ISAIAH 38

Hezekiah Zawtnak le Dam Ṭhannak

1Cu caan lio hrawngah cun Siangpahrang Hezekiah kha a zaw i a thi dengmang. Profet Isaiah Amoz fapa kha amah zoh ah cun a va kal i, “Bawipa nih, ‘zeizong vialte kha ningcang tein chia dih seh, zeicahtiah a dam ṭhan ti lai lo,’ a ti. Cucaah cun thih awkah i tim ko,” tiah a va ti.

2Hezekiah cu vampang leiah khan aa mer i thla a cam. 3“Bawipa, na rian zumhawktlakte le lungthin tak tein ka ṭuan kha philh hlah. Cun tuah seh ti na ka duhmi tuah kaa zuam zungzal zong kha philh hlah,” tiah a ti i lunghno ngaiin a ṭap.

4Cun Bawipa nih Isaiah cu, 5Hezekiah sinah khan va kal law, “Na pu David i a Pathian Bawipa keimah nih na thlacamnak kha ka theih i na mitthli kha ka hmuh, kum hleinga kan nunter rih lai. 6Nangmah le hi khua Jerusalem khua hi Assiria siangpahrang kut chungin kan khamh hna lai i hi khua hi ka huhphenh lai,” a ti, tiah va chim tiah a fial.

7Isaiah nih cun a leh i, “Bawipa nih a biakamnak cu a tuah lai ti hngalhnak caah hmelchunhnak pakhat an pek lai. 8Cu hmelchunhnak cu hihi a si lai: Siangpahrang Ahaz nih a sermi ni tahnak kheng ah khan Bawipa nih ni thla cu dikiri pahra hnulei ah a kirter ṭhan lai,” a ti. Cuticun ni thla cu dikiri pahra hnulei ah khan a kir ṭhan.

9Hezekiah cu a zawtnak khan a dam ṭhan i hi thangṭhatnak hla hi a phuah:

10Ka nunnak hi chantling tein

nun thlu loin

Ka chan lailing ah mithi khua ah

ka kal rua lai tiah ka rak ruah.

11Minung mi hna vawlei cungah hin,

Bawipa si seh, a nungmi si hna seh,

ka hmu ti rua hna lai lo, ka rak ti.

12Ka nunnak cu a cat i a dong,

ṭhehmi thlam bantuk le thiamruak

la cat bantuk a si.

Pathian nih ka nunnak cu a donghter

rua lai tiah ka ruah.

13Zan khuadei nganfak in ka ai,

chiandeih nih ka ruh khi ka ṭam hna

seh law cu ko cu a lo.

Pathian nih ka nunnak cu

a donghter rua lai tiah ka ruah.

14Ka aw kha a lo riahmah i ṭhuro

hrum in ka hrum.

Van ka zoh ah ka mit re a thei.

Bawipa, hi harnak vialte chung hin

ka chuah ko.

15Zeidah ka chim khawh lai?

Hi thil a tuahtu cu Bawipa a si.

Ka chung a vang i kaa hngilh

kho lo.

16 Bawipa, nangmah ca lawnglawng

ah ka nung ko lai;

ka damter law, ka nunter ko.

17Ka chungvanghnak cu daihnak ah

a cang lai.

Nangmah nih ka nunnak cu ṭihnung

chungin na khamh,

ka sualnak vialte kha na ka

ngaihthiam.

18Mithi khuami nih cun ahohmanh nih

an in thangṭhat kho lo,

mithi nih cun zumhawktlak na si kha

an i bochan kho lo.

19Atu i keimah nih kan thangṭhat

bantukin nangmah

an thangṭhatmi cu minung

hi an si.

Zeitluk in dah zumhawktlak na si kha

pale nih an fale kha an chimh hna.

20 Bawipa, nangmah nih na ka damter,

tingtang tum in na thangṭhatnak

hla ka sa lai,

kan nun chung paohpaoh cu

Biakinn chungah nangmah

thangṭhatnak hla kan sa lai.

21Isaiah nih siangpahrang cu theipi in sibang ser law na hma khan i thuh law na dam lai, a ti. 22Cun Siangpahrang Hezekiah nih cun, “Biakinn ah ka kal kho ṭhan lai tinak ah zei hmelchunhnak dah a um lai?” tiah a ti.

Currently Selected:

ISAIAH 38: HCL06

Highlight

Copy