ISAIAH 40
40
Ruahchannak Bia
1“Hnem tuah hna u, ka mi hna cu
hnem tuah hna u,” tiah nan
Pathian nih a ti.
2“Jerusalem khuami cu lunglawmhnak
pe hna u law,
‘Cu caan an in cu a za cang i atu cu
an sualnak kha ka ngaihthiam cang
hna,’ a ti tiah chim hna u.
An sualnak ruangah a za in
dan ka tat cang hna,” a ti.
3Aw pakhat nih,
“Bawipa caah ramcar chungah
lam pakhat sial u!
Kan Pathian caah thetse ram i
lam cu sial u. #Mat 3.3; Mar 1.3; Jhn 1.23 #Luk 3.4-6
4Horkuang vialte cu chilh an si lai i
tlang vialte cu chimh an si lai.
Tlang cu hmun rawn ah an cang lai i
a bingbomi hmun cu rawn didiai in
an um lai.
5Cun Bawipa sunparnak cu a lang lai i
mi vialte nih an hmuh lai.
Hi biakamnak cu Bawipa hrimhrim
nih a tuahmi a si,” a ti.
6Aw pakhat nih, “Thanh tuah,” tiah
a ti.
Kei nih, “Zeidah ka thanh lai?” tiah
ka leh.
“Minung vialte hi ram bantuk men
an si, ramlak pangpar nakin
an chan a sau hlei lo. #Jei 1.10-11; 1Pet 1.24-25
7 Bawipa nih thli a chemter hna tikah
ram cu an car i pangpar cu an uai.
Minung hi ram bantuk men cu
an si taktak ko.
8Asi, ram cu a car i pangpar cu a uai,
sihmanhsehlaw kan Pathian bia cu
zungzal in a hmun.
9Maw Jerusalem, tlang sang cungah
kai law thawng ṭha kha thanh tuah!
Maw Zion, fak piin au law thawngṭha
kha thanh tuah.
Au ko, ṭih hlah.
Judah ram khua hna kha, nan Pathian
a ra lio, tiah chim hna.
10 Bawipa nih ṭhawnnak in a uk hna lai i
a khamhmi kha aa ratpi hna lai. #Isa 62.11; Biat 22.12
11A tuurun kha tuukhal nih an tuu
an zohkhenh hna bangin
a zohkhenh hna lai;
tuufa tete kha a pumh hna lai i
a kut in a cawi hna lai;
an nule kha nem tein a hruai
hna lai.
Israel Pathian Cu Zei He Hmanh Tahchunh Khawh A Si Lo
12Aho tal nih rilipi ti khi a zapei kuar in
a tah kho maw?
van khi tah a khap in a tah khotu
aho tal an um maw?
Vawlei hi tah aho nih dah hrai pakhat
chungah a vawlei a khumh
dih khawh?
Asiloah, fing le tlang vialte hna hi
aho nih dah cuaithlainak in
a thlai khawh hna?
13 Bawipa cu, hihi na tuah awk a si, tiah
a chim khomi aho tal an um maw?
Aho tal nih Bawipa cu an cawnpiak
kho in ruahnak an cheu kho maw? #Rom 11.34; 1Kor 2.16
14Zeitindah thil hi tuah awk an si ti
hngalhnak le theihnak caah
Bawipa nih aho tal ruahnak a hal bal
hna maw?
15 Bawipa, caah cun miphun hna hi
zeihmanh an si lo,
ti dor pakhat tluk hmanh an si lo,
lamhlatpi i a ummi tikulh hna khi
leidip tluk fang i
a zaangmi men an si.
16Lebanon tlang tupi chung
saram vialte hna khi,
kan Pathian sin raithawinak caah
an i za lo,
a thingkung vialte hna zong khi
a mei kaunak caah an tlawm tuk.
17Miphun hna hi Bawipa caah cun
zeihmanh an si lo.
18Pathian cu aho he dah na tahchunh
khawh lai?
Zeidah a lawh ti kha zeitindah
na chimh khawh lai? #Lam 17.29
19Zungthiam mi nih an sermi siasal bantuk a si lo,
sui sermi nih sui an hut i ngun hram an sermi chung i an tohmi
siasal bantuk hi a si lo.
20Sui le ngun aa damh kho lomi nih cun
a rop kho lomi thing kha an i thim.
Zungthiam mi kha an kawl hna i
siasal cu rawk lo dingin
an serter hna.
21Nan hngal rih lo maw?
Nan thei rih lo maw?
Hlan piin an rak in chim cang
hna lo maw?
Vawlei cu zeitindah hram aa thawk
ti kha nan thei bal lo maw?
22Vawlei leng le van pin i
a bawiṭhutdan cung i
a ṭhumi nih khin vawlei cu a ser;
a cung i a ummi hna cu khaubawk
bantuk men an si.
Van cu puanzar bantukin a zam i
mi umnak thlam bantukin a samh.
23Uktu bawi ṭhawngṭhawng kha
a ṭhumh hna i pakpalawng ah
a canter dih hna.
24Annih cu thingkung note, phun kate
le hram thla kate bantuk khi an si.
Bawipa nih thlitu kha a thlahhnawh
hna tikah an car i capawl bantukin
thlitu nih cun a choih hna.
25Pathian thiang cu aho he dah
tahchunh khawh a si lai?
Amah bantuk aho tal an um maw?
26Van khi zoh tuah u!
Nan hmuhmi arfi khi aho nih dah
a ser hna?
Ralkapbu bantukin a hruaitu hna
nih khin a ser hna;
zeizat an si kha a hngalh i an dihlak
in an min in a auh hna!
A ṭhawnnak cu a lianngan hringhran
ko — pakhat hmanh an tlau bal lo!
27Israel, a si kun ahcun, zeicahdah Bawipa
nih ka harnak hi a hngal lo i
ka caah hin thil a rem in a chia lo,
tiah na zai?
28Nan hngal lo maw? Nan thei lo maw?
Bawipa cu zungzal hmunmi Pathian
a si i
Amah nih vawlei kha a ser dih;
zeitikhmanh ah a baa bal lo i
a thazang a tlawm bal lo.
Ahohmanh nih a lungthin kha
an hngal lo.
29A dermi le a bami kha thazang
a pek hna.
30A nomi hmanh kha an tha a der tawn
i tlangval hmanh kha an tha
a ba kho.
31Sihmanhsehlaw Bawipa aa bochanmi
cu thazang thar an la.
Mupi bangin an zuang lai;
an tlik tikah an baa lai lo,
an kal tik zongah an tha a di lai lo.
Currently Selected:
ISAIAH 40: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
