ISAIAH 39
39
Babilon Ram In A Rami Lamkaltu Pawl
1Cu caan lio hrawng ṭhiamṭhiam ah cun, Babilon siangpahrang Merodak Baladan, Baladan fapa nih khan, Siangpahrang Hezekiah cu a zaw ti kha a theih caah ca le laksawng a kuat. 2Hezekiah nih khan lamkaltu pawl cu ṭha tein a rak conglawmh hna i a chawva kha a hmuhsak hna — sui le ngun le zihmui le thil rimhmui le a ral hriamnam kha a hmuhsak hna. A thil chiahnak inn i a chiahmi si hna seh, a ram chung thil si hna seh, a hmuhsak lomi hna zeihmanh an um lo. 3Khi tikah profet Isaiah cu Siangpahrang Hezekiah sinah khan a va kal i, “Hi mi hna hi khuazei in dah an rat i zeidah an in chimh?” tiah a va hal.
Hezekiah nih cun, “Ram hlapi, Babilon ram in an ra,” tiah a leh.
4“Siangpahrang inn chungah zeidah an zoh?” a ti.
“Zeizong vialte an zoh dih ko, thil chiahnak inn chung thil ka hmuhsak lomi hna zeihmanh a um lo,” tiah a leh.
5Cu tikah Isaiah nih siangpahrang cu a thawh i “Ralkapbu Bawipa nih, 6‘Na siangpahrang inn chung i a ummi thil a dihlak, na pupa hna nih nihin tiangin an rak khonmi kha, Babilon ram i kalpi an si dih lai caan kha a phan lai,’ a ti. A tangmi zeihmanh a um lai lo. 7Nangmah na tefa hrimhrim kha a cheu an kalpi hna lai i Babilon siangpahrang inn i rianṭuantu ah an til an dit hna lai,” tiah a ti. #Dan 1.1-7; 2Sia 24.10-16; 2Cha 36.10
8Hi bia a sullam cu, keimah chan chungah cun daihnak le himnak a um lai, ti a si tiin Siangpahrang Hezekiah nih cun a ruah caah, “Bawipa sinin a rami bia na ka chimhmi cu bia ṭha a si,” tiah a leh.
Currently Selected:
ISAIAH 39: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
