ISAIAH 43
43
Pathian Nih A Mi Kha A Chuah Hna
1Israel, nangmah an sertu Bawipa nih
hitihin a ti:
“Na thinphang hlah,
kan huhphenh lai.
Nangmah cu na min in kan auh,
keimah ta na si.
2Ti thuk na tan tikah na sinah
ka um lai,
harnak na inmi nih an tei lai lo.
Mei alh na tan tikah an kangh lai lo,
harnak na inmi nih an hliam lai lo.
3Zeicahtiah keimah cu Bawipa
na Pathian ka si,
nangmah an khamhtu Israel
Pathian thiang cu ka si.
Nangmah luatternak ding caah
Izipt cu ka hlawt lai i
Ethiopia le Seba zong ka hlawt
ko hna lai.
4Na nunnak khamh awkah miphun
pipi zong kha ka hlawt ko hna lai,
zeicahtiah nangmah cu ka caah
a sungmi na si i upatnak kan pek i
kan dawtmi na si.
5Na thinphang hlah — na sinah
ka um ko.
A hlatmi nichuahlei ram le a hlat bik
nitlaklei ram in,
na mi cu inn ah ka tlunpi hna lai.
6Chaklei ram cu, thlah hna u,
ka ti hna lai i
thlanglei ram cu, tlai hna hlah u,
ka ti hna lai.
Ram hla pipi in ka mi cu
kir hna seh law,
vawlei cung khuazakip in
kir hna seh.
7Annih cu keimah mi an si i
keimah sunparnak petu dingah
ka sermi an si,” a ti.
Israel Cu Bawipa Tehte A Si
8Pathian nih aa thawh i,
“Ka mi cu biaceihnak hmun ah au hna u.
Mit cu an ngei, sihmanhsehlaw khua an hmu lo,
hna cu an ngei, sihmanhsehlaw khua an thei lo.
9Biaceihnak hmun i chuah awkah
miphun dang kha au hna u.
An pathian aho tal nih hmailei thil
kong an chimchung kho maw?
Atu i a um liomi thil hi aho tal nih
an rak chimchung kho maw?
Hi pathian hna nih hin,
kan chimmi cu a hmaan i
kan bia cu biatak a si ti
langhternak caah tehte
rak i chuahpi hna seh.
10“Israel mi hna, ka tehte cu nanmah
hi nan si, tiah Bawipa nih a ti;
ka sal si awkah ka thimmi cu
nanmah hi nan si,
cucaah cun nan ka hngalh i
nan ka zumh awk a si,
keimah lawnglawng hi Pathian cu
ka si ti kha
nan hngalh awk a si.
Keimah hleiah pathian dang
zeihmanh an um lo,
an rak um bal lo i hmailei zongah
an um bal lai lo.
11Keimah lawnglawng hi Bawipa cu
ka si,
keimah lawnglawng hi nanmah
an khamh khotu hna cu ka si.
12Thil um lai ding kha ka rak
in chimhchung hna i
cu hnuah cun nanmah bawmh ah
ka ra.
Miphun dang pathian nih cun hi
bantukin an tuah bal lo;
ka tehte cu nanmah hi nan si.
13Keimah hi Pathian cu ka si i
ka si zungzal ko lai.
Ahohmanh ka ṭhawnnak chungin
a luat khomi an um lai lo;
ka tuahmi kha ahohmanh nih
an thleng kho lai lo,” a ti.
Babilon In Luatnak
14Nanmah an khamhtu hna Bawipa, Israel Pathian thiang nih aa thawh i,
“Nanmah khamh awkah Babilon cu
ralkapbu pakhat ka tukter lai;
khuapi kulhnak kutka kha
ka chimh hna lai i
mi an au khuannak kha ṭahnak ah
a cang lai.
15Keimah Bawipa cu nan Pathian thiang
ka si,
Israel, nangmah Sertu cu keimah
ka si i na siangpahrang cu
keimah hi ka si,” a ti.
16Hlanpi ah hin Bawipa nih rili tan in
lam pakhat a rak ser i
cu lam cu tilet chungin a kal.
17A ṭhawngmi ralkapbu kha
a hrawh hna,
rangleng le raltuknak rangtum kha
ti chungah a paih hna.
An pil dih, zeitikhmanh ah
an chuak ṭhan ti lo,
meifar mih bantukin an mit.
18Sihmanhsehlaw Bawipa nih cun, “A um ciami
mi thil kha i tlaih peng hlah u,
hlanpi i a rak um cangmi lawng kha
tuak peng hlah u.
19Thil thar ka tuah ding tu kha i ngiat u.
Cucu atu ah hin a um lio cang,
a hmuh hmanh nan hmuh
khawh ko lai.
Ramcar chungin lam pakhat
ka kalter lai i
cuka ah cun tiva luang
kan pek hna lai.
20Ka thimmi ka mi hna ti pek awk caah
ramcar chung i tiva ka luanter hna
tikah cun,
ramlak saram hmanh nih khan
an ka upat lai,
ram-ui le ostrik va hmanh nih khan
an ka upat lai.
21Ka thimmi ka mi hna cu keimah ca i
kaa sermi an si —
anmah nih ka thangṭhatnak hla cu
an sak hna lai,” a ti.
Israel Sualnak
22 Bawipa nih,
“Asinain, Israel mi hna,
nan biakmi cu
keimah ka si lo;
kei nih cun kan nor cang hna.
23Khangh thawinak caah nan hmanmi
tuu cu keimah nan ka pe lo;
raithawinak nan tuah tikah nan
upatmi cu keimah ka si lo.
Laksawng ka pe u tiah thilrit
kan khinh hna lo
zihmui ka pe u ti zongah
kan ti fawn hna lo.
24Zihmui kha nan ka cawkpiak lo i
nan saṭil thau in ka lung
nan ka riamhter lo.
Nan sualnak tu khan thilrit nan ka
khinh i ṭhat lonak nan tuahmi khan
ka lungre nan ka theih.
25“Asinain nan sualnak
an hnawhpiaktu
hna cu keimah ka si,
keimah cu keimah ka si ruangah
hi bantukin ka tuah cu a si;
nan sualnak cu kan cinkenpiak
hna lai lo.
26Biaceihtu zung ah chuak tuah u sih,
taza nan ka cuainak cu rak
chuahpi tuah u,
kanmah hi kan hmaan, nan ti
khawhnak dingah nan bia cu hun
chuahpi tuah u.
27Nan pupa hmasa bik hna nih
sualnak an rak tuah,
nan hruaitu pawl nih ka cungah
sualnak an tuah.
28Nan uktu pawl nih ka hmunthiang
kha an thurhnawmh,
cucaah cun Israel mi nan cungah
rawhralnak ka tlunter i
ka mi hna nan cungah
zawmhtaihnak ka phakter,” a ti.
Currently Selected:
ISAIAH 43: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
