpi
khawh nakhnga,
chunzan in na kutka cu i hung
zungzal ko hna seh. #Biat 21.25-26
12Sihmanhsehlaw na rian an ṭuanpiak
duh lomi miphun hna cu hrawh
cikcek an si lai.
13“Far thing le Junipar thing le
saipres thing,
Lebanon tupi chung i thing ṭha
bikbik hna kha,
nangmah Jerusalem remhnak ah le
ka biakinn dawhternak ah le
ka khuapi dawhternak caah
an rak phorh hna lai.
14Nangmah a rak in hremtu hna
an fapale kha an ra ve lai i
nangmah cu hmaizahnak pek
awkah an kun lai.
Hlan i zei ah a rak in rel lomi vialte
hna kha na ke hram ah an kun lai.
Nangmah cu,
‘Bawipa Khua,
Israel Pathian Thiang Khua Zion,’
an in ti lai. #Biat 3.9
15“Hlawt na si ti lai lo i huat
na si ti lai lo.
Ṭiaotakmi khua, khua rop
na si ti lai lo.
Khua lianngan le khua dawh ah
kan ser lai i.
zungzal in zungzal tiang lawmhnak
hmun ah kan ser lai.
16Nu nih a fa kha a zohkhenh bantukin,
miphun hna le siangpahrang hna
nih khan an in zohkhenh lai.
Bawipa nih kan khamh kha
na hngalh lai,
Israel Pathian ṭhawng nih
kan luatter kha na hngalh lai.
17Dar can ah sui kan pek lai,
thir can ah ngun kan pek lai i
thing can ah darsen kan pek lai.
Lung can ah thir na hmuh lai.
An uktu bawi hna nih khan
an in hrem ti lai lo,
dinnak le daihnak in ka ukter
hna lai.
18Puarṭhawnnak thawng kha theih
a si ti lai lo, rawhnak
nih na ram cu a hnin ti lai lo.
Vampang nih khua a ven bangin
kan ven lai i kan huhphenh lai;
nangmah cu kan khamh caah
na ka thangṭhat lai.
19“Chun ah ni cu na ceunak a si ti lai lo
i zan ah thlapa cu
na ceunak a si ti lai lo.
Bawipa cu zungzal in na ceunak
ka si cang lai i ka sunparnak
ceunak cu na cungah a tlang lai. #Biat 21.23; 22.5
20Na ngaihchiat ni cu a dong lai.
Bawipa cu zungzal in na caah
ceunak ka si lai,
nika le thlapa nakin a hmun
deuhmi ceunak ka si lai.
21Na mi nih an dihlak in ahmaanmi
thil kha an tuah lai i ram kha
zungzal in an co lai.
Ka lianhngannak kha mi vialte sin i
langhter awkah
annih cu ka phun hna i ka ser hna.
22Nan innchungkhar hna lak i
a hme bik le santlailo bik hna
hmanh kha a ṭhawngmi
miphun tluk ah an i cang lai.
Amah le a caan te ah hi thil cu
khulrang in ka umter lai.
Keimah cu Bawipa ka si,” a ti.
Currently Selected:
ISAIAH 60: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
